ޖުޑީޝަލް ސާވިސް ކޮމިޝަން (ޖޭއެސްސީ) ގެ އެކުލެވުން ބަދަކުރުމަށްޓަކައި ސަރުކާރުގެ ފަރާތުން ހިތަދޫ އުތުުރު ދާއިރާގެ އެމްޑީޕީ މެމްބަރު އަދި މަޖިލީހުގެ މެޖޯރިޓީ ލީޑަރު މުހައްމަދު އަސްލަމް ހުށަހެޅުއްވި ބިލުގެ ބަހުސް ވެސް އެމްޑީޕީ އާއި އެޕާޓީން ބަޔަކު ވަކިިވެގެން އުފެއްދި ދަ ޑިމޮކްރެޓްސްގެ އަރައިރުމަކަށް ވެއްޖެ އެވެ.
ޖޭއެސްސީގެ އޮނިގަނޑު ބަދަލުކުރާ ބިލުގެ ބަހުސް މިއަދު ފެށުމާ އެކު ޑިމޮކްރެޓްސްގެ މެމްބަރުން އެ ބިލަށް ފާޑުވިދާޅުވާން ފެށްޓެވީ ޖޭއެސްސީ ސިޔާސީވާ މައިގަނޑު ސަބަބަކީ ރައްޔިތުންގެ މަޖިލީހުގެ ރައީސް އެކޮމިޝަނުގައި އިންނެވުން ކަމަށް މަރަދޫ ދާއިރާގެ އެމްޑީޕީ މެމްބަރު އިބްރާހީމް ޝަރީފު ވިދާޅުވުމުންނެވެ. އެ ބިލު މަޖިލީހަށް ހުށަހެޅީ ޖޫން 19، ގައި ކަމަށް ވާއިރު މިހައިތަނަށް އެ ބިލުގެ މަސައްކަތް ނުހިނގާ އޮތުމުން އެކަމުުގެ ކަންބޮޑުވުން ވެސް ޝަރީފް ފާޅުކުރެއްވި އެވެ.
"މި މަޖިލީހުގެ ރިޔާސަތުން، ޖުޑިޝަރީީ އިސްލާހުވިޔަ ނުދިނުމަށް، ރެއާ ދުވާލު އެމަނިކުފާނު ނިސްބަތްވާ ޕާޓީން، ޖުޑިޝަރީއަށް އަތް ބާނާ ވާހަކަ އާއި ސަރުކާރުން ޖުޑިޝަރީއަަށް ނުފޫޒު ފޯރުވާ ވާހަކަ ދައްކަމުން، ރައްޔިތުންނަށް އޮޅުވައިލަމުން، ބަހުސްކުރަމުން އެހެން ނަމަވެސް މި [ބިލު] މަޖިލީހަށް ބަހުސްކުރަން ނުގެންނަވައި އިންތިހާބު ނިމެންދެން އޮތް އޮތުން ވެސް އެއީ ވިސްނައިލަން ޖެހޭ ކަމެއް،" ޝަރީފް ވިދާޅުވި އެވެ.
އެ ވާހަކައަށް ރައްދު ދެއްވަމުން މާފަންނު މެދު ދާއިރާގެ ޑިމޮކްރެޓްސް މެމްބަރު އިބްރާހީމް ރަޝީދު (ބޮންޑޭ) ތުހުމަތު ކުރެއްވީ ސަރުކާރުން އެ ބިލު ހުށަހެޅީ ރައްޔިތުންގެ މަޖިލީހުގެ ރައީސަކަށް މިވަގުތު ރައީސް މުހައްމަދު ނަޝީދު ހުންނެވުމުން، ޖޭއެސްސީން އެމަނިކުފާނު ބޭރުކުމުގެ މަގުސަދުގައި ކަަމަށެވެ. އެގޮތަށް ވިސްނައިގެން ބިލު އެކުލަވައިލުމުން ބިލު އޮތީ އަމިއްލަ ލޯފާމަކަށް ޖުޑީޝަރީ "އައުޓްސޯސް ކުރެވޭ" ފަދަ ގޮތަކަށް ކަމަށް އޭނާ ސިފަކުރެއްވި އެވެ.
ހުޅުމާލެ ދާއިރާގެ އެމްޑީޕީ މެމްބަރު އަދި ރައީސް އިބްރާހީމް މުހައްމަދު ސޯލިހުގެ ކޮއްކޯފުޅު އަލީ ނިޔާޒް ވިދާޅުވީ ޖޭއެސްސީގެ އެކުލެވުމަށް ބަދަލު ގެންނަން ސަރުކާރުން ހުށަހެޅި ބިލު އޮތް ގޮތުން ސިޔާސީ ނުފޫޒުން މުޅިން އެއްކިބާ ނުވިޔަސް، ބިލު އޮތީ އެ ނުފޫޒު ކުޑަވާ ގޮތަށް ކަމަށެވެ. ބިލު ހުށަހެޅީ ކޮމިޝަނުން ވަކި ބޭފުޅަކު ވަކިކުރަން ކަމަށް ބުނާ ބުނުމުގެ އެއްވެސް އަސާސެއް ނެތް ކަމަށް ވެސް އޭނާ ވިދާޅުވި އެވެ.
ޑިމިކްރެޓްސްގެ ވަގުތީ ޗެއާޕާސަން އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވީ ޖޭއެސްސީގެ އެކުލެވުން ބަދަލުކުރާ ބިލު ހުށަހަޅާފައި މިހާރު އޮތީ އެމްޑީޕީގެ މެނިފެސްޓޯގައި ވައުދުވެފައިވާ ގޮތަށް ނޫން ކަމަށެވެ.
ބިލުގައި ހުރި މާއްދާތަކުގެ ތެރެއިން އޭނާ އެންމެ ބޮޑަށް ދެކޮޅު ހެއްދެވީ ޖޭއެސްސީގައި ބައެއް ފަނޑިޔާރުން ތިއްބަވާ ގޮތަށް އޮތް އޮތުމާ އެވެ.
"އަޅުގަނޑަކަށް ގަބޫލެއް ނުކުރެވޭ ރާއްޖޭގެ މި ހާލަތު އޮތް ގޮތުންނާ އެކު، ފަނޑިޔާރުގެތަކުގައި ތިބި ފަނޑިޔާރުންނަށް، އެ ބޭފުޅުން [ފަނޑިޔާރުން] ކުރާ މަސައްކަތަށް ފާރަވެރި ވެވިދާނެ ކަމަކަށް،" ހަސަން ވިދާޅުވި އެވެ.
މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވިދާޅުވީ ވެސް ވިދާޅުވީ ޖޭއެސްސީ އިސްލާހުކުރުމުގެ ބިލު ސަރުކާރުން ހުށަހެޅީ ވަކި ބަޔަކަށް އަމާޒުކޮށްގެން ކަމަށެވެ.
