އަމްސްޓެޑަމް (އޮކްޓޫބަރު 14) - އަންނަ އަހަރު ޖަރުމަންގައި އޮންނަ ޔޫރޯ ފުޓްބޯޅަ މުބާރާތުން ފްރާންސް، ބެލްޖިއަމް އަދި ޕޯޗުގަލް ޖާގަ ހޯދައިފި އެވެ.
ޔޫރޯ ފުޓްބޯޅަ މުބާރާތަށް ފުރަތަމަ ކޮލިފައިވި ތިން ގައުމަށް ފްރާންސާއި، ބެލްޖިއަމް އަދި ޕޯޗުގަލް ވެފައިމިވަނީ ކޮލިފައިންގައި ރޭ ކުޅުނު މެޗުތައް ކާމިޔާބު ކޮށްގެންނެވެ. ފްރާންސް މޮޅުވީ ނެދަލެންޑްސް އަތުން 2-1 އިންނެވެ. ބެލްޖިއަމް އޮސްޓްރިއާ އަތުން 3-2 އިން މޮޅުވިއިރު، ޕޯޗުގަލް މޮޅުވީ ސްލޮވާކިއާ އަތުން 3-2 އިންނެވެ.
ނެދަލެންޑްސް އަތުން ފްރާންސް މޮޅުވުމާ އެކު އެ ޓީމު ވަނީ ކޮލިފައިންގައި ކުޅުނު ހަ މެޗުވެސް ކާމިޔާބުކޮށް 18 ޕޮއިންޓް ހޯދައިފަ އެވެ. މި ގްރޫޕްގެ ދެ ވަނައިގައި އޮތީ 12 ޕޮއިންޓާ އެކު ގްރީސް އެވެ. އެއް މެޗު މަދުން ކުޅެފައިވާ ނެދަލެންޑްސް އޮތީ ނުވަ ޕޮއިންޓާ އެކު ތިން ވަނައިގަ އެވެ.
ފްރާންސް ރޭ ކުޅުނު މެޗުން އެ ޓީމް މޮޅުވީ ކީލިއަން އެމްބާޕީ ޖެހި ދެ ގޯލުންނެވެ. މި ދެ ގޯލާ އެކު ފްރާންސްގެ ގައުމީ ޓީމަށް އޭނާ ޖެހި ގޯލުގެ އަދަދު ވަނީ 42 އަށް އަރައިފަ އެވެ. ފްރާންސްގެ ގައުމީ ޓިމަށް އެންމެ ގިނަ ގޯލު ޖެހި ކުޅުންތެރިންގެ ލިސްޓުގެ ހަތަރު ވަނަ އަށް އޭނާ ވަނީ ޖެހިފަ އެވެ. އެމްބާޕޭ އަށް ވުރެ ކުރީގައި މި ލިސްޓުގައި އޮތީ އެންޓޮއިން ގްރީޒްމަން (44)، ތިއެރީ އޮންރީ (51) އަދި އޮލިވިއޭ ޖިރޫ (54) އެވެ.
ސްލޮވާކިއާ އަތުން ޕޯޗުގަލް މޮޅުވި މެޗުގައި ކެޕްޓަން ކްރިސްޓިއާނޯ ރޮނާލްޑޯ ވަނީ ދެ ގޯލު ޖަހައިފަ އެވެ. މި ދެ ގޯލާ އެކު އޭނާ ގައުމީ ޓީމަށް ޖެހި ގޯލުގެ އަދަދު ވަނީ 125 އަށް އަރައިފަ އެވެ. މެޗުގައި ޕޯޗުގަލްގެ އަނެއް ގޯލު ޖަހައިދިނީ ގޮންކާލޯ ރާމޯސް އެވެ. ސްލޮވާކިއާގެ ދެ ގޯލު ޖަހައިދިނީ ޑޭވިޑް ހެންކޯ އަދި ސްޓަނިސްލާވް ލޮބޮޓްކާ އެވެ.
ބެލްޖިއަމް އޮސްޓްރިއާ އަތުން މޮޅުވި މެޗުގައި ފުރަތަމަ ތިން ގޯލު ޖެހީވެސް ބެލްޖިއަމުންނެވެ. މި ތިން ގޯލުގެ ތެރެއިން ދެ ގޯލު ޖަހައިދިނީ ޑޮޑީ ލުކެބެކިއޯ އެވެ. މިއީ ލުކެބެކިއޯ ބެލްޖިއަމްގެ ގައުމީ ޓީމަށް ގޯލު ޖެހި ފުރަތަމަ ފަހަރެވެ. ބެލްޖިއަމްގެ އަނެއް ގޯލު ޖަހައިދިނީ ރޮމެލޫ ލުކާކޫ އެވެ. އޮސްޓްރިއާގެ ދެ ގޯލު ޖަހައިދިނީ ކޮންރަޑް ލައިމާ އާއި މާސެލް ސަބިޓްޒާ އެވެ. ސަބިޓްޒާ ގޯލު ޖެހީ ޕެނަލްޓީ އަކުންނެވެ.
ޔޫރޯ ކޮލިފައިންގެ މެޗުތައް މިރޭ ވެސް ކުރިއަށްދާނެ އެވެ. މިގޮތުން މިރޭ ކުޅޭ މެޗުތަކަށް ބަލާއިރު އެންމެ ފޯރިގަދަވާނެ ކަމަށް ބެވެނީ ގްރޫޕް ޖީގައި ހަންގޭރީއާ ސާބިއާ ވާދަކުރާ މެޗެވެ. 10 ޕޮއިންޓާ އެކު ދެ ޓީމު ވެސް މިވަގުތު ގްރޫޕްގެ ކުރީގައި އޮތްއިރު، މި މެޗުން މޮޅުވާ ޓީމެއް ޔޫރޯ އަށް ކޮލިފައިވުމުގެ ފުރުސަތު ބޮޑުވާނެވެ.
