ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކި ކުރުމަށް ހުށަހަޅާފައި އޮތް މައްސަލަ އަންނަ އާދީއްތަ ދުވަހު ހިންގުމަށް އެ މަޖިލީހުން އެޖެންޑާ ކުރަން ނިންމައިފި އެވެ.
ނަޝީދު ވަކިކުރުމުގެ މައްސަލަ އަންނަ އާދީއްތަ ދުވަހަށް އެޖެންޑާކުރާނެ ކަން މެމްބަރުންނަށް އެންގެވީ މަޖިލީހުގެ އަމީން އާއްމު ފާތިމަތު ނިއުޝާ މިއަދު ފޮނުއްވި ސިޓީއަކުންނެވެ. މަޖިލީހުގެ ގަވައިދާ ހަވާލާ ދެއްވައި ނިއުޝާ އެ ސިޓީގައި ވިދާޅުވީ ނަޝީދުގެ އިތުބާރު ނެތް ކަމުގެ މައްސަލައެއް 49 މެމްބަރުން ސޮއިކުރައްވައި ހުށަހަޅާފައި ވާތީ، ގަވައިދުގައި ބުނާ މުއްދަތު ދިނުމަށް ފަހު އަންނަ އެންމެ ފުރަތަމަ، ރަސްމީ ބަންދުނޫން ދުވަހަށް އެ މައްސަަލަ އެޖެންޑާކުރަން ޖެހޭ ކަމަށެވެ.
މަޖިލީހުގެ ގަވައިދުގެ 205 ވަނަ މާއްދާގައިވާ ގޮތުން އިތުބާރުނެތް ކަމަށް ކަނޑައަޅަން ހުށަހަަޅާ ގަރާރުތައް މަޖިލީހުގެ އިދާރާއަށް ލިބޭތާ ތިން ދުވަހުގެ ތެރޭގައި އެ މައްސަލައިގެ ނޯޓިސް މެމްބަރުނަށް ފޮނުވަން ޖެހެ އެވެ.
ނަޝީދު ވަކިކުރުމުގެ މައްސަލައިގެ ނޯޓިސް މަޖިލީހުގެ އިދާރާއިން މެމްބަރުންނަށް ފޮނުވީ މިމަހުގެ 12 ވަނަ ދުވަހު އެވެ.
ނޯޓިސް ދިނުމަށް ފަހު ބަންދު ދުވަސްތައް ނުހިމަނައި 14 ދުވަހުގެ މުުހުލަތެއް ދިނުމަށް ފަހު މައްސަލަ އެޖެންޑާކުރަން ޖެހޭނެ ކަމަށް ވެސް މަޖިލީހުގެ ގަވައިދުގެ އެ މާއްދާގައި އޮވެ އެވެ. އަންނަ އާދީއްތަ ދުވަހަށް ނަޝީދުގެ މައްސަލަ އެޖެންޑާކުރައްވަން އަމީން އާއްމު ނިންމެވީ ސިޓީގައި ވިދާޅުވެފައިވާ ގޮތުގައި އެހެންވެ އެވެ.
މަޖިލީހުގެ އާއްމު ކޮމިޓީން ނިންމާފައި އޮތީ އެ މަައްސަލާގައި ޖަވާބުދާރީ ވެވަޑައިގަންނަވަން ނަޝީދަށް ޖުމްލަ 30 މިނެޓް އެރުވުމަށެވެ. އެއީ ބަހުސް ފެށުމުގެ ކުރިން 10 މިނެޓް، ބަހުސުގެ މެދުތެރެއިން 10 މިނެޓް އަދި ބަހުސް ނިންމުމުގެ ގޮތުން އަރުވާ 10 މިނެޓެވެ.
ދެގަޑިއިރަށް ފައްތައިގެން އެ މައްސަލަ ކުރިއަށް ގެންދާ އިރު ޖަވާބުދާރީ ވެވަޑައިގެންނެވުމަށް ނަޝީދަށް ލިބިވަޑައިގަންނަވާ 30 މިނެޓް ފިޔަވައި އެެހެން ހުރިހާ ވަގުތެއް ބަހައިލާނީ މެމްބަރުން ބަހުސްކުރެއްވުމަށެވެ.
ނަޝީދުގެ އިތުބާރު ނެތްކަމަށް ކަނޑައަޅައި މަޖިލީހުގެ ރައީސްކަމުން ވަކިކުރަން އެމްޑީޕީން މީގެ ކުރިން ވެސް ހުށަހެޅި އެވެ. އެހެން ނަމަވެސް ރިޔާސީ އިންތިހާބުގެ ފުރަތަމަ ބުރަށް ފަހު އެ މައްސަަލަ އަނބުރާ ގެންދިޔަ އެވެ.
އެގޮތަށް ކަންތައް ކޮށްފައި ވާތީ މިފަހަރުގެ މައްސަލަ ބަލައިގަންނަން ދަތިވާނެ ކަމަށް ނަޝީދު ފުރަތަމަ އިޝާރާތް ކުރެއްވި އެވެ.
ރައްޔިތުންގެ މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖެއްގައި ނަޝީދު ވިދާޅުވީ އެމަނިކުފާނުގެ އިތުބާރު ނެތްކަމުގެ މައްސަލައެއް ދެން ކުރިއަށް ގެންދެވޭނެ ކަމަށް ބެލެވެނީ އަންނަ ދައުރުގައި ކަމަށެވެ. އެއީ މީގެ ކުރިން އެފަދަ މައްސަލައެއް މި ދައުރުގައި ހުށަހަޅައި، އަނބުރާ ގެންގޮސްފައިވާތީ ކަމަށް ނަޝީދު ވިދާޅުވި އެވެ.
އެހެން ނަމަވެސް މަޖިލީހުން ފަހުން ނިންމީ އެ މައްސަަލަ ކުރިއަށް ގެންދާށެވެ.
