ފަލަސްތީނުގެ ގައްޒާގައި ވެރިކަންކުރާ ހަމާސް ޖަމާއަތުން އިޒްރާއިލާ ދެކޮޅަށް މިއަދު ހެދުނުން ފެށިގެން ދެމުން ހަމަލާތަކާ ގުޅިގެން އިޒްރޭލުގައި ހަނގުރާމައިގެ ހާލަތު އިއުލާނުކޮށްފި އެވެ.
ހަމާސްގެ ހަމަލާތަށް ފެށުމަށްފަހު ދިން ފުރަތަމަ ވީޑިއޯ މެސެޖުގައި އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ ބުނީ ގައުމު މިވަގުތު އޮތީ ހަނގުރާމައިގެ ތެރޭގައި ކަމަށާއި ދުޝްމަނުންގެ މައްޗަށް ކުރިހޯދާނެ ކަމަށެވެ.
ބައިނަލްއަގުވާމީ މީޑިއާ ރިޕޯޓުތައް ބުނާގޮތުން ހަމާސްގެ ހަމަލާތަކުގައި މިހާތަނަށް އިޒްރޭލުގެ ހަ މީހަކު މަރާލާފައިވާއިރު، 200 އަށްވުރެ ގިނަ މީހުންނަށް ވަނީ އަނިޔާވެފަ އެވެ. އަދި، 35 އަށްވުރެ ގިނަ އިޒްރޭލުގެ ސިފައިން ވަނީ ހަމާސްގެ ބެލުމުގެ ދަށަށް ގެންގޮސްފަ އެވެ.
މަރުވި މީހުންގެ ތެރޭގައި އިޒްރޭލުގެ ރީޖަނަލް ކައުންސިލެއްގެ ރައީސެއްވެސް ހިމެނެ އެވެ. އެ ގައުމުގެ އޮފިޝަލުން މައުލޫމާތު ދޭ ގޮތުގައި ހެނދުނުން ފެށިގެން މިހާތަނަށް ގައްޒާއިން ލޯންޗުކޮށްފައިވާ ރޮކެޓުގެ އަދަދު 2،500 އަށްވުރެ ގިނަ އެވެ.
އޭގެ ތެރެއިން ގިނަ ރޮކެޓުތައް އިޒްރޭލުގެ އެންޓި މިސައިލް ސިސްޓަމް 'އަޔަން ޑޯމް' އިން ގޮއްވާލި ނަމަވެސް ބައެއް ރޮކެޓުތައް ވަނީ އިޒްރޭލުގެ އާންމުން ދިރިއުޅޭ އެކި ހިސާބުތަކަށް ވެއްޓި ގޮވާފަ އެވެ. އިޒްރޭލުގެ އަސްކަރިއްޔާއިންވެސް މިހާރު ވަނީ ގައްޒާއަށް ހަމަލާ ދެމުންނެވެ.
ހަމާސްއިން ސޯޝަލް މީޑިއާއަށް އާންމުކުރި ވީޑިއޯއެއްގައި ފެންނަ ގޮތުން އެ ޖަމާއަތުގެ ހަނގުރާމަވެރިން ވަނީ ވައިގެ މަގުން 'ގްލައިޑާ' ތަކެއް ބޭނުންކޮށްގެން އިޒްރޭލަށް ވަދެފަ އެވެ. އޭގެ އިތުރުން ބިމާއި ވައިގެ މަގުންވެސް ހަމާސްއިން ދަނީ ހަމަލާދެމުންނެވެ.
