މަޝްހޫރު ކޮންސްޓަކްޝަން ކުންފުންޏެއް ކަމަށްވާ ޓެޕްކޮން ކޮންސްޓްރަކްޝަން އިން ހިންގި "ޓެޕްކޮން ހާޑްވެއާ" ފިހާރަ 40 މިލިއަން ރުފިޔާ އަށް ވިއްކާލަން ނިންމައިފި އެވެ.
ޖަނަވަރީ މަގުގައި ހިންގާ ޓެޕްކޮން ހާޑްވެއާ އަކީ، 1995 ވަނަ އަހަރު ރަޖިސްޓްރީކުރި ޓެޕްކޮން ކޮންސްޓްރަކްޝަން އިން މިހާރު ހިންގާ ހަމައެކަނި ހާޑްވެއާ ފިހާރަ އެވެ. މީގެ ކުރިން، މާލޭގެ ބައެއް އެހެން ހިސާބު ތަކުގައި ވެސް ޓެޕްކޮންގެ ހާޑްވެއާ ފިހާރަތައް ހިންގި އެވެ.
ޓެޕްކޮން ހާޑްވެއާ ވިއްކާލުމާ ގުޅެގޮތުން، އެ ކުންފުނީގެ ވެރިފަރާތުން ނޫހަށް އެއްވެސް މައުލޫމާތެއް ހިއްސާ ކުރާކަށް ބޭނުމެެއް ނުވި އެވެ. ޓެޕްކޮންގެ ވެރިޔާ އަލި މަނިކު (ޓެޕް އައްޔަ) އަށް ގުޅައި މެސެޖް ކުރުމުން ވެސް އެއްވެސް ޖަވާބެއް ނުދެއްވަ އެވެ. އެ ކުންފުނީގެ އެހެން އިސްބޭފުޅަކު ވިދާޅުވީ މައުލޫމާތު ދެއްވޭނީ ހަމައެކަނި އަލީ އަށް ކަމަށެވެ.
މީގެ ދުވަސް ކޮޅެއް ކުރިން ވަނީ ޓެޕްކޮން ހާޑްވެއާ، 40 މިލިއަން ރުފިޔާ އަށް ވިއްކާލުމަށް، އައި- ބޭ ގައި ވެސް ޖަހައިފަ އެވެ.
'އަދަދު' އަށް އިތުބާރު ހުރި ގޮތަކަށް މައުލޫމާތު ލިބިފައިވައިވާ ގޮތުގައި ޓެޕްކޮން ހާޑްވެއާގެ ބައެއް މުވައްޒަފުން ވަޒިފާ އިން ވަކި ކުރަން ވަނީ ނޯޓިސް ދީފަ އެވެ. އަދި ޓެޕްކޮން މިހާރު ހިންގަމުން ގެންދަނީ އަލީގެ ބައެއް ދަރިންނެވެ. ވަރަށް ގިނަ ބާވަތްތަކެއްގެ ކޮންސްޓްރަކްޝަން މެޓީރިއަލް ވިއްކާ ޓެޕްކޮން ހާޑްވެއާ އަށް މިހާރު ވެސް ދުވާލަކު ވަރަށް ރަނގަޅު އާމްދަނީއެއް ލިބޭ ކަމަށް ވެ އެވެ.
އަމިއްލަ މަސައްކަތުން ކާމިޔުާބު ވިޔަފާރި ވެރިއަކަށް ވި، ޓެޕެކޮން އައްޔަ އަކީ އިމާރާތް ކުރުމުގެ ދާއިރާ އިން އާންމު ހިދުމަތުގެ އިނާމު ވެސް ލިބިވަޑައިގެންފައިވާ ބޭފުޅެކެވެ.
