އިންތިހާބީ ރައީސް ޑރ. މުހައްމަދު މުއިއްޒު ރައީސުލްޖުމްހޫރިއްޔާކަމުގެ ހުވާކުރެއްވުމަށް ނޮވެމްބަރު 17، ގައި ބާއްވާ ރަސްމިއްޔާތުގެ ހަފުލާ މެނޭޖްކުރުން ސިފައިންގެ ވެލްފެއާ ކޮމްޕެނީ (ސިވެކް) އާ ހަވާލުކުރަން ނެޝަނަލް ޓެންޑާ ބޯޑުން ނިންމާފައިވާ ކަން "އަދަދު" އެނގިއްޖެ އެވެ.
އިތުބާރު ހުރި މަސްދަރަކުން "އަދަދު" އަށް މައުލޫމާތު ދިން ގޮތުގައި އެ އިވެންޓް މެނޭޖްކުރުން ސިވެކްއާ ހަވާލުކުރަން ނިންމީ 28 މިލިޔަން ރުފިޔާއަށެވެ.
ނަމަވެސް ރައްޔިތުންގެ މަޖިލީހުގެ އިދާރާއިން ބުނީ އެ އިވެންޓް ހަވާލުކުރަން ނިންމީ ކޮން ބަޔަަކަށް ކަން ނެޝަނަލް ޓެންޑާ ބޯޑުން އަދި އެ އިދާރާއަށް ނާންގާ ކަމަށެވެ.
"އެ ރަސްމިއްޔާތާ މެދު ގޮތެއް ނިންމަން ނެޝަނަލް ޓެންޑާއަަށް ހުޅުވައިލަން މަޖިލީހުުން އޮތީ ޓެންޑާ ބޯޑާ ހަވާލުކޮށްފައި. އެއަށް ގޮތެއް ނިންމިކަން އަދި ނާންގާ،" މަޖިލީހުގެ ޑިރެކްޓާ އޮފް ކޮމިއުނިކޭޝަން ހަސަން ޒިޔާއު ވިދާޅުވި އެވެ.
ރައީސުލްޖުމްހޫރިއްޔާ ހުވާކުރެއްވުމުގެ ރަސްމިއްޔާތުގެ ހަފުލާ މެނޭޖްކުރާ ބަޔަކު ކުރަން ޖެހޭނެ މައިގަނޑު ކަންތައްތަކަކީ ރަސްމިއްޔާތު ބާއްވާ ތަން ޒީނަތްތެރިކުރުމާއި ރަސްމިއްޔާތަށް ވަޑައިގަންނަވާ ބޭފުޅުންނަށް ފަރިއްކޮޅު އެރުވުން ފަދަ ކަންކަމެވެ.
ޑރ. މުއިއްޒު ހުވާކުރެއްވުމުގެ ރަސްމިއްޔާތު ބާއްވަން ނިންމާފައި އޮތީ ޖުމްހޫރީ މައިދާނުގަ އެވެ. އެހެން ނަމަވެސް މޫސުން ގޯސްވެއްޖެ ހާލަތެއްގައި އެހެން ތަނަކަށް ބަދަލުކުރަން ޖެހޭނެތީ ސޯޝަލް ސެންޓަރު ވެސް އެ ރަސްމިއްޔާތަށް ތައްޔާރުކުރާ ކަން މި ނޫހަށް ވަނީ އެނގިފަ އެވެ.
މިހާރު ހުންނެވި ރަައީސް އިބްރާހީމް މުހައްމަދު ސޯލިހު ހުވާކުރައްވަން ގަލޮޅު ދަނޑުގައި ބޭއްވި ރަސްމިއްޔާތުގެ އިވެންޓް މެނޭޖްކުރަން ބަޔަކާ ހަވާލުކުރީ 17 މިލިޔަން ރުފިޔާއަށެވެ.
titledesc
