ލަންޑަން (އޮކްޓޫބަރު 1) - އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑާއި މެންޗެސްޓާ ސިޓީ އަދި ލިވަޕޫލް ބަލިވިއިރު އާސެނަލް މޮޅުވެއްޖެ އެވެ.
ޔުނައިޓެޑް ވަނީ އަމިއްލަ ދަނޑުގައި ކްރިސްޓަލް ޕެލަސް އަތުން 1-0 އިން ބަލިވެފަ އެވެ. ވުލްވްސް އަތުން 2-1 އިން ސިޓީ ބަލިވިއިރު، ނުވަ ކުޅުންތެރިންނާ އެކު މެޗު ނިންމާލި ލިވަޕޫލް އަތުން ޓޮޓެންހަމް ހޮޓްސްޕާސް މޮޅުވީ 2-1 އިންނެވެ. އަދި އާސެނަލުން ވަނީ 4-0 އިން ބޯންމައުތުގެ މައްޗަށް ކުރިހޯދައިފަ އެވެ.
ރޭގެ ނަތީޖާތަކަށް ފަހު ސިޓީ އެއް ވަނައިގައި އޮތީ ހަތް މެޗުން 18 ޕޮއިންޓާ އެކު އެވެ. ދެ ވަނައިގައި އޮތް ޓޮޓެންހަމް އާއި ތިން ވަނައިގައި އޮތް އާސެނަލަށް 17 ޕޮއިންޓް ލިބިފައިވާއިރު، ލިވަޕޫލް ހަތަރު ވަނައިގައި އޮތީ 16 ޕޮއިންޓް ހޯދައިގެންނެވެ.
ޕެލަސް އިން ޔުނައިޓެޑް ބަލިކުރި މެޗުގެ ހަމައެކަނި ގޯލު ޕެލަސް އަށް ޖަހައިދިނީ ޑިފެންޑަރު ޔަކީމް އެންޑަސަން އެވެ. ހިލޭ ޖެހުމެއްގައި ލިބުނު ބޯޅަ އޭނާ ވަނީ ގޯލުގެ މަތީ ކަނަށް ފޮނުވާލައިފަ އެވެ. މި މެޗުން ބަލިވުމުން ޔުނައިޓެޑް އޮތީ ލީގު ތާވަލުގެ 10 ވަނައިގަ އެވެ. އެއީ ހަތް މެޗުން ނުވަ ޕޮއިންޓާ އެކު އެވެ.
ސައްތަ އިން ސައްތަ ރެކޯޑަކާ އެކު އޮތް ސިޓީ ރޭ ބަލިވި މެޗުގައި ވުލްވްސް އިން ލީޑުނެގީ ސިޓީގެ ރުބެން ޑިއާސް އަތުން ބައިކޮޅަށް ވަން ގޯލުންނެވެ. ސިޓީން ދެ ވަނަ ހާފުގައި އެއްވަރުކުރީ ހޫލިއަން އަލްވަރޭޒް ޖެހި ހިލޭޖެހުމުންނެވެ. އެކަމަކު، ދެކުނު ކޮރެއާގެ ފޯވާޑް ހްވާން ހީ ޗާން ޖެހި ގޯލުން ވުލްވްސް އިން މެޗު ކާމިޔާބުކުރި އެވެ. ސިޓީގެ ކޯޗު ޕެޕް ގާޑިއޯލާ ހުރީ މި މެޗުގައި ބެންޗަށް ނާދެވޭ ގޮތަށް ސަސްޕެންޝަނެއްގަ އެވެ.
ބޯންމައުތު ދަނޑުގައި އާސެނަލްގެ ގޯލުތައް ޖެހީ ބުކާޔޯ ސަކާ، މާޓިން އޮޑެގާޑް، ކައި ހަވާޓްޒް އަދި ބެން ވައިޓް އެވެ. އޮޑެގާޑާއި ހަވާޓްޒް ލަނޑު ޖެހީ ލިބުނު ޕެނަލްޓީތަކުންނެވެ.
ޓޮޓެންހަމް ދަނޑުގައި ރޭ ކުޅުނު މެޗުގައި ލިވަޕޫލްގެ ކާޓިސް ޖޯންސް އަށް ވަނީ 26 ވަނަ މިނިޓްގައި ރަތް ކާޑެއް ދައްކައިފަ އެެވެ. މިއީ ޓޮޓެންހަމްގެ ޔްވެސް ބިސޫމާ އަށް ނުރައްކާތެރި ފައުލެއް ކުރި ކަމަށް ބަލައި، ވީޑިއޯ އެސިސްޓަންޓް ރެފްރީ (ވީއޭއާރް)ގެ އެހީހޯދައިގެން ދެއްކި ރަތް ކާޑެކެވެ. ވީއޭއާރް އިން ބެލުމަށް ފަހު ޖޯންސް އަށް ފުރަތަމަ ދެއްކި ރީނދޫ ކާޑު ރަތް ކާޑަކަށް ބަދަލުކުރީ އެވެ.
ލިވަޕޫލްގެ ކުޅުންތެރިއަކު މަދުވިތާ 10 މިނިޓް ތެރޭ ޓޮޓެންހަމްގެ ކެޕްޓަން ސޮން ހެއުން މިން އޭރިއާތެރެއިން ލިބުނު ފުރުސަތެއްގައި އެ ޓީމަށް ލީޑުނަގައިދިނެވެ. އޭގެ އިރުކޮޅެއް ފަހުން، ލުއިޒް ޑިއާޒް ލިވަޕޫލަށް ގޯލެއް ޖަހައިދީ އެއްވަރުކުރި ނަމަވެސް ވީއޭއާއާރް އިން ރަނގަޅަށް ނުބަލައި، އެ ގޯލު ބަލައިނުގަންނަން ނިންމި އެވެ. ރޭގެ މެޗަށް ފަހު އިނގިރޭސި ޕްރިމިއާ ލީގުގެ ރެފްރީން ކަންތައްތަކާ ބެހޭ އިސް ފަރާތް، ޕްރޮފެޝަނަލް ގޭމްސް އޮފިޝަލްސް ލިމިޓެޑް (ޕީޖީއެމްއޯއެލް) ވަނީ މި ކަމަށް ލިވަޕޫލް ކިބައިން މާފަށް އެދިފަ އެވެ.
ލިވަޕޫލުން ވަނީ ފުރަތަމަ ހާފުގެ އިތުރު ވަގުތުގައި ކޯޑީ ގަކްޕޯ ޖެހި ގޯލުން ނަތީޖާ ހަމަހަމަކޮށްފަ އެވެ. މި ގޯލު ޖެހުމުގެ ތެރޭގައި ގަކްޕޯ ފަޔަށް އަނިޔާވުމުން ބަދަލުކުރަން ޖެހުނެވެ. ފުރަތަމަ ހާފުގެ އިތުރު ވަގުތުގައި ލިވަޕޫލަށް ލީޑުނަގައިދޭން ލުއިޒް ޑިއާޒަށް ހުސް ފުރުސަތެއް ލިބި ބޭނުމެއް ނުކުރެވުނެވެ.
ދެ ވަނަ ހާފުގައި ލިވަޕޫލުން ބަދަލަކަށް ކުޅެން ނެރުނު ޑިއޯގޯ ޖޮޓާ އަށް ގާތްގާތުގައި ދެ ރީނދޫ ކާޑާ އެކު، ރަތް ކާޑެއް ދައްކައި މެޗުގެ 69 ވަނަ މިނިޓްގައި އޭނާ ދަނޑުން ފޮނުވާލި އެވެ. ލިވަޕޫލުން ނުވަ ކުޅުންތެރިންނާ އެކު ޑިފެންސް ކުރަމުން ދަނިކޮށް ޓޮޓެންހަމް މޮޅުވި ގޯލު ޖެހީ އިތުރު ވަގުުތުގެ ހަ ވަނަ މިނިޓްގަ އެވެ. މިއީ ޓޮޓެންހަމްގެ ފުލްބެކް، ޕެޑްރޯ ޕޯރޯ ނެގި ބާރު ހުރަހެއް ދިފާއުކުރަން އުޅުމުގެ ތެރޭގައި ލިވަޕޫލްގެ ޖޮއެލް މަޓިޕް ފައިގައި ޖެހިފައި ބައިކޮޅަށް ވަން ގޯލެކެވެ.
ލީގުގައި ރޭ ކުޅުނު އެެހެން މެޗުތަކަށް ބަލާއިރު، އެސްޓަން ވިލާ އިން ވަނީ 6-1 ބްރައިޓަން ބަލިކޮށްފަ އެވެ. އަލަށް ޕްރޮމޯޓްވި ލޫޓަން ޓައުން އިން ވަނީ 2-1 އިން އެވަޓަން އަތުން މޮޅުވެފަ އެވެ. ނިއުކާސަލް ޔުނައިޓެޑުން 2-0 އިން ބާންލީ ބަލިކުރިއިރު، ޝެފީލްޑް ޔުނައިޓެޑް އަތުން ވެސްޓް ހޭމް ޔުނައިޓެޑް މޮޅުވީ 2-0 އިންނެވެ.
