މިއުނިކް (ސެޕްޓެމްބަރު 21) - ޔުއެފާ ޗެމްޕިއަންސް ލީގުގައި ރޭ ރެއާލް މެޑްރިޑާއި އާސެނަލް ކުޅުނު މެޗުތަކުން މޮޅުވިއިރު، ބަޔާން މިއުނިކުން 4-3 އިން މެންޗެސްޓާ ޔުނައިޓެޑް ބަލިކޮށްފި އެވެ.
އާސެނަލުން ވަނީ ހަ އަހަރު ތެރޭ ޗެމްޕިއަންސް ލީގުގައި ކުޅުނު ފުރަތަމަ މެޗުން ނެދަލެންޑްސްގެ ޕީއެސްވީ އައިންދޯވަން އަތުން 4-0 އިން މޮޅުވެފަ އެވެ. ޖަރުމަނުގެ ޔޫނިއަން ބާލިން އަތުން ރެއާލް މެޑްރިޑް 1-0 އިން މޮޅުވިއިރު، މެޗުގެ ހަމައެކަނި ގޯލު ޖެހީ އިތުރު ވަގުތުގައި ރެއާލްގެ އިނގިރޭސި މިޑްފީލްޑަރު، ޖޫޑް ބެލިންހަމް އެވެ.
އަމިއްލަ ދަނޑުގައި ކުޅުނު އާސެނަލުން މެޗުގެ ފުރަތަމަ ހާފު ވެސް ނިންމާލީ ތިން ގޯލުގެ ލީޑެއްގަ އެވެ. އެ ގޮތުން، އަށް ވަނަ މިނިޓްގައި ބުކާޔޯ ސަކާ އާސެނަލަށް ލީޑުނަގައިދިންއިރު، 20 ވަނަ މިނިޓްގައި ލެއަންދްރޯ ޑްރޮސާޑް ވަނީ ދެ ވަނަ ގޯލު ޖަހައިދީފަ އެވެ. ފުރަތަމަ ހާފު ނިމުމުގެ އަށް މިނިޓް ކުރިން، މެޗުގެ 38 ވަނަ މިނިޓްގައި އާސެނަލްގެ ތިން ވަނަ ގޯލު ޖެހީ ގަބްރިއެލް ޖޭސޫސް އެވެ.
ދެ ވަނަ ހާފުގައި އާސެނަލްގެ ފަހު ގޯލު ޖެހީ އެ ޓީމުގެ ކެޕްޓަން މާޓިން އޮޑެގާޑް އެވެ.
އާސެނަލް ގްރޫޕްގެ އަނެއް މެޗުން ސެވިއްޔާ އާއި ލޯންސް ވަނީ 1-1 އިން އެއްވަރުވެފަ އެވެ.
އަމިއްލަ ދަނޑުގައި ކުޅުނު ބަޔާން އިން ވަނީ ރޭގެ މެޗުގެ ފުރަތަމަ ހާފުގައި ސާޖް ގްނަބްރީ އާއި ލެރޯއި ސާނޭ ޖެހި ގޯލުތަކުން ދެ ލަނޑުގެ ލީޑެއްނަގަައިފަ އެވެ. ދެ ވަނަ ހާފުގެ ކުޅުން ފެށިތާ ހަތަރު މިިނިޓް ތެރޭ ޔުނައިޓެޑްގެ ރަސްމުސް ހޮއިލުންޑް ގޯލެއް ޖަހައި އެ ޓީމަށް އުންމީދެއް ހޯދައިދިނެވެ. އެކަމަކު، ޔުނައިޓެޑުން ދިން ޕެނަލްޓީއެއް ގޯލަށް ވައްދާލައި، ހެރީ ކޭން ވަނީ ބަޔާނަށް އަލުން ދެ ގޯލުގެ ލީޑެއް ނަގައިދީފަ އެވެ.
މެޗުގެ 88 ވަނަ މިނިޓްގައި ޔުނައިޓެޑްގެ ކަސެމީރޯ ގޯލެއް ޖަހައި ފަރަގުކުޑަކުރިއިރު، އިތުރު ވަގުތުގެ ދެ ވަނަ މިނިޓްގައި ބަޔާންގެ މަތީސް ޓެލް ވަނީ އެ ޓީމުގެ ހަތަރު ވަނަ ގޯލު ޖަހައިދީ، ތިން ޕޮއިންޓް ހޯދަން ހިތްވަރުހޯދައިދީފަ އެވެ. ޔުނައިޓެޑުން އިތުރު ވަގުތުގެ ބާކީ އޮތް ވަގުތުގައި އެއް ގޯލު ޖެހުނުއިރު، ނަތީޖާ ހަމަހަމަކުރަން އިތުރު ގޯލެއް ނުޖެހުނެވެ. ޔުނައިޓެޑްގެ ފަހު ގޯލު ޖެހީ ދެ ވަނަ ގޯލު ވެސް ޖެހި ކަސެމީރޯ އެވެ.
މި ގްރޫޕްގެ އަނެއް މެޗުން ގަލަސަތަރާއި އާއި ކޯޕެންހާގެން ވަނީ 2-2 އިން އެއްވަރުވެފަ އެެވެ.
ގްރޫޕް ޑީގައި ރޭ އޮސްޓްރިއާގެ އާރްބީ ސަލްޒްބާގުން ވަނީ ރަށުންބޭރުގައި 2-0 އިން ބެންފީކާ ބަލިކޮށްފަ އެވެ. އެ ގްރޫޕްގެ އަނެއް މެޗުން މިދިޔަ އަހަރުގެ ފައިނަލުގައި ކުޅުނު އިންޓަ މިލާން ވަނީ 1-1 އިން ރެއާލް ސޮސިއެޑާޑާ އެއްވަރުވެފަ އެވެ.
