އެމްޑީޕީ ޕާލިމަންޓްރީ ގްރޫޕުގެ މެންބަރުންގެ ރޫހު ހުރީ މަޖިލިސް ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލައަށް ދޫ ދޭގޮތަށް ނޫން ކަމަށް އެ ގްރޫޕުގެ ލީޑަރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވެއްޖެ އެވެ.
މަޖިލިސް ރައީސްގެ އިތުބާރު ނެތްކަމުގެ މައްސަލަ ދެވަނަ ފަހަރަށް މަޖިލީހަށް ހުށަހެޅުމަށްފަހު މިއަދު އެމްޑީޕީ ޕީޖީ ގްރޫޕުގެ ފަރާތުން ބޭއްވި ނޫސްވެރިންގެ ބައްދަލުވުމުގައި އަސްލަމް ވިދާޅުވީ މި މައްސަލަ އަނބުރާ ގެންދަން އެއްވެސް ވަރަކަށް ޕާލިމަންޓްރީ ގްރޫޕުން ބޭނުން ނުވާ ކަމަށެވެ.
"ޕާލިމަންޓްރީ ގްރޫޕުގެ ރޫހެއް ނެތް މި މައްސަލަ އެއްވެސް ވަރަކަށް, އެއްވެސް ގޮތަކަށް ދެން ނަގާކަށް. ވަރަށް ސާފުކޮށް, ވަރަށް އެކަތިގަނޑަކަށް ބުނަމުން ގެންދަނީ މި މައްސަލަ ކުރިއަށް ގެންދަން ބޭނުން ކަމުގައި" އަސްލަމް ވިދާޅުވި އެވެ.
ނަޝީދުގެ އިތުބާރު ނެތް ކަމުގެ މައްސަލަ މަޖިލީހަށް ހުށަހެޅީ އެމްޑީޕީގެ 49 މެންބަރުންގެ ސޮއާއެކު އެވެ. އަސްލަމް ވިދާޅުވި ގޮތުގައި މި މައްސަލަ ދެވަނަ ފަހަރަށް ހުށަހެޅީ ގަރާރުގައި ސޮއިކުރަން ބޭނުންވެވަޑައިގެން ތިއްބެވި އެހެން ޕާޓީތަކަށް ނިސްބަތްވާ މެންބަރުންނާއި އަމިއްލަ މެންބަރުންގެ ވެސް ސޮއާ ނުލާ ކަމަށެވެ. އަދި ގަރާރުގައި ސޮއި ނުކުރެވުނު އެމްޑީޕީގެ ބައެއް މެންބަރުން ވެސް ތިއްބެވިކަން އަސްލަމް ފާހަގަކުރެއްވި އެވެ.
ނަޝީދުގެ އިތުބާރު ނެތް ކަމުގެ މައްސަލަ މަޖިލީހަށް ހުށަހެޅުމަށްފަހު އަނބުރާ ގެންދިޔައީ އެކަމަށް ވަރަށް ގިނަ މެންބަރުން އެދިވަޑައިގެންނެވުމުން ކަމަށާއި, އެއީ ބައެއް މެންބަރުން އެހާ ހިތްހަމަޖެހިވަޑައިގަންނަވާ ނިންމުމަކަށް ނުވުމުން ކަމަށް އަސްލަމް ވިދާޅުވި އެވެ. އޭނާ ފާހަގަކުރެއްވި ގޮތުގައި އޭރު މައްސަލަ އަނބުރާ ގެންދިޔަ އެއް ސަބަބަކީ މަޖިލިސް ރައީސް ނިސްބަތްވެވަޑައިގަންނަވާ ޑިމޮކްރެޓާއެކު ގުޅިގެން މަސައްކަތް ކުރުމަށް ޖާގަ ހޯދުމެވެ.
"މަޖިލީހުގެ ރައީސް ނިސްބަތްވެ ވަޑައިގަންނަވަނީ ދަ ޑިމޮކްރެޓަށް. އަޅުގަނޑުމެން ބެލީ ފުރަތަމަ ބުރަށްފަހު ޑިމޮކްރެޓާއެކު އަޅުގަނޑުމެންނަށް މަސައްކަތްތަކެއް ކުރެވިދާނެ ކަމަށް. އެ މަސައްކަތްތަކެއް ކުރެވޭނެ ޖާގައެއް ހޯދުމަށް އަދި އުއްމީދު ކުރީ މަޖިލީހުގެ ރައީސް މަޖިލީހުގެ ގަވައިދަށް ހުރުމަތްތެރިކޮށް ހިތްތަވާ, މަޖިލިސް ކުރިއަށް ގެންދަވާނެ ކަމަށް" އަސްލަމް ވިދާޅުވި އެވެ.
އެހެން ނަމަވެސް އެކަންކަން ފާހަގަ ނުވެ, މަޖިލީހުގެ ރައީސް އަމިއްލަ މަސްލަހަތު ކުރި ކަންކަމަށް އިސްކަން ދެއްވަމުން ގެންދެވި ކަމަށް އޭނާ ވިދާޅުވި އެވެ.
