ރައީސުލްޖުމްހޫރިއްޔާގެ އިބްރާހިމް މުހައްމަދު ސޯލިހުގެ އަނބިކަނބަލުން، ފަޒްނާ އަހުމަދު މިއަދު ހިޔާ ޓަވަރުތަކަށް ދޮރުން ދޮރަށް ހިންގެވުމަށް ވަޑައިގަތުމުން ބަޔަކު އެކަމަނާއާ ދެކޮޅަށް އަޑު އުފުލައި، މުޒާހަރާކޮށްފި އެވެ.
ސޯޝަލް މީޑިއާގައި އެ މަންޒަރުތައް ފެންނަ ވީޑިއޯތައް މިހާރު ވަނީ އާންމުވެފަ އެވެ. އެ ވީޑިއޯތަކުން ފެންނަ ގޮތުގައި ފަޒްނާ އެ ސަރަހައްދުގައި އުޅުއްވި ވަގުތު، ބަޔަކު ވަނީ އެކަމަނާއާ ދެކޮޅަށް އަޑު އުފުލައި، ހަޑިހުތުރު ބަސް ގޮވައިފަ އެވެ.
ހިޔާ ސަރަހައްދުން ފުލުހުން ވަނީ މިއަދު މީހަކު ވެސް ހައްޔަރުކޮށްފަ އެވެ. އޭނާ ހައްޔަރު ކުރީ އެތަނުގައި ހަމަނުޖެހުން ހިންގައިގެން ކަމަށް ފުލުހުން ބުނެ އެވެ.
ހިޔާ ޓަވަރުތަކަކީ ކުރީގެ ރައީސް އަބްދުﷲ ޔާމީން އެޅި އިމާރާތްތަކެކެވެ. ހިޔާގެ 16 ޓަވަރު ހެދިއިރު، ކޮންމެ ޓަވަރެއްގައި 25 ބުރި ހުރެ އެވެ.
ސެޕްޓެމްބަރު 9، ގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި ރައީސް ސޯލިހަށް ލިބިވަޑައިގަތީ ވޯޓުލީ އާބާދީގެ 39 ޕަސެންޓެވެ. އިދިކޮޅު ކެންޑިޑޭޓް ޑރ. މުހައްމަދު މުއިއްޒަށް 46 ޕަސެންޓު ވޯޓު ލިބިވަޑައިގަތެވެ.
އެ ދެ ކެންޑިޑޭޓުންނާއެކު އިތުރު ހަ ބޭފުޅަކު އިންތިހާބުގައި ވާދަ ކުރިއިރު ތިން ވަނައަށް އެންމެ ގިނަ ވޯޓު ލިބުނީ ދަ ޑިމޮކްރެޓްސްގެ އިލްޔާސް ލަބީބަށެވެ. އެކަމަކު އޭނާއަށް ހޯދުނީ އެންމެ ހަތް ޕަސެންޓު ވޯޓެވެ.
