ވެރިކަން ބަދަލުކުރުމުގެ މަރުހަލާގައި ސަރުކާރުން ދެމުންދާ އެއްބާރުލުމާމެދު ހިތްހަމަޖެހިވަޑައިގަންނަވާ ކަމަށް އިންތިހާބީ ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ނޮވެމްބަރު 17 ވަނަ ދުވަހު ރައީސުލްޖުމްހޫރިއްޔާގެ މަގާމާ ހަވާލުވެވަޑައިގަންނަވާ، ޕީއެންސީގެ ރައީސް ޑރ. މުއިއްޒު، ސަންގު ޓީވީއަށް ދެއްވި އިންޓަވިއުއެއްގައި ވިދާޅުވީ ރައީސް އޮފީހުން ވެސް، ސިވިލް ސާވިސް ކޮމިޝަނުން ވެސް އެއްބާރުލުން ދެމުންގެންދާ ކަމަށެވެ.
"ކުރުކޮށް ދަންނަވަންޏާ ހިތްހަމަ ޖެހޭ. ދެން އެންމެ ފުރިހަމައެއް ނުވާނެ ކަންނޭނެ. ރައީސް އޮފީހުން ހަމަ ވަރަށް ބޮޑު އެއްބާރުލުމެއް ދެއްވާތަން ފެނޭ. ސިވިލް ސާވިސް ކޮމިޝަނުން ވެސް އެއްބާރުލުން އެބަ ދެއްވަވާ،" އިންތިގާލީ މަރުހަލާއަށް ސަރުކާރުން ދޭ އެއްބަރުލުމާމެދު ހިތްހަމަ ޖެހޭތޯ ސުވާލު ކުރުމުން، އިންތިހާބީ ރައީސް ވިދާޅުވި އެވެ.
"[އިންތިގާލީ މަރުހަލާގެ މަސައްކަތް] ވަރަށް ރަނގަޅަށް ހިނގާ ކަމަށް އަޅުގަނޑު ދަންނަވާނީ."
އެ މަސައްކަތް ކުރިއަށް ގެންދާއިރު، ބައްދަލުވުންތަކަށް އެއްވެސް އޮފީހަކުން ވަގުތު ނުދިނުމާއި، މައުލޫމާތު ހިފެހެއްޓުން ފަދަ ކަމެއް ވެސް ދިމާ ނުވާކަން ޑރ. މުއިއްޒު ފާހަގަ ކުރެއްވި އެވެ. ކުރިއަށް މިއޮތް މަހެއްހާ ދުވަސްތެރޭގައި ވެސް އެ މަސައްކަތް ފުރިހަމައަށް ކުރިއަށް ގެންގޮސް ނިންމާލެވޭނެ ކަމަށް އުއްމީދު ކުރައްވާ ކަމަށް އެ މަނިކުފާނު ވިދާޅުވި އެވެ.
އިންތިގާލީ މަރުހަލާ ކޮމިޓީގެ ޑިރެކްޓަ ޖެނެރަލްއަކަށް ޕީއެންސީގެ ޗެއާޕާސަން، އަދި ރައްޔިތުންގެ މަޖިލީހުގެ ފޮނަދޫ ދާއިރާގެ ކުރީގެ މެމްބަރު އަބްދުއްރަހީމް އަބްދުﷲ އައްޔަންކޮށް، އާ ސަރުކާރު ވެރިކަމާ ހަވާލުވުމަށް ތައްޔާރުވުމުގެ ގޮތުން ކުރަންޖެހޭ ކަންކަން ކުރިއަށް ގެންދިޔުމަށް 15 ކޮމިޓީއެއް އެކުލަވާލައި، އޮފީސްތަކާ މިހާރު ދަނީ ބައްދަލު ކުރަމުންނެވެ.
ސެޕްޓެމްބަރު 30 ގައި ބޭއްވި ރިޔާސީ އިންތިހާބުގެ ދެ ވަނަ ބުރުގައި ރައީސް އިބްރާހިމް މުހައްމަދު ސޯލިހާ ވާދަ ކުރައްވައި މުއިއްޒު ކުރި ހޯއްދެވީ 54 ޕަސެންޓު ވޯޓުންނެވެ.
