ދަރަމްޝާލާ، އިންޑިއާ (އޮކްޓޫބަރު 23) - އައިސީސީ ވަންޑޭ އިންޓަނޭޝަނަލް (އޯޑީއައި) ކްރިކެޓް ވޯލްޑް ކަޕްގައި އިންޑިއާ އިން ރޭ ކުޅުނު މެޗުގައި ނިއު ޒީލެންޑްގެ މައްޗަށް ހަތަރު ވިކެޓުން ކުރިހޯދައިފި އެވެ.
މި ނަތީޖާއާ އެކު މުބާރާތުގައި މެޗަކުން ބަލިނުވެ އޮތް ހަމައެކަނި ޓީމަކީ އިންޑިއާ އެވެ. އިންޑިއާ އިން 2019 ވަނަ އަހަރުގެ ސެމީ ފައިނަލުގައި ބަލިވީ ނިއު ޒީލެންޑް އަތުންނެވެ.
ފުރަތަމަ ބުރުގެ ތާވަލުގެ ކުރީގައި އިންޑިއާ އޮތީ ފަސް މެޗުން 10 ޕޮއިންޓާ އެކު އެވެ. ދެ ވަނައިގައި އޮތް ނިއު ޒީލެންޑުގެ ފަސް މެޗުން އަށް ޕޮއިންޓް އެބައޮތެވެ.
ހިމާޗަލް ޕްރަދޭޝް ކްރިކެޓް އެސޯސިއޭޝަން ސްޓޭޑިއަމްގައި ކުޅުނު ރޭގެ މެޗުގައި އިންޑިއާ އަށް ޓޮސް ދިމާވުމުން ނިންމީ ފީލްޑް ކުރުމަށެވެ. ނިއު ޒީލެންޑުން ކުޅެން އަރައި، 50 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދުނީ 273 ލަނޑެވެ. އެންމެ ރަނގަޅު ކުޅުމެއް ދެއްކީ 130 ލަނޑު ހެދި ޑަރީލް މިޗެލް އެވެ.
މި އިނިންސްގައި އިންޑިއާ އިން ތަފާތު ދެއްކީ ފަސް ވިކެޓް ނެގި މުހައްމަދު ޝާމީ އެވެ. އޭނާ ފަރާތުން ފެނުނީ ނިއު ޒީލެންޑްގެ ކުޅުމަށް ވަރަށް ބޮޑަށް ތައްޔާރުވެގެން މެޗަށް ނުކުމެ ތަފާތު ދެއްކި ތަނެވެ.
ޖަވާބުގައި ކުޅެން އަރައި އިންޑިއާ އިން ވަނީ 48 އޯވަރުގެ ތެރޭގައި ހަ ކުޅުންތެރިން ނުބައިވެގެން 274 ލަނޑު ހަދައިގެން މޮޅުވި އެވެ. އިންޑިއާ ޓީމަށް އެންމެ ރަނގަޅު ކުޅުމެއް ދެއްކީ، 95 ލަނޑު ހެދި ވިރާތު ކޯލީ އެވެ. ސައްތައަކާ ގާތަށް ޖެހިލި ވިރާތު، މި މެޗުގައި ސައްތައެއް ހެދި ނަމަ ލެޖެންޑަރީ ތަރި ސަޗިން ޓެންޑުލްކާގެ އޯޑީއައި ވޯލްޑް ކަޕްގެ ސެންޗަރީ ރެކޯޑާ ހަމަކުރެވުނީހެވެ. ސަޗިން ވަނީ އޯޑީއައި ވޯލްޑް ކަޕް ކެރިއަރުގައި 49 ސެންޗަރީ ހަދައިފަ އެވެ.
އިންޑިއާ ޓީމަށް ރޭގެ މެޗު ކާމިޔާބުވުމުގައި ފުރަތަމަ ކުޅެން އެރި ބެޓްސްމަނުންގެ ޕާޓްނަޝިޕުން ރަނގަޅު ކުޅުމެއް ދެއްކި އެވެ. އެ ގޮތުން، ރޯހިތު ޝަރްމާ 46 ލަނޑު ހެދިއިރު، ޝުބްމަން ގިލް ވަނީ 26 ލަނޑު އެއްކޮށްފަ އެވެ.
މި އިނިންސްގައި ނިއު ޒީލެންޑްގެ ބޯލަރު، ލޮކީ ފާގަސަން ވަނީ ދެ ވިކެޓް ނަގައިފަ އެވެ.
ކްރިކެޓް ވޯލްޑް ކަޕްގައި މިއަދު ކުޅޭ މެޗުގައި ޕާކިސްތާން ބައްދަލުކުރަނީ އަފްގާނިސްތާންއާ އެވެ. ދެ ޓީމުން ވެސް ހަތަރު މެޗު ކުޅެފައިވާއިރު، ޕާކިސްތާން ވަނީ ދެ މެޗުން މޮޅުވެފަ އެވެ. އަފްގާނިސްތާނުން ވަނީ އިންގްލެންޑް ބަލިކޮށްފަ އެވެ.
