ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ރައީސް އިބްރާހިމް މުހައްމަދު ސޯލިހު މިއަދު ރައީސް އޮފީހުގައި ބޭއްވި ބައްދަލުވުމުގައި ހޮނިހިރު ދުވަހު ބާއްވާ ރިޔާސީ އިންތިހާބުގެ ދެވަނަ ބުރުގައި ނަޝީދު ތާއީދު ހޯއްދެވުމަށް މަޝްވަރާ ކުރެވުނު ކަމަށް ރައީސް ސޯލިހު ވިދާޅުވެއްޖެ އެވެ.
ބައްދަލުވުމަށްފަހު ނޫސްވެރިންނަށް މައުލޫމާތު ދެއްވަމުން ރައީސް ސޯލިހު ވިދާޅުވީ، މައިގަނޑު ގޮތެއްގައި ދެކެވުނީ ރިޔާސީ އިންތިހާބުގެ ދެވަނަ ބުރާއި ނިޒާމީ ވޯޓުގެ ވާހަކަ ކަމަށެވެ. އަދި ނަޝީދުގެ ޑިމޮކްރެޓްސް ޕާޓީން ވަކިކޮޅަކަށް ނާރަން ނިންމި ނިންމުން ޕާޓީން ދަމަހައްޓާނެ ކަމަށް ވިދާޅުވި ކަމަށްވެސް ވިދާޅުވި އެވެ.
"އަޅުގަނޑުމެން އެކަމާ (ނަޝީދު ވަކިން ރައީސަށް ތާއީދު ކުރެއްވުން) ބެހޭގޮތުން ވާހަކަ ދެކެވުނު، ތަފުސީލުތައް އަޅުގަނޑުމެން ފަހުން ހާމަކުރާނަން"
ރައީސް މިހެން ވިދާޅުވެފައިވާއިރު ވަކި ކޮޅަކަށް ނާރަން ނިންމި ޖުމްހުރީ ޕާޓީގެ ރަނިން މޭޓު އަމީން އިބްރާހިމް އާއި އެ ޕާޓީގެ ކައުންސިލްގެ ގިނަ މެމްބަރުންތަކެއް ރޭ ވަނީ ރައީސް ސޯލިހަށް ތާއީދު ކުރައްވާ އެމަނިކުފާނުގެ ކެމްޕޭނާ ގުޅިވަޑައިގެންފަ އެވެ.
ރިޔާސީ އިންތިހާބުގެ ދެވަނަ ބުރަށް ފަސް ދުވަހަށް ވެފައިވާއިރު، މިއީ ނަޝީދާއި ރައީސް ފަހުގެ ތާރީހެއްގައި ބައްދަލުކުރެއްވި ފުރަތަމަ ފަހަރެވެ. ހާއްސަކޮށް އެމްޑީޕީގެ ރިޔާސީ ޕްރައިމަރީއަށްފަހު ނަޝީދު އެމްޑީޕީ ދޫކުރައްވާ ޑިމޮކްރެޓްސް ޕާޓީ އުފެއްދުމަށްފަހު ގެންދަވަނީ އެމްޑީޕީ އާއި ރައީސަށް ތަކުރާރުކޮށް ފާޑުވިދާޅުވަމުންނެވެ.
ސެޕްޓެމްބަރު 9، ގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި ވޯޓުލީ އާބާދީގެ 39 ޕަސެންޓް ހޯއްދަވައިގެން ރައީސް ސޯލިހު ދެ ވަނައަށް ވަޑައިގެންނެވިއިރު، ހަތް ޕަސެންޓު ހޯއްދަވައިގެން ނަޝީދުގެ ޕާޓީގެ ކެންޑިޑޭޓް އިލްޔާސް ލަބީބް ވަޑައިގެންނެވީ ތިންވަނައަށެވެ. އެ ބުރުގައި ކުރި ހޯއްދެވީ 46 ޕަސެންޓު ހޯއްދަވައިގެން އިދިކޮޅު ކެންޑިޑޭޓު ޑރ. މުހައްމަދު މުއިއްޒެވެ.
ދަ ޑިމޮކްރެޓްސް ނިންމީ ރިޔާސީ އިންތިހާބުގެ ދެ ވަނަ ބުރުގައި އެއްވެސް ކެންޑިޑޭޓަކަށް ތާއީދު ނުކުރުމަށެވެ. އެގޮތަށް ނިންމީ، ވެރިކަން ހިންގާ ނިޒާމު ބަދަލު ކުރުމާ ގުޅޭ ގޮތުން ވޯޓަށް އެހުމަށް މައި ދެ ޕާޓީއަށް ހުށަހެޅުމަށްފަހު ދެ ޕާޓީން ވެސް އެކަމަށް އެކަށީގެންވާ އިޖާބައެއް ނުދިނުމުންނެވެ.
އެހެން ނަމަވެސް އިންތިހާބުގެ ފުރަތަމަ ބުރަށްފަހު ނަޝީދުގެ އިތުބާރު ނެތް ކަމަށް ސޯލިހުގެ އެމްޑީޕީން މަޖިލީހަށް ހުށަހަޅާފައި އޮތް މައްސަލަ ވަނީ ބޭރުކޮށްލައިފަ އެވެ. އެއާއެކު، އަންނަ އޮކްޓޯބަރު މަހު ނިޒާމުގެ ވޯޓަކަށް އެހުމަށް ޑިމޮކްރެޓްސް އިން މަޖިލީހަށް ގަރާރެއް ހުށަހަޅައި، މިހާރު އެ ގަރާރު ވަނީ މަޖިލީހުން ވެސް ފާސްކޮށްފަ އެވެ.
