މެންޗެސްޓާ (ސެޕްޓެމްބަރު 22) - އިނގިރޭސި ފޯވާޑް ހެރީ ކޭންގެ ބަދަލުގައި ޑެންމާކުގެ ޒުވާން ފޯވާޑް ރަސްމުސް ހޮއިލުންޑް ސޮއިކުރުމަކީ ހެދުނު ގޯހެއް ނޫން ކަމަށް މެންޗެސްޓާ ޔުނައިޓެޑްގެ ކޯޗު އެރިކް ޓެން ހާގް ބުނެފި އެވެ.
މި ސީޒަނަށް ކުޅުންތެރިން ހޯދުމުގެ މަސައްކަތް ޔުނައިޓެޑުން ކުރަމުން އައިއިރު، އެކުލަބުން އެންމެ ބޮޑަށް ބޭނުންވި އެއް ކުޅުންތެރިއަކީ ޓޮޓެންހަމަށް ކުޅެމުން އައި ހެރީ ކޭން އެވެ. ނަމަވެސް ކޭންގެ ބަދަލުގައި އެ ކުލަބުން ސޮއިކުރީ އިޓަލީ ލީގުގެ އެޓްލާންޓާ އަށް ކުޅެމުން އައި ހޮއިލުންޑު އެވެ.
ޔުނައިޓެޑުން ހޮއިލުންޑް ސޮއިކުރުމާ އެކު ކޭން ބަދަލުވީ ޖަރުމަންގެ ބަޔާން މިޔުނިކް އަށެވެ. ހޮއިލުންޑް މިހާތަނަށް ޔުނައިޓެޑަށް ތިން މެޗު ކުޅުނުއިރު ޖެހިފައިވަނީ އެންމެ ގޯލެކެވެ. އަނެއްކޮޅުން ކޭން ވަނީ ބަޔާން އަށް ކުޅުނު ހަ މެޗުގައި ފަސް ގޯލު ޖަހައިފަ އެވެ.
ކޭން ނުގަނެ ހޮއިލުންޑް ގަތުމާ ގުޅޭގޮތުން ނޫސްވެރިން ސުވާލުކުރުމުން ޓެން ހާގް ބުނީ އެ ކުލަބުން ގަތް ކުޅުންތެރިއާއަކީ ވެސް ހުނަރުވެރި މޮޅު ކުޅުންތެރިއެއް ކަމަށާއި، ކޭން ނުލިބުމަކީ މާޔޫސްވާ ކަމެއް ނޫން ކަމަށެވެ.
އޭނާ ބުނީ ހޮއިލުންޑް ދައްކަމުން އަންނަ ކުޅުމާމެދު ހިތްހަމަޖެހޭ ކަމަށާއި، އާ ކުލަބެއްގައި އާ ކުޅުންތެރިންނާ އެކު ކުޅެން ހޭނެން ޒުވާން ކުޅުންތެރިންނަށް ވަގުތު ބޭނުންވާ ކަަމަށެވެ. މި ގޮތުން އެކަށީގެންވާ ވަގުތު ހޮއިލުންޑަށް ދެވިއްޖެނަމަ އޭނާއަކީ ކުލަބަށް ކާމިޔާބު ހޯދައިދެވޭނެ ކުޅުންތެރިއެއް ކަމަށް ވެސް ޓެން ހާގް ބުންޏެވެ.
އެންމެ ފަހުން ކުޅުނު ތިން މެޗުންވެސް ބަލިވެ މިވަގުތު ހޫނު ފެނުގައިހުރި ޓެން ހާގް ބުނީ ސީޒަންގެ ކުރީކޮޅު މިކަހަލަ ނަތިޖާތަކެއް ނުކުތުމަކީ މައްސަލައެއް ނޫން ކަމަށާއި، ކުލަބުގެ މުހިންމު ކުޅުންތެރިންތަކެއް އަނިޔާގައި ތިބި މި ދަނޑިވަޅުގައި ހުރިހާ ސަޕޯޓަރުންވެސް ޓީމާ އެކު ތިބޭނެ ކަމަށް އުއްމީދުކުރާ ކަމަށެވެ.
