މެންޗެސްޓާ (އޮކްޓޫބަރު 4) - ޔުއެފާ ޗެމްޕިއަންސް ލީގުގައި ރޭ އާސެނަލާއި މެންޗެސްޓާ ޔުނައިޓެޑް ކުޅުނު މެޗުތަކުން ބަލިވިއިރު، ރެއާލް މެޑްރިޑުން ރަށުންބޭރުގައި 3-2 އިން ނަޕޯލީ ބަލިކޮށް މުހިންމު މޮޅެއް ހޯދައިފި އެވެ.
ޔުނައިޓެޑް ވަނީ އަމިއްލަ ދަނޑުގައި 3-2 އިން ތުރުކީ ސުޕަ ލީގުގެ ގަލަސަތަރާއި އަތުން ބަލިވެފަ އެވެ. އާސެނަލް ރަށުންބޭރުގައި ބަލިވީ ފްރާންސްގެ ލޯންސް އަތުން 2-1 އިންނެވެ.
އަމިއްލަ ދަނޑުގައި ކުޅުނު ޔުނައިޓެޑުން 17 ވަނަ މިނިޓްގައި ރަސްމުސް ހޮއިލަންޑްގެ ގޯލުން ލީޑުނެގިތާ ފަސް މިނިޓް ތެރޭ ގަލަސަތަރާއި އަށް އެއްވަރުކޮށްދިނީ ކުރިން ޔުނައިޓެޑަށް ވެސް ކުޅުނު ވިލްފްރެޑް ޒަހާ އެވެ. ޔުނައިޓެޑުން ދެ ވަނަ ފަހަރަށް ލީޑުނެގީ 67 ވަނަ މިނިޓްގައި ހޮއިލަންޑް ޖެހި ގޯލުންނެވެ. މި ފަހަރު ވެސް ޔުނައިޓެޑަށް ލީޑު ހިފަހައްޓައިލެވުނީ މަދު ވަގުތު ކޮޅަކު އެވެ. މެޗުގެ 71 ވަަނަ މިނިޓްގައި ގަލަސަތަރާއިގެ ކަރީމް އަކްތޫރްކޮގްލޫ ވަނީ ނަތީޖާ ހަމަހަމަކޮށްދީފަ އެވެ.
ޔުނައިޓެޑަށް މައްސަލަ ދިމާވީ މެޗުގެ 77 ވަނަ މިނިޓްގައި، އެ ޓީމުގެ މިޑްފީލްޑަރު، ކަސެމީރޯ އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކުމުންނެވެ. ކަސެމީރޯ އަށް ދެ ވަނަ ރީނދޫ ކާޑު ދެއްކީ ޔުނައިޓެޑްގެ ކީޕަރު އަންދްރޭ އޮނާނާ ހެދި ގޯހެއްގައި ޑިފެންސް ކުރަން އުޅުމުގެ ތެރޭގަ އެވެ. އެ ވަގުތު ލިބުނު ޕެނަލްޓީގައި ގަލަސަތަރާއިގެ ފޯވާޑް މައުރޯ އިކާޑީ އަށް ބޭނުމެއް ނުހިފުނެވެ.
އެކަމަކު، މެޗުގެ 81 ވަނަ މިނިޓްގައި އިކާޑީ ވަނީ ޕެނަލްޓީ ނާކާމިޔާބުވުމުގެ މާޔޫސްކަން ފިލުވާލައި، ގަލަސަތަރާއި މޮޅުވި ގޯލު ޖަހައިފަ އެވެ. މިއީ މި ވޭތުވެދިޔަ ފަސް އަހަރު ތެރޭ ގަލަސަތަރާއި އިން ޗެމްޕިއަންސް ލީގުގައި ހޯދި ފުރަތަމަ މޮޅެވެ. އަދި އެންމެ ފަހުން ޗެމްޕިއަންސް ލީގުގައި 17 މެޗު ކުޅެގެން ރަށުންބޭރުގައި މޮޅެއް ހޯދި ފުރަތަމަ ފަހަރެވެ.
މި ގްރޫޕްގެ އަނެއް މެޗުން ބަޔާން މިއުނިކް ވަނީ ކޯޕެންހާގެން އަތުން 2-1 އިން މޮޅުވެ، ގްރޫޕްގައި މިހާތަނަށް އެ ޓީމުން ކުޅުނު ދެ މެޗުން ވެސް މޮޅުވެ، ހަ ޕޮއިންޓާ އެކު އެއް ވަނައިގައި ހަމަޖެހިލައިފަ އެވެ. ދެ ވަނައިގައި އޮތް ގަލަސަތަރާއި އަށް ހަތަރު ޕޮއިންޓް ލިބިފައިވާއިރު، ތިން ވަނައިގައި އޮތް ކޯޕެންހާގެންގެ އެއް ޕޮއިންޓް އެބައޮތެވެ. ޔުނައިޓެޑް، ގްރޫޕް ތާވަލުގެ ފުލުގައި އޮތީ ޕޮއިންޓެއް ވެސް ނެތި އެވެ.
ރޭގެ މެޗުގައި ގަބްރިއެލް ޖީސޫސް ވަނީ މެޗުގެ 14 ވަނަ މިނިޓްގައި ބުކާޔޯ ސަކާ ދިން ބޯޅައަކުން އާސެނަލަށް ލީޑުނަގައިދީފަ އެެވެ. އެކަމަކު، އަމިއްލަ ސަޕޯޓަރުން ކުރިމަތީގައި ކުޅުނު ލޯންސް އިން ވަނީ ދެ ގޯލު ޖަހައި ނަތީޖާ އަނބުރާލައިފަ އެވެ. އެ ޓީމުގެ ލަނޑުތައް ޖެހީ އެޑްރިއެން ތޮމަސަން އާއި އެލްޔޭ ވަހީ އެވެ.
ގްރޫޕް ބީގެ އަނެއް މެޗުން ޕީއެސްވީ އައިންދޯވަން އާއި ސެވިއްޔާ ވަނީ 2-2 އިން އެއްވަރުވެފަ އެވެ. މި ގްރޫޕްގެ އެއް ވަނައިގައި ލޯންސް އޮތީ ހަތަރު ޕޮއިންޓާ އެކު އެވެ. ދެ ވަނައިގައި އޮތް އާސެނަލަށް ތިން ޕޮއިންޓް ލިބިފައިވާއިރު، ތިން ވަނައިގައި ސެވިއްޔާ އޮތީ ދެ ޕޮއިންޓާ އެކު އެެވެ. ހަތަރެއްގައި އޮތް ޕީއެސްވީގެ އޮތީ އެއް ޕޮއިންޓެވެ.
ޑިއޭގޯ މަރަޑޯނާ ސްޓޭޑިއަމްގައި ރޭ ނަޕޯލީން ލެއޯ އޮސްޓިގާޑްގެ ގޯލުން ލީޑުނަގާފައިވަނިކޮށް ރެއާލަށް އެއްވަރުކޮށްދިނީ ވިނީޝިއުސް ޖޫނިއާ އެވެ. ޖޫޑް ބެލިންހަމް ޖެހި އިންޑިވިޖުއަލް މޮޅު ގޯލުން ރެއާލުން މެޗުގައި ފުރަތަމަ ފަހަރަށް ލީޑުނެގިއިރު، ދެ ވަނަ ހާފުގެ ކުރީކޮޅުގައި ލިބުނު ޕެނަލްޓީން ޕިއޮޓްރޭ ޒިއެލިންސްކީ ޖެހި ގޯލުން ނަޕޯލީން އެއްވަރުކުރި އެވެ.
މެޗު ނިމެން 12 މިނިޓަށް ވެފައި ވަނިކޮށް ރެއާލުން މޮޅުވި ގޯލު ޖެހި އެވެ. މިއީ އޭރިއާބޭރުން ފެޑޭ ވަލްވޭޑޭ ޖެހި ބާރު ބޯޅައެއް ދިފާއުކުރަން އުޅުމުގެ ތެރޭގައި ނަޕޯލީގެ ކީޕަރު އަލެކްސް މެރެޓް ގައިގައި ޖެހިފައި ބައިކޮޅަށް ވަން ގޯލެކެވެ.
ގްރޫޕް ސީގެ އެއް ވަނައިގައި ރެއާލް އޮތީ ދެ މެޗުން މޮޅުވެ ހަ ޕޮއިންޓާ އެކު އެވެ. ދެ ވަނައިގައި އޮތީ ދެ މެޗުން ތިން ޕޮއިންޓް ލިބިފައި އޮތް ނަޕޯލީ އެވެ. ތިން ވަނައިގައި އޮތް ސްޕޯޓިން ބްރާގާ ތިން ޕޮއިންޓް ހޯދާފައިވަނީ ރޭ ކުޅުނު މެޗުން ޔޫނިއަން ބާލިން އަތުން 3-2 އިން މޮޅުވެގެންނެވެ. މި ގްރޫޕްގެ ފުލުގައި އޮތް ޔޫނިއަން ބާލިން އަށް އަދި ޕޮއިންޓެއް ނުލިބެ އެވެ.
ގްރޫޕް ޑީގައި ރޭ އިންޓަ މިލާނުން ވަނީ އަމިއްލަ ދަނޑުގައި 1-0 އިން ބެންފީކާ ބަލިކޮށްފަ އެވެ. އެ ގްރޫޕްގެ އަނެއް މެޗުން ސަލްޒްބާގް ދަނޑުގައި ރެއާލް ސޮސިއެޑާޑް ވަނީ 2-0 އިން މޮޅުވެފަ އެވެ. ކޮންމެ ޓީމެއް ދެ މެޗު ކުޅެފައިވާއިރު، ގްރޫޕްގެ އެއް ވަނައިގައި އޮތް ރެއާލް ސޮސިއެޑާޑާއި ދެ ވަނައިގައި އޮތް އިންޓަ އަށް ވަނީ ހަތަރު ޕޮއިންޓް ލިބިފަ އެވެ. ތިން ވަނައިގައި އޮތް ސަލްޒްބާގަށް ތިން ޕޮއިންޓް ލިބިފައިވާއިރު، ބެންފީކާ އަށް ފުރަތަމަ ދެ މެޗުން ޕޮއިންޓެއް ވެސް ނުހޯދުނެވެ.
