ވެރިކަން ކުރުމުގެ ނިޒާމުގެ ފެންނަ ނުފެންނަ ވޯޓާ ގުޅޭ ގޮތުން އެމްޑީޕީން ރަސްމީ ޖަވާބެއް ދީފައިނުވާ ކަމަށް ޑިމޮކްރެޓްސްގެ އިންތިގާލީ ޗެއާޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވިދާޅުވެއްޖެ އެވެ.
ރިޔާސީ އިންތިހާބުގެ ފުރަތަމަ ބުރުގައި ތިންވަނައަށް އެންމެ ގިނަ ވޯޓު ހޯދި ޑިމޮކްރެޓްސްއިން ދެވަނަ ބުރުގައި ކޯލިޝަން ހެދުމުގައި ހުށަހަޅާ ޝަރުތަކީ ދެވަނަ ބުރުގެ ކުރިން ނިޒާމު ބަދަލުކުރުމާ މެދު ފެންނަ ނުފެންނަ ވޯޓެއް ނެގުމަށް އެއްބަސްވުމެވެ.
ދެވަނަ ބުރުގެ ފަހުން ނިޒާމުގެ ވޯޓު ނެގުމުގައި މައްސަލައެއް ނެތް ކަމަށް އެމްޑީޕީން ބުނެފައިވާއިރު ހަސަން "އަދަދު" ނޫހަށް ވިދާޅުވީ އެމްޑީޕީން މިހާތަނަށް އެއްވެސް ސިފައެއްގައި ރަސްމީ ޖަވާބެއް ދީފައި ނުވާ ކަމަށެވެ.
"މިރޭ އޮންނާނެ މި ޕާޓީގެ އިންޓެރިމް ކައުންސިލް، މިރޭ ބާއްވާ ކައުންސިލް ބައްދަލުވުމުގައި ކައުންސިލް މެންބަރުން ނިންމާނީ ދެން މީގައި ގޮތެއް،" މީގެ ކުރިން އެމްޑީޕީގެ ޗެއާޕާސަން ކަން ވެސް ކުރައްވާފައިވާ ހަސަން ވިދާޅުވި އެވެ.
ދެވަނަ ބުރަށް ޑިމޮކްރެޓްސް އިން ނަގާ ސްޓޭންޑް ކަނޑައެޅުމަށް ބާއްވާ ޕާޓީގެ އިންޓެރިމް ކައުންސިލްގެ ބައްދަލުވުން ފަށަނީ މިރޭ 9:00 ޖަހާއިރެވެ.
ރިޔާސީ އިންތިހާބުގެ ފުރަތަމަ ބުރުގައި އެއްވެސް ކެންޑިޑޭޓަކަށް 50 ޕަސެންޓަށް ވުރެ ގިނަ ވޯޓު ލިބިފައި ނެތް އިރު އެންމެ ގިނަ ވޯޓު ލިބިވަޑައިގަތީ އިދިކޮޅު ޕީއެންސީގެ ކެންޑިޑޭޓު ޑރ. މުހައްމަދު މުއިއްޒަށެވެ. މުއިއްޒަށް 101،635 ވޯޓު ލިބިވަޑައިގަތެވެ. އެއީ ވޯޓުލީ މީހުންގެ 46 ޕަސެންޓެވެ.
އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 86،161 ވޯޓެވެ. އެއީ 39 ޕަސެންޓެވެ. ތިން ވަނައަށް އެންމެ ގިނަ ވޯޓު ހޯއްދެވި ޑިމޮކްރެޓްސްގެ ކެންޑިޑޭޓު އަދި މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބަށް 15،839 ވޯޓު ލިބިވަޑައިގަތެވެ.
ޑިމޮކްރެޓްސްއަކީ ޖެނުއަރީ 28، ގައި ބޭއްވި އެމްޑީޕީގެ ރިޔާސީ ޕްރައިމަރީން މުހައްމަދު ނަޝީދަށް ލިބިވަޑައިގެންނެވި ނާކާމިޔާބީއަށް ފަހު އެމްޑީޕީގައި ތިބެގެން ސަރުކާރާ ދެކޮޅަށް މަސައްކަތް ކުރަން ފެށުމުން އެމްޑީޕީން ވަކިކުރަން އުޅޭ ކަން އެނގުމުން ނަޝީދުގެ ސަޕޯޓަރުން އުފެއްދި ޕާޓީއެކެވެ.
އެމްޑީޕީގެ ރައީސްގެ މަގާމުގައި ހުންނެވުމަށް ފަހު ޕާޓީ ދޫކުރައްވައި ޑިމޮކްރެޓްސްއާ ގުޅިވަޑައިގެންނެވި ނަޝީދު ވެސް މި ފަހުން ވިދާޅުވެފައިވަނީ އެމްޑީޕީގެ ޖަވާބަކަށް އިންތިޒާރުކޮށްގެން ނުތިބެވޭނެ ކަމަށެވެ. އަދި ވީހާވެސް އަވަހަކަށް ކޮންމެ ވެސް އެއް ގޮތެއް ޑިމޮކްރެޓްސް އިން ނިންމަން ޖެހޭ ކަމަށެވެ.
މީގެ ކުރިން ޕީޕީއެމް/ޕީއެންސީ ކޯލިޝަނާ އެކު ނިޒާމީ ވޯޓާ ގުޅޭ ގޮތުން މަޝްވަރާ ކުރި ނަމަވެސް އެއްބަސްވުމެއްގައި ސޮއިކުރުމަށް ދެކޮޅު ހަދާފައިވާތީ އެ މަޝްވަރާތައް ހުއްޓިފައިވާ ކަމަށް ހަސަން ލަތީފު މީގެ ކުރިން ވިދާޅުވެފައިވެ އެވެ.
ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލުކުރުމަށް އެމްޑީޕީގެ ކުރީގެ ލީޑަރު އަދި ޑިމޮކްރެޓްސްގެ ބާނީ މުހައްމަދު ނަޝީދު ވަކާލާތު ކުރައްވަ އެވެ. 2007 ގައި ބޭއްވި ރައްޔިތުންގެ ފެންނަ ނުފެންނަ ވޯޓުގައި ނަޝީދާއި އޭރު އެމަނިކުފާނު ލީޑުކުރެއްވި އެމްޑީޕީން ވެސް ތާއީދުކުރީ ބަރުލަމާނީ ނިޒާމަކަށެވެ.
ނަމަވެސް ރައީސް ސޯލިހު ވެރިކަމާ ހަވާލުވެވަޑައިގަތް ފަހުން އެމަނިކުފާނާއި ނަޝީދާ ދެމެދު ގިނަ ކަންކަމުގައި ހިޔާލު ތަފާތުވުން އުފެދުނު އިރު ހިޔާލު ތަފާތުވި އެއް ކަމަކީ ވެސް ވެރިކަމުގެ ނިޒާމުގެ މައްސަލަ އެވެ.
