މިއާމީ، ޔުނައިޓެޑް ސްޓޭޓްސް (ސެޕްޓެމްބަރު 22) - މިދިޔަ އަހަރު އާޖެންޓީނާއާ އެކު ހޯދި ފީފާ ވޯލްޑް ކަޕްގެ ކާމިޔާބީ، އޭރު އޭނާ ކުޅުނު ކުލަބު ފްރާންސްގެ ޕީއެސްޖީ އިން ފާހަގަނުކުރާ ކަމަށް ބުނެ ލިއޮނަލް މެސީ އެ ކުލަބަށް ފާޑުކިޔައިފި އެވެ.
އާޖެންޓީނާ އަށް 2022ގެ ވޯލްޑް ކަޕް ކާމިޔާބުކޮށްދިން މެސީ އަކީ އެ މުބާރާތުގެ އެންމެ މޮޅު ކުޅުންތެރިޔާ އެވެ. އޭނާގެ ކެރިއަރުގައި ނުލިބޭ ހަމައެކަނި ޓްރޮފީ މެސީ ކާމިޔާބުކުރީ ފްރާންސްގެ ޗެމްޕިއަން ޕީއެސްޖީގެ ކުޅުންތެރިއެއްގެ ގޮތުގައި ހުރެ އެވެ.
ނަމަވެސް ވޯލްޑް ކަޕަށް ފަހު މެސީ ޕީއެސްޖީ ދޫކޮށްލަން އުޅޭ އަޑު ގަދަވި އެވެ. އޭނާގެ ކުރީގެ ކުލަބު، ސްޕެއިންގެ އެފްސީ ބާސެލޯނާ އާއި ސައުދީ އަރަބިއްޔާގެ ކުލަބުތަކުން މެސީ ގެންދަން މަސައްކަތްކުރި ނަމަވެސް ފަހު ވަގުތު މެސީ ނިންމީ، އެމެރިކާގެ އިންޓަ މަޔާމީ އަށް ބަދަލުވާށެވެ.
އެ ކުލަބާ އެކު ރަނގަޅު ކުޅުމެއް ދައްކަމުން އަންނަ މެސީ ވަނީ ދާދި ފަހުން ޕީއެސްޖީގައި އޭނާ އަށް "އިހުތިރާމް ނުލިބޭކަން" ހާމަކޮށް ވާހަކަދައްކައިފަ އެވެ.
މެސީ ބުނީ ވޯލްޑް ކަޕް ކާމިޔާބުކުރި އާޖެންޓީނާގެ ކޮންމެ ކުޅުންތެރިއަކު ކުޅުނު ކުލަބުން އެކަން ފާހަގަކޮށް އެކަމަށް ކުޅުންތެރިންނަށް މަރުޚަބާ ކިޔާފައިވާ ކަމަށެވެ. ނަމަވެސް ޕީއެސްޖީން އޭނާ އަށް އެ އިހުތިރާމާއި ލޯބި ލިބިފައި ނުވާ ކަމަށެވެ.
"އަހަރެންނަށް ޕީއެސްޖީއާއެކު މާ ބޮޑެތި ކާމިޔާބީތަކެއް ނުލިބުނަސް ދުނިޔޭގެ ޗެމްޕިއަންކަން ލިބުނީ އެކުލަބުގައި ހުއްޓާ. ދުނިޔޭގެ ޗެމްޕިއަންކަން ލިބުނު ކުޅުންތެރިންގެ ތެރެއިން ކުލަބުން އެކަން ފާހަގަނުކުރާ ހަމައެކަނި ކުޅުންތެރިއަކީ އަހަރެން" ދެ އަހަރު ޕީއެސްޖީއަށް ކުޅުމަށްފަހު އެކުލަބު ދޫކޮށްލި މެސީ ބުންޏެވެ.
ގިނަ ޓީމްތަކުގެ ކުލަބުގެ ރަސްމީ މެޗުތަކުގެ ކުރިން ޗެމްޕިއަންކަން ހޯދި އާޖެންޓީނާގެ ކުޅުންތެރިންގެ ޝަރަފުގައި ހަރަކާތްތައް ބޭއްވިއިރު، އާޖެންޓީނާގެ ކެޕްޓަން މެސީ ކުޅުނު ޕީއެސްޖީން އޭނާ އަށް މަރުޚަބާ ކިޔާފައިވަނީ ހަމައެކަނި ޕްރެކްޓިސްގަ އެވެ.
އެ ގޮތުން ވޯލްޑް ކަޕަށް ފަހު މެސީ ޕީއެސްޖީއާ ގުޅުނު ޕްރެކްޓިސްގައި އެކުލަބުން އޭނާ އަށް "ގާޑް އޮފް އޮނާ"އެއް އެރުވި އެވެ.
ޕީއެސްޖީ ދޫކޮށް މެސީ ވަނީ އެމެރިކާ ލީގަށް ބަދަލުވެ، އިންޓަ މިއާމީއާ އެކު ރަނގަޅު ކުޅުމެއް މިހާތަނަށް ދައްކައިފަ އެވެ. އެންމެ ފަހުން ލީގުގައި ޓޮރޮންޓޯއާ ދެކޮޅަށް ކުޅުނު މެޗުގެ ފުރަތަމަ އެގާރައިގައި މެސީ ކުޅުނު ނަމަވެސް މެޗުގެ ކުރީކޮޅު އޭނާއަށް އަނިޔާވެ ވަނީ ބަދަލުކޮށްފަ އެވެ.
މެސީ އަށް އެނބުރި ކުޅުމުގެ ތެރެއަށް އާދެވޭނެ ދުވަހެއް އަދި ބުނަން ނޭނގޭ ކަމަށް އިންޓަ މިއާމީ އިން ހާމަކުރެ އެވެ.
