ލަންޑަން (ސެޕްޓެމްބަރު 25) - އިނގިރޭސި ޕްރިމިއާ ލީގުގައި ރޭ ލިވަޕޫލުން 3-1 އިން ވެސްޓް ހޭމް ޔުނައިޓެޑް ބަލިކުރިއިރު، އެސްޓަން ވިލާ އަތުން 1-0 އިން ޗެލްސީ ބަލިވެއްޖެ އެވެ.
ލީގުގައި ރޭ ކުޅުނު ފޯރިގަދަ މެޗުތަކަށް ފަހު މި ވަގުތު އެއް ވަނައިގައި އޮތީ ހަ މެޗުވެސް ކާމިޔާބުކޮށް 18 ޕޮއިންޓާ އެކު ޗެމްޕިއަން، މެންޗެސްޓާ ސިޓީ އެވެ. ދެ ވަނައިގައި 16 ޕޮއިންޓާ އެކު ލިވަޕޫލް އޮތްއިރު، ތިން ވަނައިގައި އޮތީ ބްރައިޓަން އެވެ. އެ ޓީމްގެ ފަހަތުން އޮތް ޓޮޓެންހަމާއި އާސެނަލް އަށް ލިބިފައިވަނީ 14 ޕޮއިންޓެވެ.
ވެސްޓް ހޭމް އަތުން ލިވަޕޫލް މޮޅުވި މެޗުގެ ފުރަތަމަ ގޯލު ޖެހީ ލިވަޕޫލްގެ މުހައްމަދު ސަލާހު އެވެ. މިއީ ލިބުނު ޕެނަލްޓީއަކުން އޭނާ ޖެހި ގޯލެކެވެ. ފުރަތަމަ ހާފު ނިމުމުގެ ކުރިން ޖެރޮޑް ބޮވެން ޖެހި ގޯލުން ވެސްޓް ހޭމުން ނަތީޖާ ހަމަހަމަކުރި ނަމަވެސް ޑާވިން ނޫނޭޒް ވަނީ މެޗުގެ 60 ވަނަ މިނެޓުގައި ލިވަޕޫލަށް ދެ ވަނަ ފަހަރަށް ލީޑު ނަގައިދީފަ އެވެ. މެޗުގެ ފަހުކޮޅު ލިވަޕޫލްގެ ލީޑު ފުޅާކޮށްދިނީ ޑިއޯގޯ ޖޮޓާ އެވެ.
މި މެޗުގައި ދެ ޓީމުން ވެސް ރަނގަޅު ހަމަލާތަަކެއް އުފެއްދިއިރު، މެޗުގެ ކުރީކޮޅު ތޯމަސް ސޫޗެކް ފޮނުވާލި ހަމަލާއެއް ލިވަޕޫލްގެ ކީޕަރު އެލިސަން ބެކާ ދިފާއުކުރިއެވެ. މި މެޗުގައި ސަސްޕެންޝަނަށް ފަހު އެނބުރިއައިސް ލިވަޕޫލްގެ ކެޕްޓަން ވާޖިލް ވެންޑައިކް ފުރަތަމަ އެގާރައިގައި ހިމެނިގެން ކުޅުނެވެ.
އެސްޓަން ވިލާ އަތުން ޗެލްސީ ބަލިވި މެޗުގައި ވިލާގެ ހަމައެކަނި ގޯލު ޖަހައިދިނީ އޮލީ ވަޓްކިންސް އެވެ. މެޗުގެ 73 ވަނަ މިނެޓުގައި އޭނާ މި ގޯލު ޖެހުމުގެ ކުރިން ދެ ވަނަ ހާފުގެ ކުރީކޮޅު ޗެލްސީގެ މެލޯ ގުސްޓޯ އަށްވަނީ ރަތްކާޑެއް ދައްކާ ދަނޑުން ފޮނުވާލައިފަ އެވެ.
މެޗުގެ ފުރަތަމަ ހާފުގައި ޗެލްސީގެ އެކްސެލް ޑިސާސީ ގޯލެއްވެސް ޖެހި އެވެ. ނަމަވެސް ރެފްރީ ނިންމީ އެ ގޯލު އޮފްސައިޑް ކަމަށެވެ.
ދެ ޓީމްގެ ކީޕަރުން ވެސް ރަނގަޅު ސޭވްތަކެއްކުރި މި މެޗުގައި ޗެލްސީގެ ރޮބާޓް ސަންޒޭޒް ވަނީ ވިލާގެ ލޫކާސް ޑިގްނޭ އާއި ނިކޮލޯ ޒަނިއޯލޯ ފޮނުވާލި ނުރައްކާތެރި ދެ ހަމަލާ ދިފާއުކޮށްފަ އެވެ. އަނެއްކޮޅުން ޗެލްސީގެ ނިކޮލަސް ޖެކްސަން އާއި ރަހީމް ސްޓާލިން އަށް ލިބުނު ހުސް ފުރުސަތުތަކުގެ ހުރަހަކަށްވީ ވިލާގެ ގޯލްކީޕަރު އެމިލިއާނޯ މާޓިނޭޒް އެވެ.
ގުސްޓޯ އަށް ދެއްކި ރަތްކާޑުގެ ސަބަބުން އޭނާއަށް ކުރިއަށް އޮތް ތިން މެޗުގައި ނުކުޅެވޭއިރު، ރޭގެ މެޗުގައި ނިކޮލަސް ޖެކްސަންއަށް ދެއްކި ރީނދޫ ކާޑާއިއެކު އޭނާއަށް ފަސް ކާޑު ހަމަވެ ދެން އޮތް މެޗުގައި ނުކުޅެވޭނެ އެވެ.
ލީގުގައި އިއްޔެ ކުޅުނު އެހެން މެޗުތަކަށް ބަލާއިރު އާސެނަލް އާއި ޓޮޓެންހަމް ވާދަކުރި "ނޯތު ލަންޑަން ޑާބީ" ނިމުނީ 2-2 އިން ދެ ޓީމް އެއްވަރުވެގެންނެވެ. މި މެޗުގައި އާސެނަލްގެ ދެ ގޯލު ބުކާޔޯ ސަކާ ޖެހިއިރު، ޓޮޓެންހަމްގެ ދެ ގޯލު ޖަހައިދިނީ ކެޕްޓަން ސޮން ހެއުން-މިން އެވެ.
ބްރައިޓަން އިން ފަހަތުން އަރާ 3-1 އިން ބޯންމޮތު ބަލިކުރިއިރު، ނިއުކާސަލް ޔުނައިޓެޑުން ވަނީ ޕްރިމިއާ ލީގުގައި އެޓީމްގެ ރެކޯޑު މޮޅެއް ހޯދާފަ އެވެ. އެއީ 8-0 ގެ ބޮޑު ތަފާތަކުން ޝެފީލްޑް ޔުނައިޓެޑް ބަލިކޮށްގެންނެވެ.
