މެންޗެސްޓާ (ނޮވެމްބަރު 3) - މެންޗެސްޓާ ޔުނައިޓެޑްގެ ކޯޗުކަމުން އެރިކް ޓެން ހާގު ވަކިކުރަން އެކުލަބުން ތައްޔާރުވަމުން އަންނަ ކަމަށް އިނގިރޭސި މީޑިއާތަކުން ރިޕޯޓްކޮށްފި އެވެ.
ޔުނައިޓެޑުން ކޯޗު ޓެން ހާގު މަގާމުން ވަކިކުރަން ވިސްނަން ފެށީ ސީޒަންގެ ކުރީކޮޅު ކުލަބުގެ ނަތީޖާތައް ގޯސްވެ، ކުޅުންތެރިންނާ އޮތް ގުޅުން ގޯސްވާން ފެށުމުންނެވެ. މިހާތަނަށް މި ސީޒަންގައި ޔުނައިޓެޑުން ކުޅުނު 15 މެޗުގެ ތެރެއިން އަށް މެޗުން އެޓީމް ވަނީ ބަލިވެފަ އެވެ.
ޖެހި ޖެހިގެން ދެ މެޗުގައި އަމިއްލަ ދަނޑުގައި 3-0 އިން ބަލިވެ އުނދަގޫ ހާލަތެއްގައި ޔުނައިޓެޑް އޮތްއިރު، އެކުލަބުން މިދިޔަ އަހަރު ހޯދި ކަރަބާއޯ ކަޕުންވެސް ވަނީ ކަޓާފަ އެވެ. އަނެއްކޮޅުން ލީގުގައިވެސް އެކުލަބު އޮތީ ތާވަލްގެ އަށްވަނައިގައި އެވެ. ކުޅުނު 10 މެޗުން ލިބިފައިވަނީ 15 ޕޮއިންޓެވެ.
ކޯޗު ވަކިކުރަން ޔުނައިޓެޑުން ވިސްނަމުން އަންނަ އަނެއް ސަބަބަކީ ކުލަބުގެ ކުޅުންތެރިންނާ އޮތް ގުޅުން ކުޑަވާން ފެށުމެވެ. މިގޮތުން ބައެއް ކުޅުންތެރިންނަށް ރަނގަޅަށް ނުކުޅެވޭއިރުވެސް އެ ކުޅުންތެރިން ކުޅެން އަރުވައި، އެހެން ކުޅުންތެރިން ބާކީ ކުރާ ވާހަކަތަކެއްވެސް އަންނަނީ އަޑުއިވެމުންނެވެ. އަދި ޗޭންޖިން ރޫމުގައި ބައެއް ކުޅުންތެރިން ޓެންހާގާ ވާހަކަދައްކަން ބޭނުން ނުވާ ކަމަށް ވެސް އަޑުވަނީ ފެތުރިފަ އެވެ.
މީޑިއާ ރިޕޯޓްތައް ބުނާ ގޮތުން ލީގުގައި ފުލަމްއާ ދެކޮޅަށް މާދަމާ ޔުނައިޓެޑް ކުޅޭ މެޗުން މޮޅުވުން ނޫން ގޮތެއް ޓެން ހާގަށް ނެތެވެ. އެ މެޗުން ބަލިވެއްޖެ ނަމަ އޭނާއަށް މަގާމު ގެއްލުމުގެ ފުރުސަތު ބޮޑެވެ.
ޓެން ހާގުގެ ބަދަލުގައި ޔުނައިޓެޑުން މިހާރު އާ ކޯޗެއް ހޯދުމަށް މަސައްކަތް ފަށާފައިވާއިރު، ލިސްޓުގެ ކުރީގައި އުޅެނީ ރެއާލް މެޑްރިޑްގެ ކުރީގެ ކޯޗު ޒައިނުއްދީން ޒިދާން އެވެ. ޓެން ހާގު އެ މަގާމަށް މީގެ ދޮޅު އަހަރުކުރިން އައިއިރުވެސް ޒިދާން ހޯދަން ޔުނައިޓެޑުން މަސައްކަތްކުރި އެވެ.
