ލަންޑަން (އޮކްޓޯބަރު 29) - އިނގިރޭސި ޕްރިމިއާ ލީގުގައި ބްރެންޓްފޯޑް އަތުން ޗެލްސީ ބަލިވިއިރު، އެޑީ އެންކެޓިއާގެ ހެޓްރިކާ އެކު އާސެނަލުން ބޮޑު މޮޅެއް ހޯދައިފި އެވެ.
އަމިއްލަ ދަނޑުގައި ބްރެންޓްފޯޑު އަތުން ޗެލްސީ ބަލިވީ 2-0 އިންނެވެ. އާސެނަލް މޮޅުވީ ޝެފީލްޑް ޔުނައިޓެޑާ ވާދަކޮށް 5-0 ގެ ބޮޑު ތަފާތަކުންނެވެ.
މި ނަތީޖާތަކާ އެކު އާސެނަލްވަނީ ލީގުގެ ދެ ވަނައަށް ޖެހިލައިފަ އެވެ. އެ ޓީމަށް 10 މެޗުން 24 ޕޮއިންޓް ލިބިފައިވާއިރު، އެއް ވަނައިގައި އޮތް ޓޮޓެންހަމުން ވަނީ 26 ޕޮއިންޓް ހޯދައިފަ އެވެ. އެންމެ ފަހުގެ ޗެމްޕިއަން މެންޗެސްޓާ ސިޓީ އޮތީ އެއް މެޗު މަދުން ކުޅެގެން 21 ޕޮއިންޓާ އެކު ތިން ވަނައިގަ އެވެ.
ޗެލްސީ އަމިއްލަ ދަނޑުގައި ބަލިވި މެޗުގައި އެޓީމުން 17 ހަމަލާއެއް އުފެއްދި އެވެ. ފުރަތަމަ ހާފުގައި ގިނަ ހުސް ފުރުސަތުތަކެއް ލިބުނުއިރު ބޭނުމެއް ނުކުރެވުނެވެ. މެޗުގައި ބްރެންޓްފޯޑުން ދެ ގޯލުވެސް ޖެހީ ދެ ވަނަ ހާފުގަ އެވެ. މި ދެ ގޯލު ޖަހައިދިނީ އީތަން ޕިނޮކް އާއި ބްރަޔަން އެމްބުއޭމޯ އެވެ.
މި މެޗުން ބަލިވުމުން ޗެލްސީ ވަނީ ތާވަލްގެ 11 ވަނައަށް ވެއްޓިފަ އެވެ. ޗެލްސީއަށްވުރެ އެއް ޕޮއިންޓް އިތުރަށް ހޯދައިގެން ބްރެންޓްފޯޑް ވަނީ 10 ވަނަ އަށް ޖެހިލައިފަ އެވެ.
އިނގިރޭސި ޕްރިމިއާ ލީގުގައި މި ސީޒަނުގައި މެޗަކުން ބަލިނުވެ އޮތް އާސެނަލުން ޝެފީލްޑްގެ މައްޗަށް ކުރި ހޯދި މެޗުގައި ޓީމްގެ މުހިންމު ދެ ކުޅުންތެރިއަކަށް ކޯޗު ވަނީ ރެސްޓު ދީފަ އެވެ. އެއީ ކެެޕްޓަން މާޓިން އޮޑެގާޑް އާއި ޑިފެންޑަރު ގެބްރިއެލް މެގަޅޭސް އެވެ.
އަނިޔާގެ ސަބަބުން ފޯވާޑް ގެބްރިއެލް ޖެސުސް އާއި މިޑްފިލްޑަރު ތޯމަސް ޕާޓޭ ނުލައި ކުޅުނު މި މެޗުގައި އެޑީ އެންކެޓިއާ ވަނީ ތިން ގޯލު ޖަހައި ހެޓްރިކެއް ހަދާފަ އެވެ. މިއީ ޕްރިމިއާ ލީގުގައި އެންކެޓިއާ ހެދި ފުރަތަމަ ހެޓްރިކެވެ. އާސެނަލްގެ އަނެއް ދެ ގޯލު ޖަހައިދިނީ ބަދަލު ކުޅުންތެރިންގެ ގޮތުގައި ކުޅެން އެރި ފަބިއޯ ވިއެރާ އާއި ޓަކެހީރޯ ޓޮމިޔާސޫ އެވެ. ވިއެރާ ގޯލް ޖެހީ ލިބުނު ޕެނަލްޓީއަކުންނެވެ. ޓޮމިޔާސޫގެ ގޯލަކީ އޭނާ އާސެނަލަށް ކުޅުނު 50 މެޗުގައި ޖެހި ފުރަތަމަ ގޯލެވެ.
ޕްރިމިއާ ލީގުގައި ރޭ ކުޅުނު އެހެން މެޗުތަކަށް ބަލާއިރު، ބޯންމައުތުން ވަނީ 2-1 އިން ބާންލީ ބަލިކޮށްފަ އެވެ. ވުލްވްސް އާއި ނިއުކާސަލް ޔުނިޓެޑް ވާދަކުރި މެޗު ނިމުނީ 2-2 އިން އެއްވަރުވެގެންނެވެ.
