ލަންޑަން (އޮކްޓޫބަރު 22) - އިނގިރޭސި ޕްރިމިއާ ލީގުގައި ބްރައިޓަން އަތުން 2-1 އިން މޮޅުވެ، މެންޗެސްޓާ ސިޓީން ލީގުގެ އެއް ވަނަ އަށް ޖެހިލިއިރު، ދެ ލަނޑުގެ ލީޑެއް ނަގާފައި އޮތް ޗެލްސީއާ ދެކޮޅަށް އާސެނަލުން ފަހު ވަގުތު 2-2 އިން އެއްވަރުކޮށްފި އެވެ.
ރޭގެ ނަތީޖާ ތަކަށް ފަހު ސިޓީ އެއް ވަނައިގައި އޮތީ ދެ ވަނައިގައި އޮތް އާސެނަލާ އެއްވަރަށް ނުވަ މެޗުން 21 ޕޮއިންޓް ހޯދައިގެންނެވެ. ތިން ވަނައިގައި އޮތް ލިވަޕޫލާއި ހަތަރެއްގައި އޮތް ޓޮޓެންހަމް އަށް ވަނީ 20 ޕޮއިންޓް ލިބިފަ އެވެ. ލިވަޕޫލުން ވަނީ ރޭ އަމިއްލަ ދަނޑުގައި 2-0 އިން އެވަޓަން ބަލިކޮށްފަ އެވެ. ލިވަޕޫލުން ނުވަ މެޗު ކުޅެފައިވާއިރު، ޓޮޓެންހަމް އިން ކުޅެފައިވަނީ އަށް މެޗެވެ.
ސިޓީ މޮޅުވީ ރޭގެ މެޗުގެ ފުރަތަމަ ހާފުގައި ޖެހި ގޯލުތަކުންނެވެ. އެ ޓީމަށް ފުރަތަމަ ލަނޑު ޖަހައިދިނީ މި ސީޒަނުގައި ރަނގަޅު ފޯމެއްގައި ހުރި ހޫލިއަން އަލްވަރޭޒް އެވެ. އަދި އާލިން ބްރައުޓް ހާލަންޑް ވަނީ ސިޓީގެ ދެ ވަނަ ގޯލު ޖަހައިފަ އެވެ. ދެ ވަނަ ހާފުގައި ބްރައިޓަންގެ ހަމައެކަނި ގޯލު ޖެހީ ބާސެލޯނާގެ ލޯން އެއްބަސްވުމެއްގެ ދަށުން އެ ޓީމަށް ކުޅެމުން އަންނަ އަންސޫ ފާޓީ އެވެ.
އާސެނަލް ކޮޅަށް ރޭގެ މެޗުގެ ފުރަތަމަ ހާފުގައި ޗެލްސީން ލީޑުނެގީ ޕެނަލްޓީއަކުން ކޯލް ޕާމާ ޖެހި ގޯލުންނެވެ. މިއީ އާސެނަލްގެ ޑިފެންޑަރު ވިިލިއަމް ސަލީބާ އަތުގައި ބޯޅަ ޖެހުނު ކަމަށް، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން ޕެނަލްޓީ އެެކެވެ. ދެ ވަނަ ހާފުގެ ކުރީކޮޅުގައި މިކައިލޯ މުޑްރިކް ޖެހި މޮޅު ގޯލުން ޗެލްސީން ލީޑު ފުޅާކުރި އެވެ. މުޑްރިކް މި ލަނޑު ޖެހީ އާސެނަލްގެ ކީޕަރު ޑޭވިޑް ރާޔާ އަތްމަތިންނެވެ. މިއީ މުޑްރިކް ޗެލްސީ ދަނޑުގައި ލީގުގައި ޖެހި ފުރަތަމަ ގޯލެވެ.
ޗެލްސީ މޮޅުވާން ދަނިކޮށް އާސެނަލުން އެއްވަރުކުރީ ފަހު ވަގުތު އެވެ. އެ ގޮތުން 77 ވަނަ މިނިޓްގައި އާސެނަލްގެ ފުރަތަމަ ލަނޑު ޖެހީ ކުރިން ޗެލްސީ ޔޫތު ޓީމަށް ކުޅުނު ޑެކްލަން ރައިސް އެވެ. އަދި އޭގެ ހަތް މިނިޓް ފަހުން، ބުކާޔޯ ސަކާ ދިން ބޯޅައަކުން އާސެނަލަށް އެއްވަރުކޮށްދިނީ ލެއަންޑްރޯ ޓްރޮސާޑް އެވެ.
އެޝްލީ ޔަންގް އަށް ދެއްކި ރަތް ކާޑުގެ ސަބަބުން އެވަޓަން އިން ލިވަޕޫލް ދަނޑުގައި ކުޅުނު މެޗުގެ ބޮޑުބައި ކުޅެން ޖެހުނީ ކުޅުންތެރިއަކު މަދުކޮށެވެ. ލިވަޕޫލުން ދެ ގޯލު ޖެހީ ވެސް މެޗުގެ ދެ ވަނަ ހާފުގަ އެވެ. އެ ގޮތުން، 75 ވަނަ މިނިޓްގައި މުހައްމަދު ސަލާހު ލިވަޕޫލްގެ ފުރަތަމަ ލަނޑު ޖެހީ ޕެނަލްޓީ އަކުންނެވެ. މިއީ އެވަޓަންގެ ޑިފެންޑަރު، މައިކަލް ކީން އަތުގައި ބޯޅަ ޖެހުމުން، ވީއޭއާރް އިން ބަލާފައި ދިން ޕެނަލްޓީ އެކެވެ. ލިވަޕޫލްގެ ދެ ވަނަ ގޯލު، ސަލާހު ޖެހީ މެޗުގެ އިތުރު ވަގުތުގައި ކައުންޓަ އެޓޭކެއްގައި ޑާވިން ނޫނޭޒް ދިން ބޯޅައަކުންނެވެ.
ޝެފީލްޑް އަތުން 2-1 އިން މެންޗެސްޓާ ޔުނައިޓެޑް މޮޅުވިއިރު، މި މެޗުގައި ޔުނައިޓެޑަށް ލީޑުނަގައިދިނީ ސްކޮޓް މެކްޓޮމިނޭ އެެވެ. އެކަމަކު، މެކްޓޮމިނޭ އަތުގައި ޖެހުނު ބޯޅައަކަށް ދިން ޕެނަލްޓީ އަކުން ޝެފީލްޑުން އެއްވަރުކުރި އެވެ. މި ޕެނަލްޓީ ކާމިޔާބުކުރީ ޝެފީލްޑްގެ އޮލީ މެކްބާނީ އެވެ. ދެ ވަނަ ހާފުގައި ޔުނައިޓެޑް މޮޅުކޮށްދިން ގޯލު ޖެހީ ޑިއޯގޯ ޑަލޯ އެވެ.
ލީގުގައި ރޭ ނިއުކާސަލް ޔުނައިޓެޑުން 4-0 އިން ކްރިސްޓަލް ޕެލަސް ބަލިކުރިއިރު، ބޯންމައުތު އަތުން ފަހަތުން އަރައި 2-1 އިން ވުލްވްސް ވަނީ ކުރިހޯދައިފަ އެވެ. ބްރެންޓްފޯޑުން 3-0 އިން ބާންލީ ބަލިކުރިއިރު، ލޫޓަން ޓައުން އާއި ނޮޓިންހަމް ފޮރެސްޓް ވަނީ 2-2 އިން އެއްވަރުވެފަ އެެވެ.
