ރައްޔިތުންގެ މަޖިލީހުގެ ރައީސް މުހައްމަދު ނަޝީދު އާއި ނައިބު ރައީސް އީވާ އަބްދުﷲގެ އިތުބާރު ނެތް ކަމަށް އެމްޑީޕީން ހުށަހެޅި މައްސަލަ އަނބުރާ ނަގަން އެ ޕާޓީގެ ޕާލިމެންޓްރީ ގްރޫޕުން މިއަދު ނިންމައިފި އެވެ.
އެމްޑީޕީގެ ޕާލިމެންޓްރީ ގްރޫޕުގެ ލީޑަރު މުހައްމަދު އަސްލަމް ވިދާޅުވީ މައްސަލަތައް އަނބުރާ ނަގަން ނިންމީ "މިވަގުތު ކަންކަން އޮމާންކޮށް ގެންދިއުމަށް" ކަަމަށެވެ.
ޕާލިމެންޓްރީ ގްރޫޕުގެ އަޣުލަބިއްޔަތުން އިތުބާރު ނެތްކަމުގެ މައްސަލަތައް އަނބުރާ ނަގަން ފާސްކުރިއިރު، އެ މައްސަލަ މާދަމާގެ ޖަލްސާ އަށް ވަނީ އެޖެންޑާ ކޮށްފަ އެވެ. ނަމަވެސް އެ ދެ މައްސަލަ މާދަމާގެ ޖަލްސާގައި ދެން ކުރިއަށް ނުގެންދާނެ އެވެ.
މަޖިލީހުގެ ޖަލްސާތައް ކުރިއަށް ގެންދިޔުން ހުއްޓުމަކަށް އައީ ރިޔާސީ އިންތިހާބު ބޯމަތިވެފައި އޮތްވައި، އެމްޑީޕީގެ ތެރޭގައި ބައިބައިވުން އުފެދި، ނަޝީދު އާއި އީވާގެ އިތުބާރު ނެތް ކަމަށް ހުށަހެޅި ހިސާބުންނެވެ.
އެމްޑީޕީގެ ތެރޭގައި އުފެދުނު މައްސަލަތަކާއެކު ނަޝީދު މަޖިލީހުގެ ރިޔާސަތުން ވަކިކުރަން އެމްޑީޕީން ޖޫން ހަ ވަނަ ދުވަހު ހުށަހެޅީ 50 މެމްބަރުންގެ ސޮއި އާއެކު އެވެ. އޭރު ނަޝީދު ހުންނެވީ އެ ޕާޓީގެ ރައީސް ކަމުގަ އެވެ. ފަހުން އެމަނިކުފާނު ވަނީ އެމްޑީޕީ ދޫކޮށް އަލަށް އުފެއްދެވި ދަ ޑިމޮކްރެޓްސް އާ ގުޅިވަޑައިގެންފަ އެވެ.
