ހުޅުމާލޭގެ ދެވަނަ ފިޔަވަހީގެ އެންމެ އުތުރުން ޓޫރިޒަމް އައިލެންޑްގެ ގޮތަށް އާބަންކޯ އިން ތަރައްގީކުރާ "އާބަން އައިލް"ގައި ބުޓީކް ހޮޓެލް ތަރައްގީކޮށް ހިންގުމަށް ތިން ބިމެއް ބިޑަށް ހުޅުވާލައިފި އެވެ.
އާބަންކޯއިން ކުރި އިއުލާނުގައި ވާގޮތުން މި ބުޓީކް ހޮޓެލް ތަރައްގީކުރަން ދޫކުރާ ބިންތަކަކީ 4،246-5،413 އަކަފޫޓާ ދެމެދުގެ ބިންތަކެވެ. މި ބިންތަކުގެ އިކުއިޒިޝަން އަގުގެ ގޮތުގައި ކަނޑައަޅާފައިވާ އެންމެ ދަށް އަގަކީ އަކަފޫޓަކަށް 22.15 ޑޮލަރެވެ.
މި ރޭޓުން ބަލާއިރު އެންމެ ކުޑަ ބިމުގެ އިކިއުޒިޝަން ކޮސްޓަށް މަދުވެގެން 94،049.786 ޑޮލަރު ދައްކަންޖެހޭނެ އެވެ. އަދި މި އަގު ދައްކަންޖެހޭނީ އެމެރިކާ ޑޮލަރުން ކަމަށް އިއުލާނުގައި ވަނީ ބުނެފަ އެވެ.
ބިމުގެ ސައިޒުތައް
- ލޮޓް ނަންބަރު 21742 / 4،246.04 އަކަފޫޓޫގެ ބިމެއް
- ލޮޓް ނަންބަރު 21747 / 4،926.46 އަކަފޫޓުގެ ބިމެއް
- ލޮޓް ނަންބަރު 21748 / 5413.38 އަކަފޫޓުގެ ބިމެއް
އާބަންކޯއިން މި ބިންތައް ލީސްކުރަނީ 50 އަހަރުގެ މުއްދަތަކަށެވެ. އަދި މި ބިންތަކުގައި ހަ ފަންގިފިލާއަށް އިމާރާތްކުރެވޭއިރު އިމާރާތްކުރުމަށް ދެނީ ބިން ހަވާލުކުރާތާ ދެ އަހަރުގެ މުއްދަތެކެވެ.
އޭގެ އިތުރުން މި ބިންތަކަށް ޕްރޮޕޯސަލް ހުށަހެޅުމުގެ ފުރުސަތު ބޭރުގެ އިންވެސްޓަރުންނަށް ވެސް ވަނީ ހުޅުވާލާފަ އެވެ. ނަމަވެސް އާބަންކޯއިން މީގެ ކުރިން ބުޓީކް ހޮޓެލް ހެދުމަށް ދޫކުރި ބިމެއް ކުއްޔަށް ނަގާފައިވާ ފަރާތަކަށް ނުވަތަ ކުންފުންޏެއްގެ ޝެއާ ހޯލްޑަރަކަށް ވެސް މި ބިންތަކަށް ބިޑު ނުކުރެވޭނެ އެވެ.
މި ބިޑާ ބެހޭ އިތުރު މައުލޫމާތު އާބަންކޯގެ ވެބްސައިޓުން ލިބެން ހުންނާނެވެ އެވެ.
އާބަން އަައިލްގެ ނަމުގައި ދެ ވަނަ ފިޔަވަހީގައި ތަރައްގީކުރާ ޓޫރިޒަމް ޒޯނަށް ޖުމްލަ 23 ހެކްޓަރުގެ ކަނޑައަޅާފައިވާއިރު މި ޕްރޮޖެކްޓު ވެގެންދާނީ ރާއްޖޭގެ އިގްތިސާދަށް އިންގިލާބީ ޕްރޮޖެކްޓަކަށް ކަމަށް އާބަންކޯ އިން ވަނީ ބުނެފަ އެވެ.
އެގޮތުން، އެ ޕްރޮޖެކްޓުގެ ސަބަބުން ސީދާ އަދި ނުސީދާ ގޮތުން ގިނަ ދާއިރާތަކަށް ފައިދާވެ ގިނަ ވަޒީފާތަކެއް އުފެދިގެން ދާނެ ކަމަށާއި މި ރަށް ވެގެންދާނީ ރާއްޖޭގެ އިގުތިސާދީ މައި ހަބު ކަމަށް އެ ކުންފުނިން ބުނެ އެވެ.
ރަސްމީ ވައިގެ ބަނދަރާއި ގުޅިފައިވާ ރަށެއް ކަމުން އާބަން އައިލް ވެެގެންދާނީ ކުރު އަދި ދިގު މުއްދަތުގެ ސްޓޭޓަކަށް ވެސް އެކަށޭނަ މަންޒިލަކަށް ކަމަށާއި އާބަން އައިލް ގައި އަޅާ އެކޮމޮޑޭޝަންތަކުގެ ތެރޭގައި ލަގްޒަރީ ވިލާ، ސާވިސް އެޕާޓްމަންޓް، ސިޓީ ހޮޓެލް، މިޑްސްކޭލް އަދި އަޕްސްކޭލް ހޮޓެލް އާއި ގެސްޓް ހައުސްތަކުގެ އިތުރުން ބްރޭންޑަޑް ރީޓެއިލް އަދި މަތީ ފަންތީގެ ރެސްޓޯރަންޓްތައް ވެސް ގާއިމުކުރާނެ ކަމަށް އެޗްޑީސީއިން ބުނެ އެވެ.
