ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން ހުށަހަޅަން އެމްޑީޕީން އުޅެނީ އިންތިހާބީ ރައީސް ޑރ. މުހައްމަދު މުއިއްޒު ހުވާކުރެއްވުމުގެ ރަސްމިއްޔާތަށް ހުރަސް އަޅަން ކަަމަށް ދަ ޑިމޮކްރެޓްސްގެ ބައެއް މެމްބަރުން ގެންދަވަނީ ތުހުމަތުކުރައްވަމުންނެވެ.
ދަ ޑިމޮކްރެޓްސްގެ ޕާލަމެންޓްރީ ގްރޫޕްގެ ލީޑަރު އަދި މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވީ ނަޝީދު ވަކިކުރަން މިވަގުތު ހުށަހަޅަނީ ހަމަ ސީދާ އެ ބޭނުމަށް ކަމަށް އޭނާ ގަބޫލުކުރައްވާ ކަމަށެވެ. އެހެން ނަމަވެސް އެ މައްސަލަ ފަސްކުރަން އޭނާގެ ޕާޓީން އެމްޑީޕީއާ މަޝްވަރާނުކުރާ ކަަމަށް ވެސް އާޒިމް ވިދާޅުވި އެވެ.
"އަޅުގަނޑު ގަބޫލުކުރަނީ ހަމަ ސީދާ އެ ބޭނުމަށް [އާ ރައީސް ހުވާކުރުމުގެ ރަސްމިއްޔާތަށް ހުރަސް އަޅަން] ކަމަށް އެ މައްސަލަ މިވަގުތު އެ ހުށަހަޅަނީ،" އާޒިމް މިއަދު "އަދަދު" އަށް ވިދާޅުވި އެވެ.
"ނަޝީދު ވަކިކުރުމަކުން ހުވާކުރުމުގެ ރަސްމިއްޔާތަށް އެޅޭނެ ހުރަހެއް ނެތް"
އާޒިމް އާއި ދަ ޑިމޮކްރެޓްސްގެ ބައެއް އެހެން ހަރަކާތްތެރިން އެގޮތަށް ތުހުމަތު ކުރާ އިރު ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަަރު އަލީ ނިޔާޒު ވިދާޅުވަނީ އެފަދަ ވިސްނުމެއް އެމްޑީޕީގެ ނެތް ކަމަށެވެ. އަލީ ނިޔާޒު "އަދަދު" އަށް މިއަދު ވިދާޅުވީ ނަޝީދު ވަކިކުރުމުގެ މައްސަލަ އަކީ އާ ރައީސް ހުވާކުރެއްވުމުގެ ރަސްމިއްޔާތަށް އެއްވެސް ހުރަހެއް އެޅޭނެ މައްސަލައެއް ނޫން ކަމަށެވެ.
"އިންތިހާބީ ރައީސް ހުވާކުރެއްވުމުގެ ރަސްމިއްޔާތަކީ މަޖިލީހުގެ އިދާރާއިން އިންތިޒާމުކުރާ ކަމެއް. މަޖިލީހުގެ ރައީސްގެ މަގާމުގައި ވަކި ބޭފުޅަކު ނެތުމަކުން އެ ރަސްމިއްޔާތަށް އެޅޭނެ ހުރަހެއް ނެތް. އަޅުގަނޑުމެންގެ އެ ވިސްނުމެއް ވެސް ނެތް،" އަލީ ނިޔާޒު ވިދާޅުވި އެވެ.
އޭނާ ވިދާޅުވި ގޮތުގައި މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ނިންމައި، މަޖިލީހުގެ ރައީސް ކަމަށް އެހެން ބޭފުޅަކު އިސްކުރާހާ ވަގުތު ވެސް ހުވާކުރުމުގެ ރަސްމިއްޔާތު ބާއްވާ ތާރީހާ މި ދެމެދު އަދި އެބަ އޮތެވެ.
ނަޝީދު ވަކިކުރަން މިފަހަރު ހުށަހަޅާ ސަބަބު ވެސް އޭނާ ތަފްސީލުކޮށްދެއްވި އެވެ.
"މަޖިލީހުގެ މެޖޯރިޓީ ރައްޔިތުން ދިނީ އެމްޑީޕީއަށް. ނަޝީދު މިހާރު އެވަނީ އާ ސަރުކާރުގައި އެމަނިކުފާނު ބައިވެރިވެވަޑައިގަންނަވާ ކަމަށް ވެސް ވިދާޅުވެފައި. އެހެންވީމާ މަޖިލީހުގެ ރިޔާސަތު އޮންނަން ޖެހޭނީ އެމްޑީޕީއަށް،" އަލީ ނިޔާޒު ވިދާޅުވި އެވެ.
އޭނާ ވިދާޅުވި ގޮތުގައި ނަޝީދުގެ އިތުބާރު ނެތް ކަމަށް ކަނޑައަޅަން އެމްޑީޕީން ފުރަތަމަ ހުށަހެޅި މައްސަލަ ކުރިއަށް ނުގެންދަވަން ނަޝީދު އޭރު ދެއްކެވި ސަބަބުތަކެއް ވެސް މިހާރަކު ނެތެވެ.
