ލިވަޕޫލް (އޮކްޓޫބަރު 1) - ލިވަޕޫލްގެ ދެ ކުޅުންތެރިއަކު މަދުކޮށް ކުޅެން ޖެހި ފަހު ވަގުތު ބައިކޮޅަށް ވަން ގޯލަކުން ޓޮޓެންހަމް ހޮޓްސްޕާސް އަތުން ރޭ ބަލިވި މެޗަކީ އޭނާ އަަށް ބައިވެރިވެވުނު އެންމެ ނާއިންސާފު ފުޓްބޯޅަ މެޗު ކަމަށް ލިވަޕޫލްގެ ކޯޗު ޔާގަން ކްލޮޕް ބުނެފި އެވެ.
ޓޮޓެންހަމްގެ ދަނޑުގައި ރޭ އެ ޓީމާ ދެކޮޅަށް ލިވަޕޫލް ކުޅުނު މެޗުގައި އެ ޓީމުގެ ކާޓިސް ޖޯންސް (26 ވަނަ މިނިޓްގައި) އާއި ޑިއޯގޯ ޖޮޓާ (69 ވަނަ މިނިޓްގައި) އަށް ރަތް ކާޑު ދެއްކި އެވެ. އަދި ލިވަޕޫލްގެ ލުއިޒް ޑިއާޒް ޖެހި ރަނގަޅު ގޯލެއް ވީޑިއޯ އެސިސްޓަންޓް ރެފްރީ މެދުވެރިކޮށް ރަނގަޅަށް ނުބެލިގެން ބަލައިނުގަތެވެ. ލިވަޕޫލް ބަލިވީ ފަހު ވަގުތު އެ ޓީމުގެ ޖޮއެލް މަޓިޕް އަތުން ބައިކޮޅަށް ވަން ގޯލާ އެކު، 2-1 އިންނެވެ.
އިނގިރޭސި ފުޓްބޯޅައިގެ ރެފްރީންގެ ކަންކަމުގެ ބެލެނިވެރި ފަރާތް، ޕްރޮފެޝަނަލް ގޭމްސް އޮފިޝަލްސް ލިމިޓެޑް (ޕީޖީއެމްއޯއެލް) އިން ރޭ ނެރުނު ބަޔާނެއްގައި ބުނެފައިވަނީ ޑިއާޒް ޖެހި ގޯލު ބަލައިނުގަނެވުނީ، "ސިގްނިފިކަންޓް ހިއުމަން އެރާ" އެއްގެ ސަބަބުން ވީއޭއާރް ރަނގަޅަށް ނުބެލިގެން ކަމަށެވެ. އަދި އެކަމާ ލިވަޕޫލްގެ ކިބައިން ރަސްމީކޮށް މާފަށް އެދޭ ކަމަށެވެ.
މެޗަށް ފަހު ލިވަޕޫލްގެ ކޯޗު ކްލޮޕް ވަނީ މެޗު އޮފިޝަލުންގެ އެކި ނިންމުންތައް ހުރި ގޮތަށް ވަރަށް ބޮޑަށް ނުރުހުންފާޅުކޮށްފަ އެެވެ.
ކްލޮޕް ބުނީ ލިވަޕޫލުން ދިމާވި ހާލަތްތަކާއި ކަންތައްތަކަށް ވިސްނައިގެން ޓީމެއްގެ ގޮތުގައި ކުރި މަސައްކަތާ މެދު ފަހުރުވެރިވާ ކަމަށެވެ.
އެކަމަކު، މިއީ ފުޓްބޯޅައިގައި އޭނާ އަށް ބައިވެރިވެވުނު އެންމެ "ނާއިންސާފުވެރި މެޗު" ކަމަށް ކްލޮޕް ވަނީ ބުނެފަ އެވެ.
"ފުރަތަމަ ރަތް ކާޑު ކާޓިސް (ޖޯންސް) އަށް ދެއްކިއިރު، އޭނަ ފައި ބޯޅައިގައި ޖެހިފައި ގޮސް ކުޅުންތެރިޔާ ފައިގައި ޖެހުނީ، ދެން ސްލޯ މޯޝަނުން ބަލާނަމަ ކޮންމެ ގޮތަކަށް ވެސް އެ ނެގިދާނެ. ޖޮޓާ އަށް ދެއްކި ފުރަތަމަ ރީނދޫ ކާޑަކީ ރީނދޫ ކާޑެއް ނޫން، ދެން ދެ ވަނަ ރީނދޫ ކާޑަކީ ޑިފެންސް ކުރަން އުޅުމުގެ ތެރޭގައި ބަދުނަސީބުކޮށް ދިޔަ ހާލަތެއް،" ކްލޮޕް ބުންޏެވެ.
"ޑިއާޒް ޖެހި ގޯލު އެ މީހުން (ވީއޭއާރް) ރޮނގު ދެމީ ނުބައިކޮށް، ވަރަށް ބޮޑަށް އެކަން އެ ހުރީ ފެންނަން. މިއީ މުޅިން ގޯސްކޮށް ވެފައި ހުރި ކަންކަން،"
ކްލޮޕް ބުނީ މެޗު އޮފިޝަލްކަން ކުރުމުގައި މި ހެދުނު ގޯސްތަކުގެ ވާހަކަ ދައްކައި، މާފަށް އެދިގެން ކަމެއް ބަދަލުވާތަން ނުފެންނަ ކަމަށާއި ޔަގީނުން ވެސް މި މެޗުން ގެއްލުނު ޕޮއިންޓަކީ ޓީމަށް ދެރައެއް ކަމަށާއި އެ ކަމާ ކުރިމަތިލުން ނޫން ގޮތެއް ނެތް ކަމަށެވެ.
