އެމްޑީޕީ އާއި ދަ ޑިމޮކްރެޓްސްއާ ދެމެދު އާ އަރައިރުމެއް ފެށިއްޖެ އެވެ.
ރިޔާސީ އިންތިހާބު އެމްޑީޕީއަށް ގެއްލިގެން ދިޔައިރު، މަޖިލީހުގައި 55 މެމްބަރުންނާއެކު މެޖޯރިޓީ އޮތީ އެ ޕާޓީއަށެވެ. ނަމަވެސް މަޖިލީހުގެ ރިޔާސަތު އެ ޕާޓީއަށް ނެތުމުން، ބޭނުންވާ ގޮތަށް އެޖެންޑާ ކުރިޔަށް ގެންދަން ދަތިވާނެތީވެ، އެ ޕާޓީއަށް ރިޔާސަތު ހޯދުމުގެ ބޭނުމުގައި މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ހުށަހަޅަން ވަނީ ނިންމައިފަ އެވެ. އެ މައްސަލަ ހުށަހަޅާ އަނެއް ސަބަބަކީ، މަޖިލީހުގެ ރިޔާސަތުން މުހިންމު މަސައްކަތްތައް ދިގު ދަންމަމުން ކަމަށް އެމްޑީޕީގެ ބައެއް މެމްބަރުން ވިދާޅުވެ އެވެ.
އެހެންވެ، ނަޝީދުގެ އިތުބާރު ނެތްކަމުގެ މައްސަލަ ހުށަހަޅަން ރޭ ނިންމައި، ސޮއި ހޯދަން ވަނީ ފަށައިފަ އެވެ. އެ މަސައްކަތް ފެށިތާ ކުޑަ ވަގުތުކޮޅެއްގެ ތެރޭގައި، މައްސަލަ ހުށަހަޅަން ބޭނުންވާ އަދަދަށް ވުރެ އިތުރަށް ވެސް ސޮއި ހަމަކޮށްފައިވާކަން ވަނީ އެނގިފަ އެވެ.
އެ މައްސަލަ ހުށަހަޅަން އެމްޑީޕީން ނިންމުމާއެކު ޑިމޮކްރެޓުން ވަނީ ސޯޝަލް މީޑިއާގައި "ކެމްޕޭނެއް" ފަށައިފަ އެވެ. އެއީ މި ސަރުކާރުގެ މައްޗަށް ތުހުމަތުކުރާ ހިޔާނާތާއި ވައްކަމުގެ މައްސަލަތައް ބެލުމަށް، ގޮވާލުމެވެ.
މުހިންމު ބައެއް ހަބަރު
