ނިމިދިޔަ ރިޔާސީ އިންތިހާބުގެ ދެ ވަނަ ބުރުގައި ދަ ޑިމޮކްރެޓްސްއިން ވަކިކޮޅަކަށް ތާއީދުނުކޮށްފި ނަމަ ނިޒާމީ ވޯޓު ނެގުމަށް ތާއީދުކުރާނެ ކަމަށް އެމްޑީޕީން މީގެ ކުރިން ބުނެފައިވާކަމަށް ބުނެ ރައްޔިތުން މަޖިލީހުގެ ރައީސް މުހައްމަދު ނަޝީދު މިއަދު ދެއްކެވި ވާހަކައަށް އެމްޑީޕީން ރައްދު ދީފި އެވެ.
މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ނަޝީދު ވަނީ އެމްޑީޕީއަކީ މިވަގުތު މާބޮޑަށް ބަހުގެ އިތުބާރު ހިފޭ ޕާޓީއެއް ނޫންކަމަށް ވިދާޅުވެފަ އެވެ.
ނަޝީދު މިހެން ވިދާޅުވީ ނިޒާމީ ވޯޓު ނެގުމުގެ މަސައްކަތުގައި އެމްޑީޕީގެ އެއްބާރުލުން ނުލިބޭކަމުގެ ކަންބޮޑުވުން ފާޅުކުރައްވަމުންނެވެ.
މަޖިލީހުގައި ނަޝީދު ދެއްކެވި އެ ވާހަކަތަކަށް ރައްދު ދީ އެމްޑީޕީން މިއަދު ކުރި ޓުވީޓެއްގައި ބުނީ ޑިމޮކްރެޓްސްއިން އެ ޕާޓީއަށް ހުށަހެޅި ހުށަހެޅުމަކީ ސެޕްޓެމްބަރު 30، ގެ ކުރިން ރައްޔިތުންގެ ފެންނަ ނުފެންނަ ވޯޓެއް ނެގުމަށް އެއްބަސްވާ ނަމަ ރިޔާސީ އިންތިހާބުގެ ދެވަނަ ބުރުގައި އެމްޑީޕީގެ ރިޔާސީ ކެންޑިޑޭޓަށް ދަ ޑިމޮކްރެޓްސްއިން ތާއީދުކުރާނެ ކަމަށެވެ. ނަމަވެސް އެ ހުށަހެޅުން ގަބޫލުކުރެވެން ނެތް ކަމަށް ޑިމޮކްރެޓްސްއަށް އަންގާފައިވާނެ ކަމަށް ބުންޏެވެ.
އެމްޑީޕީން ބުނީ ނަޝީދު އެފަދައިން ވިދާޅުވި ނަމަވެސް އެ ޕާޓީ އާއި ޑިމޮކްރެޓްސްއާ ދެމެދު އެއްވެސް ކަމަކަށް އެއްބަސްވެފައިނުވާ ކަމަށެވެ.
"މީގެ އިތުރުން އެއްވެސް ކަމަކަށް މި ޕާޓީއާ ޑިމޮކްރެޓްސްއާ ދެމެދު އެއްބަސްވެފައިނުވާނެއެވެ. އަދި ރިޔާސީ އިންތިހާބުގެ ދެވަނަ ބުރުގައި އެއްވެސް ކެންޑިޑޭޓަކަށް ތާއީދުނުކުރަން ދަ ޑިމޮކްރެޓްސްއިން ނިންމި ނިންމުމަކީ މި ޕާޓީއާއެކު އެއްވެސް އެއްބަސްވުމެއްގެ ދަށުން އެ ޕާޓީން ނިންމާފައިވާ ނިންމުމެއް ނޫން،" އެމްޑީޕީން ބުންޏެވެ.
ދިވެހިރާއްޖޭގެ ވެރިކަން ހިންގާ ނިޒާމު ބަރުލަމާނީ ނިޒާމަށް ބަދަލު ކުރަންޖެހޭ ކަމަށް ނަޝީދު އަބަދުވެސް ވިދާޅުވެ އެވެ. އެމަނިކުފާނުގެ ވެރިކަމުގައި ވެސް އެ މޭރުމުން ވާހަކަފުޅު ދެއްކެވި އެވެ. އޭގެ ފަހުން ރައީސް ޔާމީނުގެ ވެރިކަމުގައި ބަންދުގައި ހުންނެވިއިރު ވެސް ނިޒާމު ބަދަލުކުރުމަށް މަސައްކަތްތަކެއް ކުރެއްވި އެވެ. އެހެންނަމަވެސް އެއްވެސް ފަހަރަކު އެ މަސައްކަތުން އެދެވޭ ނަތީޖާއެއް ހޯއްދެވިފައެއް ނުވެ އެވެ.
ނިޒާމު ބަދަލުކުރުމަށް އާންމުންގެ ފެންނަ ނުފެންނަ ވޯޓަކަށް ދިއުމަށް ރައްޔިތުންގެ މަޖިލީހުން ގަރާރެއް ފާސްކުރީ ސެޕްޓެމްބަރު 20، 2023 ގަ އެވެ.
ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބު ހުށަހެޅުއްވި އެ ގަރާރު ދިރާސާކޮށް މުޅި މަޖިލީހުގެ ކޮމިޓީން އެކުލަވާލި ރިޕޯޓް ފާސްކުރީ 35 މެންބަރުންގެ ވޯޓުންނެވެ. އޭގެ ތެރޭގައި އެމްޑީޕީގެ މެމްބަރުންވެސް ތާއީދު ކުރެއްވި އެވެ. ގަރާރު ފާސްކުރަން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވަ އެވެ.
