ރިޔާސީ އިންތިހާބުގެ ދެވަނަ ބުރުގެ ވަގުތީ ނަތީޖާއިން އިދިކޮޅު ޕީއެންސީ ކެންޑިޑޭޓު ޑރ. މުހައްމަދު މުއިއްޒު ކާމިޔާބު ކުރުމާއެކު ޑިމޮކްރެޓްސް ލީޑުކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެމްޑީޕީ މެންބަރުންނާ ދިމާނުކުރުމަށް އެދިވަޑައިގެންފި އެވެ.
ޑިމޮކްރަޓުންގެ މެންބަރުން ތިބޭ ގްރޫޕަކަށް ފޮނުއްވި މެސެޖެއްގައި ނަޝީދު މިހެން ވިދާޅުވެފައި މިވަނީ އެމްޑީޕީގެ ކެންޑިޑޭޓު ރައީސް އިބްރާހިމް މުހައްމަދު ސޯލިހަށް ދެވަނަ ދައުރެއް ކަށަވަރު ނުވެ އިންތިހާބު ނާކާމިޔާބު ވެފައި ވަނިކޮށެވެ.
"އެމްޑީޕީގެ މީހުންނާ ދިމާނުކުރުމަށް ވަރަށް އެދެން"
ނަޝީދުގެ ކުރު މެސެޖުގައި ލިޔުއްވާފައިވެ އެވެ.
ނަޝީދުގެ ޑިމޮކްރެޓްސް ޕާޓީއިން ރިޔާސީ އިންތިހާބުގެ ފުރަތަމަ ބުރުގައި 15،000 އަށްވުރެ ގިނަ ވޯޓު ހޯދާ ތިންވަނައަށް ދިޔަ އެވެ. ނަމަވެސް ދެވަނަ ބުރުގައި ނަޝީދު އަދި ޑިމޮކްރެޓުން ވެސް ނިންމީ އެއްވެސް ކެންޑިޑޭޓަކަށް ތާއީދު ނުކުރަމަށެވެ.
ދަ ޑިމޮކްރެޓްސް އަކީ އެމްޑީޕީގެ ރިޔާސީ ޕްރައިމަރީ ރައްޔިތުންގެ މަޖިލީހުގެ ރަައީސް މުހައްމަދު ނަޝީދަށް ނާކާމިޔާބުވެވަޑައިގެންނެވުމުން، ކުރެއްވި ތުހުމަތުތަކަށް ފަހު، ފިކުރެއްގެ ދިރުމުގެ ނަމުގައި އުފެއްދެވި ފެކްޝަން އެޕާޓީން ވަކިވެގެން އުފެއްދި ޕާޓީ އެކެވެ.
އިންތިހާބުގެ ފުރަތަމަ ބުރަށްފަހު ނަޝީދުގެ އިތުބާރު ނެތް ކަމަށް ސޯލިހުގެ އެމްޑީޕީން މަޖިލީހަށް ހުށަހަޅާފައި އޮތް މައްސަލަ ބޭރުކޮށްލި އެވެ. އެއާއެކު، އަންނަ އޮކްޓޯބަރު މަހު ނިޒާމުގެ ވޯޓަކަށް އެހުމަށް ޑިމޮކްރެޓްސް އިން މަޖިލީހަށް ގަރާރެއް ހުށަހަޅައި، މިހާރު އެ ގަރާރު ވަނީ މަޖިލީހުން ވެސް ފާސްކޮށްފަ އެވެ.
އަދި، މިދިޔަ ހަފުތާގެ ތެރޭގައި ނަޝީދު ވަނީ ރައީސް އޮފީހަށް ވަޑައިގެން ރައީސާއެކު މަޝްވަރާތަކެއްވެސް ކުރައްވާފަ އެވެ.
