ދެވަނަ ޑިވިޝަން ފުޓްބޯޅަ މުބާރާތަށް ތައްޔާރުވަމުން އަންނަ ވިކްޓްރީ ސްޕޯޓްސް ކުލަބުގެ ބިދޭސީ ކުޅުންތެރިން އެ ޓީމްގެ ފަރިތަކުރުންތަކުގައި ބައިވެރިވާން ފަށައިފި އެވެ.
ފުރަތަމަ ޑިވިޝަނަށް ޕްރޮމޯޓްވުމަށް ވަރުގަދަ ސްކޮޑަކާއިއެކު ތައްޔާރުވަމުން އަންނަ ވިކްޓްރީން ބިދޭސީ ހަ ކުޅުންތެރިން ގެންނަން ނިންމާފައިވާއިރު، އޭގެ ތެރެއިން ފަސް ކުޅުންތެރިއަކު ވަނީ މާލެ އައި ޓީމާ ގުޅިފަ އެވެ.
މި ހަ ކުޅުންތެރިންގެ ތެރޭގައި މީގެ ކުރިން ރާއްޖޭގައި ކުޅެފައިވާ ކުޅުންތެރިން ގިނަ އެވެ. ވިކްޓްރީއަށް ގެނައި ބިދޭސީ ކީޕަރަކީ މީގެ ކުރިން ފޯކައިދޫ އަދި ގްރީން ސްޓްރީޓްސްއަށް ވެސް ކުޅުނު ޕާކިސްތާންގެ ގައުމީ ޓީމްގެ ގޯލްކީޕަރު ހަނީފް ސާގިބް އެވެ.
ޑިފެންޑަރުންނަށް ގެނައީ އުޒްބަކިސްތާންގެ ހަސަންބޮއޭވް ފުރްކަޖޯން އާއި ސަބިއާގެ މިލޯސް ކޮވަސެވިޗް އެވެ. މި ދެ ކުޅުންތެރިންގެ ތެރެއިން މިލޯސް ވަނީ މީގެ ކުރިން ފުރަތަމަ ޑިވިޝަންގައި ޔުނައިޓެޑް ވިކްޓްރީއަށް ކުޅެފަ އެވެ. ހަސަންބޮއޭވް ވަނީ އުޒްބަކިސްޔާން، ތަޖިކިސްތާން އަދި ބަންގްލަދޭޝްގެ ލީގުގެ ޓީމްތަކަށްވެސް ކުޅެފަ އެވެ.
ޕާކިސްތާންގެ ގޯލްކީޕަރު ހަނީފް ސާގިބް، ވިކްޓްރީގެ ފަރިތަކުރުންތަކުގައި - ފޮޓޯ: އަބްދުﷲ އިޔާން/އަދަދު
އެޓޭކިން ޑިޕާޓްމަންޓަށް ގެނައި ކުޅުންތެރިންނަކީ ބެލަރޫސްގެ އިވާން ވެރާސް އާއި ކިރިގިސްތާންގެ އެނެޓޮލީ ވްލާސިޗޭވް (ޓޯނީ) އެވެ. އިވާން ވަނީ މީގެ ކުރިން އެއް ސީޒަންގައި ޔުނައިޓެޑް ވިކްޓްރީ އަށް ކުޅެފަ އެވެ. ޓޮނީ ވަނީ ޓީސީ ސްޕޯޓްސް ކުލަބާއި ޔޫވީއަށް ވެސް ކުޅެފަ އެވެ.
ބިދޭސީ ކުޅުންތެރިންގެ ތެރެއިން ޓޯނީ ފިޔަވައި ބާކީ ފަސް ކުޅުންތެރިން އަންނަނީ ޓީމާ އެކު ފަރިތަކުރަމުންނެވެ. ޓޯނީ ޓީމާ ގުޅޭނީ މި މަހުގެ 10 ގަ އެވެ.
ބިދޭސީ ހަ ކުޅުންތެރިން އިތުރުން ވިކްޓްރީ އިން ވަނީ ސްރީލަންކާގެ ގޯލްކީޕަރު ޓްރެއިނަރެއްވެސް ގެނެސްފަ އެވެ. ލަންކާގެ ސަމްޕަތު ބުޑިކާވެސް އަންނަނީ ޓިމާއިއެކު ބައިވެރިވަމުންނެވެ.
މިމަހުގެ ފަހުކޮޅު ފަށަން ތައްޔާރުވާ ދެވަނަ ޑިވިޝަން ފުޓްބޯޅަ މުބާރާތަށް އެންމެ ވަރުގަދައަށް ތައްޔާރުވާ އެއް ޓީމަކީ ވިކްޓްރީ އެވެ. މިގޮތުން އެކުލަބުން ވަނީ ގައުމީ ތަޖުރިބާކާރު ދެ ކުޅުންތެރިންކަމަށްވާ އަކުރަމް އަބްދުލްޣަނީ އާއި މުުހައްމަދު އުމެއިރުގެ ސޮއި ހޯދާފަ އެވެ. މީގެ އިތުރުން ފުރަތަމަ ޑިވިޝަންގައި ޓީސީ އަށް ކުޅުނު އަހުމަދު ރިލްވާން (ބެން) އާއި ނިއު އާއި މަޒިޔާއަށް ކުޅުނު އަހުމަދު އަބްދުﷲ (ލިލީ)ގެ އިތުރުން މޫސާ ޔާމީން (ޔާމްބެ)ވެސް ވަނީ ވިކްޓްރީއާ ގުޅިފަ އެވެ.
