މިދިޔަ ހުކުރު ދުވަހު ހއ. ވަށަފަރުން ފުރައިގެން އެ އަތޮޅު ދިއްދޫއަށް 10 މީހުންނާ އެކު ދަތުރުކުރި ލޯންޗެއް ދިއްދޫ ނެރު މައްޗަށް ބަންޑުން ޖަހާލި ހާދިސާގައި އަނިޔާވި އެންމެން ހޮސްޕިޓަލުން ދޫކޮށްލައިފި އެވެ.
ދިއްދޫ ކައުންސިލުގެ ރައީސް އަބްދުالله ރަޝީދު މިއަދު 'އަދަދު' އަށް ވިދާޅުވީ، އެ ހާދިސާގައި އަނިޔާ ލިބުނު އެންމެންނަށް ވެސް ފަރުވާ ދިނުމަށްފަހު މިހާރު ދޫކޮށްލާފައިވާ ކަމަށެވެ.
އަދި, ހާދިސާ ހިނގަން މެދުވެރިވި ސަބަބު ކައުންސިލަށް ސާފުނުވާ ކަމަށާއި، ބޮޑަށް ލަފާކުރެވެނީ ލޯންޗު ދިއްދޫއަށް ވަންނަން އުޅުމުގެ ތެރޭގައި ބަންޑުންޖަހާލީ ކަމަށް ކައުންސިލް ރައީސް ފާހަގަކުރެއްވި އެވެ.
"އެންމެން މިހާރު ދޫކޮށްލައިފި، ލޯންޗު ވަންނަން އުޅުމުގެ ތެރޭގަ ބަންޑުންޖަހާލީ ކަމަށް ބެލެވެނީ،" އަބްދުالله ރަޝީދު ވިދާޅުވި އެވެ.
މި ލޯންޗު ބަންޑުން ޖަހާލީ ހުކުރު ދުވަހުގެ ރޭ 9:00 ހާއިރު އެވެ. މި ހާދިސާގައި ލޯންޗުން ދަތުރުކުރި 10 މީހުންނަށް ވެސް އެކިވަރުގެ އަނިޔާ ލިބުނެވެ. ހާދިސާ ހިނގި އިރު ލޯންޗުގައި ތިބީ ހުސް ވަށަފަރު ރައްޔިތުން ކަމަށް އަބްދުالله ރަޝީދު ވިދާޅުވި އެވެ.
ފުލުހުން އަންނަނީ މި މައްސަލަ ތަހުގީގު ކުރަމުންނެވެ.
