ރިޔާސީ އިންތިހާބުގެ ދެ ވަނަ ބުރަށް ދިޔަ ކެންޑިޑޭޓަކާއެކު ކޯލިޝަން ހެދުމުގެ ކުރިން ދެ ކެންޑިޑޭޓުންނަށް ވެސް އެ އިންތިހާބުގައި ވާދަ ކުރައްވައި ތިންހާހެއްހާ ވޯޓު ހޯއްދެވި ފާރިސް މައުމޫން ޝަރުތުތަކެއް މިއަދު ހުށަހަޅުއްވައިފި އެވެ.
ސެޕްޓެމްބަރު 30، ގައި ބާއްވާ އިންތިހާބުގެ ދެ ވަނަ ބުރުގައި ވާދަ ކުރައްވާ ރައީސް އިބްރާހިމް މުހައްމަދު ސޯލިހު އަދި އިދިކޮޅު ޑރ. މުހައްމަދު މުއިއްޒަށް ވެސް ފާރިސް ހަތް ޝަރުތެއް ހުށަހެޅުއްވިއިރު އޭގެ ތެރޭގައި ރިޔާސީ ނިޒާމެއް ނޫން ނިޒާމަކަށް ތާއީދު ނުކުރުން ހިމެނެ އެވެ.
އޭގެ ތެރޭގައި، އިިންޑިއާއާކު ހަދާފައި ހުރި އެއްބަސްވުންތަކުގެ ތެރެއިން އުތުރުތިލަފަޅު އެއްބަސްވުމާއި ހަނިމާދޫ އެއާޕޯޓު އެއްބަސްވުމާއި އައްޑޫ އެއާޕޯޓް އެގްރީމެންޓާއި އައްޑޫ ޕޮލިސް އެކަޑެޓީ އެގްރިމެންޓު ހާމަ ކުރުން ހިމެނެ އެވެ.
ފާރިސްއާއެކު ކޯލިޝަން ހަދަން ހުށަހަޅާފައި ވަނީ ދެ ޕާޓީން އިސްވެ ކަމަށް އޭނާ ވިދާޅުވެ އެވެ.
އެއްވެސް ގައުމެއްގެ އަސްކަރީ ދިވެހިރާއްޖޭގައި އުޅޭތޯ އާއި އުޅޭ ނަމަ އޭގެ ބޭނުން ހާމަ ކުރަން ވެސް ފާރިސް އެދެ އެވެ. އަދި ވަކި ގައުމަކަށް ބުރަނުވާ ހާރިޖީ ސިޔާސަތެއް ގެންގުޅުމާއި ޗާގޯސް މައްސަލައިގައި ރާއްޖޭގެ ސްޓޭންޑު ބަދަލު ކުރުން ވެސް ހިމެނެ އެވެ.
އޭގެ އިތުރުން، ގައުމީ ތަރައްގީގެ ޕްލޭނެއް ހެދުމާއި ރައްޔިތުންގެ މަޖިލީސް އިސްލާހު ކުރުމާއި ދައުލަތުން ދޭ ހިދުމަތްތަކުން ސިޔާސީ ފައިދާ ނުނެގުމަށް ވެސް ފާރިސް އޮތީ ޝަރުތު ކުރައްވައިފަ އެވެ.
ސެޕްޓެމްބަރު 9، ގައި ބޭއްވި އިންތިހާބުގެ ފުރަތަމަ ބުރުގައި އެންމެ ގިނައިން ވޯޓު ހޯއްދެވީ ޑރ. މުއިއްޒެވެ. އޭނާއަށް 46 ޕަސެންޓު ވޯޓު ލިބިވަޑައިގަތެވެ. ރައީސް ސޯލިހަށް ލިބިވަޑައިގަތީ 36 ޕަސެންޓު ވޯޓެވެ. ފާރިސްއަށް ލިބިވަޑައިގަތީ 1.3 ޕަސެންޓު ވޯޓެވެ. ޖުމްލަ އަށް ކެންޑިޑޭޓުން އިންތިހާބުގައި ވާދަ ކުރެއްވިއިރު އޭނާ ވަޑައިގަތީ ހަ ވަނައަށެވެ.
