ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ ހުންނަވާ އުފެއްދި ދަ ޑިމޮކްރެޓްސް ޕާޓީގެ ޕާލިމެންޓަރީ ގްރޫޕް (ޕީޖީ) ގެ ލީޑަރަކަށް މެދުހެންވޭރު ދާއިރާގެ މެމްބަރު އަލީ އާޒިމް ހޮވައިފި އެވެ.
ޑިމޮކްރެޓުންގެ ޕީޖީ ގްރޫޕުގެ އިސް މަގާމުތަކަށް މެންބަރުން އައްޔަންކުރުމަށް ބޭއްވި އިންތިހާބު ބޭއްވީ މިއަދު އެވެ. އެ ވޯޓުގައި ބައިވެރިވެފައިވަނީ ރައްޔިތުންގެ މަޖިލީހުގެ ޑިމޮކްރެޓްސްއަށް ނިސްބަތްވާ 11 މެންބަރުންނެވެ.
އާޒިމްގެ އިތުރުން، ޑިމޮކްރެޓުންގެ ޕީޖީގެ ނައިބު ލީޑަރުންގެ ގޮތުގައި ގައްދޫ ދާއިރާގެ މެމްބަރު އަހުމަދު ޒާހިރު އަދި، މާފަންނު މެދު ދާއިރާގެ މެމްބަރު އިބްރާހިމް ރަޝީދު ވަނީ ހޮވާފަ އެވެ. އަދި އެ ޕީޖީގެ ގްރޫޕުގެ އަމީންއާންމުގެ ގޮތުގައި އުނގޫފާރު ދާއިރާގެ މެމްބަރު މުހައްމަދު ވަހީދު އަދި ވިޕުގެ މަގާމަށް މައްޗަންގޯޅި އުތުރު ދާއިރާގެ މެންބަރު މުހައްމަދު ރަޝީދު ވަނީ ހޮވާފަ އެވެ.
މި ހުރިހާ މަގާމުތަކަށް އެބޭފުޅުން ހޮވުނީ ވޯޓުގައި ބައިވެރިވެލެއްވި 11 މެންބަރުންގެ އިއްތިފާގުންނެވެ. ޑިމޮކްރެޓްސް އަކީ، މިދިޔަ ޖެނުއަރީ 28، ގައި ބޭއްވި އެމްޑީޕީގެ ރިޔާސީ ޕްރައިމަރީން އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނާކާމިޔާބުވި ފަހުން ސަރުކާރާ ދެކޮޅަށް ޕާޓީ ތެރޭގައި މަސައްކަތްތަކެއް ކުރަމުން ދަނިކޮށް ފިޔަވަޅު އަޅަން ފެށުމުން އުފެއްދި ޕާޓީއެކެވެ.
އެ ޕާޓީން ހޮނިހިރު ދުވަހު ބޭއްވި ރިޔާސީ އިންތިހާބުގައި ވާދަކޮށް ހަތް އިންސައްތަ ވޯޓާއެކު ވަނީ ތިންވަނަ ހޯދާފަ އެވެ. އިންތިހާބުގެ ދެވަނަ ބުރު މި މަހު 30 ގައި އޮންނައިރު އެ ބުރުގައި އެކުގައި މަސައްކަތް ކުރުމަށް އެންމެ ގިނައިން ވޯޓު ހޯދި ޕީޕީއެމް ކޯލިޝަން އަދި އެމްޑީޕީ އާއެކު ޑިމޮކްރެޓުން ދަނީ ނުރަސްމީ މަޝްވަރާތައް ކުރަމުންނެވެ.
