އިޒްރޭލުން ގާޒާގައި ކުރިއަށް ގެންދަމުންދާ ގަތުލްއާމު ހުއްޓުވާ މެދުއިރުމަތީގައި ސުލްހަ ގާއިމުކުރުމަށް މިސްރުގެ ވެރިރަށް ކައިރޯގައި މިއަދު ފަށާ ސުލްހައިގެ މަހާސިންތާގައި ބައިވެރިނުވާން އެމެރިކާ އަދި އިޒްރޭލުން ނިންމައިފި އެވެ.
"ކައިރޯ ޕީސް ސަމިޓު" ނަމުގައި ކުރިއަށް ގެންދާ މި ސަމިޓުގައި އަރަބި ދުނިޔޭގެ ގިނަ ގައުމުތަކާއި ދުނިޔޭގެ ބޮޑެތި ބާރުތަކުގެ އިތުރުން ބައިނަލްއަގުވާމީ ޖަމާއަތްތައްވެސް ބައިވެރިވާނެ އެވެ.
މި މަހާސިންތާއާ ގުޅޭގޮތުން މިސްރުގެ ފޮރިން މިނިސްޓަރު ސަމީ ޝޫކްރީ ވިދާޅުވީ، މުޅި ސަމިޓުގެ މައިގަނޑު ފޯކަސްއަކަށް ވެގެންދާނީ އިޒްރޭލާއި ފަލަސްތީނުގެ ހަމާސް ޖަމާއަތާ ދެމެދު ބަދަލުކުރެވެމުންދާ ހަމަލާތައް ހުއްޓާލުން ކަމަށެވެ.
އަދި، އިޒްރޭލާ އެމެރިކާ ބައިވެރި ނުވި ނަމަވެސް، ހިސާރުކޮށްފައިވާ ގާޒާއަށް އިންސާނީ އެހީ ފޯރުކޮށްދިނުމުގެ ފުރުސަތު ހޯދުމާމެދު މަޝްވަރާ ކުރެވޭނެ ކަމަށްވެސް އޭނާ ބުންޏެވެ. ނަމަވެސް ގާޒާއަށް އިންސާނީ އެހީ ފޯރުކޮށްދިނުމަށް މިހާތަނަށް އދ. ގެ ސަލާމަތީ ކޮމިޓީއަށް ހުށަހެޅި ދެ ގަރާރުވެސް އެމެރިކާއިން ވަނީ ވީޓޯ ކޮށް ބޭރުކޮށްލާފަ އެވެ.
މި މަހުގެ ހަތްވަނަ ދުވަހު ފެށި ގަތުލުއާންމު ފެށިތާ ތިންވަނަ ދުވަހު އިޒްރޭލުން ވަނީ ގާޒާއަށް ފޯރުކޮށްދެމުންދިޔަ ފެނާއި ކަރަންޓު ކަނޑާލާ ކާބޯތަކެތި އެތެރެކުރުން ހުއްޓުވާފަ އެވެ. މިސްރާއި ގާޒާ އާ ދެމެދު އޮންނަ ރަފާހް ބޯޑަރުގައި އެހީގެ ލޮރީތައް ފުނި ޖެހުނު ނަމަވެސް، އިޒްރޭލުން ވަނީ ބޯޑަރު ހުރަސްކޮށްފި ނަމަ ހަމަލާދޭނެ ކަމަށް ބުނެފަ އެވެ.
ހަމަލާތައް ހުއްޓާލާ ސުލްހަ ގާއިމުކުރުމަށާއި އިޒްރޭލަށް އޮތް ތާއީދު ދެއްކުމަށް އެމެރިކާގެ ރައީސް ޖޯ ބައިޑަން ވަނީ މިދިޔަ ހަފުތާގައި އިޒްރޭލަށް ވަޑައިގެންފަ އެވެ. ބައިޑެންގެ ދަތުރުގައި އުރުދުންގައި މިސްރު އަދި ފަލަސްތީނުގެ ރައީސުންނާއެކު މަޝްވަރާ ކުރަން ރާވާފައި އޮތް ނަމަވެސް، އިޒްރޭލުން ގާޒާގެ ހޮސްޕިޓަލަކަށް ދިން ހަމަލާއަކާއެކު އުރުދުން އިން ވަނީ އެ ދަތުރު ކެންސަލްކޮށްފަ އެވެ.
އިޒްރޭލުން ގާޒާއަށް މިހާރު ދެމުންދާ ހަމަލާތަކުގައި މިހާތަނަށް 4،000 އަށްވުރެ ގިނަ މީހުން ޝަހީދުވެފައިވާ ކަމަށް ރިޕޯޓުތައް ބުނެފި އެވެ.
ގާޒާގެ ސިއްހަތާ ބެހޭ ވުޒާރާގެ ތަރުޖަމާނު އަޝްރަފް އަލް ކުދްރާ ވިދާޅުވީ އިސްރާއީލުން ގާޒާއަށް ދިން ހަމަލާތަކުގައި މިހާތަނަށް 4،137 މީހުން ވަނީ ޝަހީދުވެފައި ކަމަށެވެ. އޭގެ ތެރޭގައި 1،661 ކުޑަކުދިން ހިމެނެ އެެވެ.
އޭނާ ހާމަކުރެއްވި ގޮތުގައި ހަމަލާތަކުގައި ގެއްލިގެން ހޯދަމުންދާ މީހުންނާ ގުޅޭ ގޮތުން އޮފިޝަލުންނަށް 1،400 އިންކުއަރީ ލިބިފައިވާއިރު އޭގެ ތެރޭގައި 720 ކުޑަކުދިން ހިމެނެ އެވެ. އަދި ޒަހަމްވެގެން 13،260 މީހުންނަށް ފަރުވާ ދެމުން އަންނަ ކަމަށް ވެސް ވިދާޅުވި އެވެ.
