މެންޗެސްޓާ (ނޮވެމްބަރު 5) - އިނގިރޭސި ޕްރިމިއާ ލީގުގައި މެންޗެސްޓާ ސިޓީ އާއި މެންޗެސްޓާ ޔުނައިޓެޑުން ރޭ ކުޅުނު މެޗުތައް ކާމިޔާބުކުރިއިރު، ލީގުގައި ފުރަތަމަ ފަހަރަށް އާސެނަލް ބަލިވެއްޖެ އެވެ.
އެންމެ ފަހުގެ އިނގިރޭސި ލީގުގެ ޗެމްޕިއަން މެންޗެސްޓާ ސިޓީ މޮޅުވީ ބޯންމައުތު އަތުން 6-1ގެ ބޮޑު ތަފާތަކުންނެވެ. މެންޗެސްޓާ ޔުނައިޓެޑުން ފަހު ވަގުތު ކާމިޔާބުކުރި ގޯލާއިއެކު ފުލަމް އަތުން މޮޅުވިއިރު، އާސެނަލް ބަލިވީ ނިއުކާސަލް އަތުންވެސް 1-0 އިންނެވެ.
މި ނަތީޖާތަކާއިއެކު ޕްރިމިއާ ލީގުގެ އެއްވަނައަށް ސިޓީ ވަނީ ޖެހިލާފަ އެވެ. 11 މެޗުން ސިޓީއަށް 27 ޕޮއިންޓް ލިބިފައިވާއިރު، ދެވަނައިގައި އޮތް ޓޮޓެންހަމަށް އެއް މެޗު މަދުން ކުޅެ ލިބިފައިވަނީ 26 ޕޮއިންޓެވެ. ޓޮޓެންހަމް މިރޭ ނުކުންނާނީ ޗެލްސީއާ ދެކޮޅަށެވެ. ލީގުގެ ތިންވަނައިގައި 24 ޕޮއިންޓާ އެކު އާސެނަލް އޮތްއިރު، މެންޗެސްޓާ ޔުނައިޓެޑް އޮތީ 18 ޕޮއިންޓާއިއެކު އަށްވަނައިގަ އެވެ.
ބޯންމައުތު އަތުން ސިޓީ މޮޅުވި މެޗުގެ ތަރިއަކަށްވީ ހަލުވި ވިންގާ ޖެރެމީ ޑޮކޫ އެވެ. 55.4 މިލިއަން ޕައުންޑަށް އެކުލަބަށް ގެނައި ޑޮކޫ ވަނީ ރޭގެ މެޗުގައި ގޯލެއް ޖަހައި، އިތުރު ހަތަރު ގޯލު ޖެހުމަށް އެސިސްޓު ކޮށްފަ އެވެ.
ސިޓީގެ ގޯލުތައް ޖަހައިދިނީ ޑޮކޫގެ އިތުރުން ބެނާޑޯ ސިލްވާ، މެނުއަލް އަކަންޖީ، ފިލް ފޮޑެން އަދި ނަދަން އަކޭ އެވެ. ބެނާޑޯ ސިލްވާ މެޗުގައި ދެ ގޯލު ޖެހި އެވެ. ބޯންމައުތުގެ ހަމައެކަނި ގޯލު ޖަހައިދިނީ ލުއިސް ސިނިސްޓާރާ އެވެ.
ލީގުގައި މެންޗެސްޓާ ޔުނައިޓެޑުން ފުލަމް އަތުން މޮޅުވީ މެޗުގެ އިތުރު ވަގުތުގައި ޖެހި ގޯލުންނެވެ. މި ގޯލު ޖަހައިދިނީ ކެޕްޓަން ބްރޫނޯ ފެނާންޑޭސް އެވެ. މި މޮޅަކީ މެންޗެސްޓާ ޔުނައިޓެޑްގެ ކޯޗުކަމުގައި ހުރި އެރިކް ޓެންހާގަށް ލިބޭނެ ބޮޑު ހިތްހަމަޖެހުމެކެވެ. ސަބަބަކީ އެކުލަބު ނަތީޖާތައް ގޯސްވެ އޭނާގެ މަގާމު ގެއްލިދާނެކަމުގެ އަޑުތައް ފެތުރިފައި އޮތުމެވެ.
ނިއުކާސަލްގެ އެންތަނީ ގޯޑަން ލަނޑު ޖެހުމަށް ފަު އުފާ ފާޅުކުރަނީ
ޕްރިމިއާ ލީގުގައި ރޭ ކުޅުނު އެންމެ ފޯރިގަދަ މެޗަކީ ނިއުކާސަލް ޔުނައިޓެޑާއި އާސެނަލް ވާދަކުރި މެޗެވެ. ފޯރިގަދަ ކުޅުމެއް ފެނުނު މި މެޗު 1-0 އިން ނިއުކާސަލްއިން ކާމިޔާބުކުރުމާއިއެކު މި ސީޒަންގައި ލީގުގައި ބަލިނުވެ އާސެނަލުން ދަމަހައްޓަމުން އައި ރެކޯޑު ވަނީ ނިމުމަކަށް އައިސްފަ އެވެ.
އަނިޔާގެ ސަބަބުން އާސެނަލުގެ ކެޕްޓަން މާޓިން އޮޑެގާޑް، އަދި ފޯވާޑް ގެބްރިއެލް ޖެސޫސް ނުލައި ކުޅުނު މި މެޗުގެ ހަމައެކަނި ގޯލް ނިއުކާސަލް އަށް ޖަހައިދިނީ އެންތަނީ ގޯޑަން އެވެ.
ގޯޑަން ޖެހި ގޯލަކީ ރަނގަޅު ގޯލެއް ކަމަށް ރެފްރީ ނިންމީ ފަސް މިނެޓެއްހާއިރު ވީއޭއާރު ބެލުމަށް ފަހުގަ އެވެ. އެގޮތުން, ގޯޑަން ޖެހި ގޯލަށް ބޯޑަ ހުރަސްވުމުގެ ކުރިން އެ ބޯޅަ ބޭރުވިތޯ ބެލުމަށާއި، އޭރިއާ ތެރެއިން އާސެނަލްގެ ގެބްރިއެލް މެގަލޭސް އަށް ނިއުކާސަލްގެ ކަލަމް ވިލްސަން ފައުލް ކުރިތޯ ބެލުމަށާއި، ގޯޑަން އޮފްސައިޑްތޯ ވީއޭއާރުން ބެލި އެވެ.
ބޯޅަ ބޭރު ނޫންކަމަށް ވީއޭއާރުން ނިންމީ އެކަން ރަނގަޅަށް ފެންނާނެ އޭންގަލެއް ރީޕްލޭއިން ފެންނަން ނެތުމުންނެވެ. އަނެއްކޮޅުން ގޯޑަން އޮފްސައިޑް ކަމަށް ނުނިންމީވެސް ވިލްސަން ގައިގައި ބޯޅަ ޖެހުނު ކަމަށް ޔަގީންކުރެވޭ އޭންގަލެއް ނެތުމުންނެވެ. އެންމެ ފަހުން ވީއޭއާރުން ނިންމީ ގޯޑަން ޖެހި ގޯލު ރަނގަޅުކަމަށެވެ.
މެޗަށްފަހު އާސެނަލްގެ ކޯޗު މިކޭލް އާޓެޓާ ބުނީ ނިއުކާސަލް އިން ޖެހި ގޯލަކީ ރަނގަޅު ގޯލެއްކަމަށް ރެފްރީ ނިންމުމަކީ ޕްރިމިއާ ލީގަށް ހުރި ބޮޑު ލަދެއްކަމަށެވެ. އޭނާ ބުނީ އެއީ ދޭން ޖެހޭ ގޯލެއްކަމަށް ބެލެވޭ އެއްވެސް ސަަބަބެއް ނެތްކަމަށެވެ.
"އަހަރެން ލަދުވެސް ގަނޭ މިވަގުތު މިތާ ހުންނަން، ދުނިޔޭގެ އެންމެ މޮޅު ލީގޭ ކިޔާފަ އަހަރުމެން އިޝްތިހާރު ކުރާއިރު، މިކަހަލަ ގޯލެއް ދިނުމަކީ މި ލީގަށްވެސް ހުރި ބޮޑު ބޮޑު ލަދެއް." އާޓެޓާ ބުންޏެވެ.
