ޕޫނޭ، އިންޑިއާ (އޮކްޓޫބަރު 20) - އައިސީސީ ވަންޑޭ އިންޓަނޭޝަނަލް (އޯޑީއައި) ކްރިކެޓް ވޯލްޑް ކަޕްގައި ވިރާތު ކޯލީގެ ސައްތައާ އެކު، ރޭ ހަތް ވިކެޓުން ބަންގްލަދޭޝް ބަލިކޮށް އިންޑިއާ މި ފަހަރުގެ މުބާރާތުގައި ހުރިހާ މެޗަކުން މޮޅުވުމުގެ ރެކޯޑް ދަމަހައްޓައިފި އެވެ.
އިންޑިއާގައި ކުރިއަށްދާ މި ފަަހަރުގެ ވޯލްޑް ކަޕްގައި ހުރިހާ މެޗަކުން މޮޅުވުމުގެ ރެކޯޑް އޮތީ އިންޑިއާގެ އިތުރުން ނިއު ޒީލެންޑް އަތުގަ އެވެ.
ޕޫނޭގެ މަހަރާޝްތުރަ ކްރިކެޓް އެސޯސިއޭޝަން ސްޓޭޑިއަމްގައި ރޭ ކުޅުނު މެޗުގައި ޓޮސް ދިމާވުމުން ބަންގްލަދޭޝް އިން ނިންމީ ކުޅެން އަރާށެވެ. އެ ގޮތުން، 50 އޯވަރުގެ ތެރޭގައި އަށް ކުޅުންތެރިން ނުބައިވެެގެން ބަންގްލަދޭޝަށް އެއްކުރެވުނީ 256 ލަނޑެވެ. އެ ޓީމަށް އެންމެ ރަނގަޅަށް ކުޅުނީ އޯޕަނިން ބެޓްސްމަނުންގެ ގޮތުގައި ނުކުތް ލިޓޯން ދާސް އާއި ތަންޒީދު ހާން އެވެ. ދާސް ވަނީ 66 ލަނޑު އެއްކޮށްފަ އެވެ. އަދި ތަންދީދަށް ހެދުނީ 51 ލަނޑެވެ.
މި އިނިންގްސްގައި އިންޑިއާގެ ބޯލަރުން ކަމަށްވާ ޖަސްޕްރީތު ބުމްރާ އާއި މުހައްމަދު ސިރާޖު އަދި ރަވިންދުރަ ޖަދޭޖާ، ކޮންމެ ކުޅުންތެރިއަކު ދެ ވިކެޓް ނެގި އެވެ.
ޖަވާބުގައި ކުޅެން އަރައި، އިންޑިއާ މޮޅުވީ 41.3 އޯވަރުގެ ތެރޭގައި 261 ލަނޑު އެއްކޮށްގެންނެވެ.
އިންޑިއާ އިން އޯޕަނިން ބެޓްސްމަނުންގެ ގޮތުގައި ކުޅެން އެރި ކެޕްޓަން، ރޯހިތު ޝަރްމާ 48 ލަނޑު ހެދިއިރު، ޝުބްމަން ގިލް ވަނީ 53 ލަނޑު ހަދައިފަ އެެވެ. އެ ފަހުން، ކުޅެން އެރި ވިރާތު ވަނީ ނުބައިނުވެ، 97 ބޯޅައިން 103 ލަނޑު ހަދައިފަ އެވެ.
މެޗަށް ފަހު ވިރާތު ބުނީ، އިންޑިއާ އިން މި ފަހަރުގެ ވޯލްޑް ކަޕަށް ވި ތައްޔާރީތައް ރަނގަޅުކަން މެޗަކަށް ފަހު މެޗެއް ފެންނަމުންދާ ކަމަށާއި މުޅި ޓީމުން އަމިއްލަ ސަޕޯޓަރުންގެ ކުރިމަތީގައި ފޯކަސް ގެއްލުވައިނުލައި ދައްކާ ކުޅުމަށް ތައުރީފު ހައްގު ކަމަށެެވެ.
