ލަންޑަން (އޮކްޓޯބަރު 3) - މިކައިލޯ މުޑްރިކް ޗެލްސީ އަށް ޖަހައިދިން ފުރަތަމަ ގޯލާ އެކު ފުލަމް އަތުން 2-0 އިން ޗެލްސީ މޮޅުވެއްޖެ އެވެ.
އިނގިރޭސި ޕްރިމިއާ ލީގުގައި ޗެލްސީ ފުލަމް އަތުން ހޯދި މޮޅަކީ މިދިޔަ އޮގަސްޓް މަހުގެ 22 ވަނަ ދުވަހަށް ފަހު ލީގުގައި ޗެލްސީ މޮޅުވި ފުރަތަމަ މެޗެވެ. އަދި މިއީ ލީގުގައި މިހާތަނަށް އެ ޓީމު ކުޅުނު ހަތް މެޗުގެ ތެރެއިން މޮޅުވި ދެ ވަނަ މެޗެވެ.
މެޗުގައި ޗެލްސީން ޖެހި ދެ ގޯލުވެސް ޖަހާފައިވަނީ ފުރަތަމަ ހާފުގަ އެވެ. ފުރަތަމަ ގޯލު ޖަހައިދިނީ 89 މިލިއަން ޕައުންޑަށް މިދިޔަ ޖެނުއަރީ މަހު އެކުލަބާ ގުޅުނު ޔޫކްރެއިންގެ އެޓޭކަރު މުޑްރިކް އެވެ.
މުޑްރިކް ގޯލު ޖެހިތާ މިނެޓެއް ފަހުން ދެވަނަ ގޯލު ޖަހައިދިނީ އާރްމަންޑޯ ބްރޯހާ އެވެ. މިއީ މިދިޔަ އަހަރުގެ އޮކްޓޯބަރު މަހަށް ފަހު އޭނާ ޗެލްސީ އަށް ޖަހައިދިން ފުރަތަމަ ގޯލެވެ. މިދިޔަ ސީޒަންގައި ކަކުލަށް ލިބުނު ސީރިއަސް އަނިޔާއަކަށް ފަހު ބްރޯހާ އެނބުރި ކުޅުމުގެ ތެރެއަށް އައިސްފައިވަނީ ދާދި ފަހުންނެވެ.
ރޭގެ މޮޅަކީ ޗެލްސީގެ ކޯޗު މައުރީސިއޯ ޕޮޗެޓީނޯއަށް ލިބޭނެ ހިތްހަމަޖެހުމެކެވެ. ސަބަބަކީ ސީނިއާ ސްކޮޑުގެ 12 ކުޅުންތެރިއަކަށް އަނިޔާވެފައިވާ ދަނޑިވަޅެއްގައި އޭޓީމުން ލީގުގައި މޮޅެއް ހޯދުމެވެ. އަނެއްކޮޅުން ފުރަތަމަ ހަ މެޗުގައި އެކަށީގެންވާ ނަތީޖާތަކެއް ނުނެރެވޭތީ ޕޮޗެޓީނޯ އަށް ޕްރެޝަރު އޮތީ ބޮޑުވެފަ އެވެ.
މެޗަށް ފަހު ޕޮޗެޓީނޯ ވަނީ މިކައިލޯ މުޑްރިކްގެ ކުޅުމަށް ތައުރީފްކޮށްފަ އެވެ.
އޭނާ ބުނީ މުޑްރިކް އަކީ ތަމްރީންތަކުގައި ވަރަށް ބުރަކޮށް މަސައްކަތް ކުރަމުން އަންނަ ކުޅުންތެރިއެއް ކަމަށާއި، އޭނާގެ ކުޅުން ވެސް ވަރަށް ބޮޑަށް ރަނގަޅުވަމުން އަންނަ ކަމަށެވެ.
ޕޮޗެޓީނޯ ވަނީ ޗެލްސީގައި ޒުވާން ގިނަ ކުޅުންތެރިންތަކެއް ތިބިކަން ފާހަގަކޮށް، އެ ކުޅުންތެރިންނަށް ޕްރިމިއާ ލީގަށް ހޭނި، ރަނގަޅު ކުޅުމެއް ދައްކަން ވަގުތު ބޭނުންވާނެ ކަމަށް ވެސް ބުނެފަ އެވެ.
އިނގިރޭސި ޕްރިމިއާ ލީގުގައި ޗެލްސީއަށް ކުރިއަށް އޮތީ ރަށުން ބޭރުގައި ބާންލީއާ ދެކޮޅަށް ކުޅޭ މެޗެވެ.
