މެންޗެސްޓާ (އޮކްޓޯބަރު 28) - މެންޗެސްޓާ ޔުނައިޓެޑްގެ ގޯލްކީޕަރު އޮނާނާގެ ކުޅުން މިދިޔަ ދެ މެޗުގައި ރަނގަޅު ކަމަށާއި، ނަމަވެސް އެއީ ޔުނައިޓެޑުގެ ކީޕަރެއްގެ އަސްލު ފެންވަރު ނޫން ކަމަށް ކޯޗު އެރިކް ޓެން ހާގު ބުނެފި އެވެ.
އިޓަލީގެ އިންޓަ މިލާނުން ޕްރިމިއާ ލީގުގެ މެންޗެސްޓާ ޔުނައިޓެޑަށް މި ސީޒަންގައި ބަދަލުވި އޮނާނާ އަކީ އެކުލަބުގެ ކުޅުންތެރިންގެ ތެރެއިން އެންމެ ގިނަ ފާޑުކިޔުން އަމާޒުވަމުން އަންނަ ކުޅުންތެރިޔާ އެވެ. ކުރިން 12 އަހަރު އެކުލަބަށް ކުޅުނު ޑޭވިޑް ޑެހެއާ ދޫކޮށްލުމަށްފަހު އޮނާނާގެ ސޮއި އެކުލަބުން ހޯދީ 48 މިލިއަން ޕައުންޑަށެވެ.
މިހާތަނަށް އެކުލަބަށް 13 މެޗު އޮނާނާ ކުޅެފައިވާއިރު ސަޕޯޓަރުން ބޭނުންވާ ވަރުގެ ކުޅުމެއް ގިނަ މެޗުތަކެއްގައި ނުދެއްކެ އެވެ. ވަކިން ހާއްސަކޮށް ކުރީކޮޅު ޔުނައިޓެޑް ކޮޅަށް ވަން ގޯލުތަކުގައި އޮނާނާއަށް ހެދުނު ގޯސްތައް ގިނަ އެވެ.
ނަމަވެސް މިދިޔަ ދެ މެޗުގައި އޮނާނާ ވަނީ ރަނގަޅު ކުޅުމެއް ދައްކާފަ އެވެ. މިދިޔަ އަންގާރަ ދުވަހުގެ ރޭ ޗެމްޕިއަންސް ލީގުގައި ކޮޕެންހެގަން އަތުން ޔުނައިޓެޑް މޮޅުވީ ފަހު ވަގުތު އޮނާނާ ދިފާއުކުރި ޕެނަލްޓީ އިންނެވެ.
އިނގިރޭސި ޕްރިމިއާ ލީގުގައި މާދަމާ ރޭ ވާދަވެރި މެންޗެސްޓާ ސިޓީއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ކޯޗު އެރިކް ޓެން ހާގު ބުނީ ޔުނައިޓެޑުގައި ކުޅެން ޖެހޭ ފެންވަރު އޮނާނާއަށް އެނގޭނެ ކަމަށާއި، އެ ލެވެލްއަށް އަދި އޮނާނާއަށް ނާދެވޭ ކަމަށެވެ. މިދިޔަ ދެ މެޗުގައި އޮނާނާ ރަނގަޅަށް ކުޅުނު ނަމަވެސް އެއީ އަދިވެސް އޭނާ ބޭނުންވާ ފެންވަރެއް ނޫން ކަމަށް ކޯޗު ބުންޏެވެ.
"މިދިޔަ މެޗުގައި ރަނގަޅު ކުރިއެރުމެއް ފެނުނު އޮނާނާގެ ފަރާތުން. އެކަމަކު އެއީ މި ކުލަބުގައި ރަނގަޅު އެއީ އެންމެ އެކަށީގެންވާ މިންވަރެއް ނޫން،" ކޯޗު ބުންޏެވެ.
ކޯޗު ޓެން ހާގު ވަނީ ޔުނައިޓެޑަށް މި ސީޒަންގައި ދިމާވެގެން އުޅެނީ ގޯލު ނުޖެހުމުގެ މައްސަލަކަން ފާހަގަކޮށްފަ އެވެ. ލީގުގައި ކުޅުނު ނުވަ މެޗުގައި ޔުނައިޓެޑަށް ޖެހުނީ 11 ގޯލެވެ. އޭނާ ބުނީ ގޯލު ޖެހުމުގެ މައްސަލަ ހައްލުކުރަން މަސައްކަތް ކުރަމުން އަންނަ ކަމަށާއި، ފަރިތަކުރުންތަކުގައި ވެސް އެކަމަށް އިސްކަންދެމުން އަންނަ ކަމަށެވެ.
