ރައީސް އިބްރާހިމް މުހައްމަދު ސޯލިހުގެ ސަރުކާރުގައި ރާއްޖެއަށް ބޮޑެތި ކުރިއެރުންތަކެއް ހޯދާފައިވާ ކަމަށް ވިދާޅުވެ، އޮސްޓްރޭލިއާގެ ކުރީގެ ފޮރިން މިނިސްޓަރު އެލެކްސެންޑާ ޑައުނާ މިއަދު ދިވެހި ސަރުކާރަށް ތައުރީފު ކުރައްވައިފި އެވެ.
އެލެކްސެންޑާ ޑައުނާ ކުރި ޓުވީޓެއްގައި ވިދާޅުވީ ރައީސް ސޯލިހުގެ ސަރުކާރުގައި ރާއްޖެއަށް އިގްތިސާދީ އަދި އިޖުތިމާއީ ހެޔޮ ބަދަލުތަކެއް ގެނެސް ގައުމު "ސްޓޭބަލައިޒް" ކޮށްފައިވާ ކަމަށެވެ.
އެ ޓުވީޓުގައި ޑައުނާ ވިދާޅުވީ، ރައީސް ސޯލިހުގެ ސަރުކާރުގައި ޑިމޮކްރެސީގެ ހަމަތަކާ އެއްގޮތަށް ވެރިކަން ކުރުމާއި ބައިނަލްއަގުވާމީ ގުޅުންތައް ވަރުގަދަކުރަން އިސްކަމެއް ދީފައިވާ ކަމަށެވެ. ރާއްޖެ އަލުން ކޮމަންވެލްތަށް ގުޅުމުގެ ފުރުސަތު ދިނުމަކީ އެކަމުގެ ނަތީޖާއެއް ކަމަށް ވެސް އޭނާ ވިދާޅުވި އެވެ.
ފަތުރުވެރިކަމުގެ ދާއިރާގެ މުވައްޒަފުންނަށް 10 ޕަސެންޓް ސާވިސް ޗާޖު ދޭން ނިންމުމުން އެ ދާއިރާގެ މުވައްޒަފުންގެ ދިރިއުޅުމުގެ ފެންވަރު ރަނގަޅުވެފައިވާ ކަމަށް ވެސް ޑައުނާ ވިދާޅުވި އެވެ.
އޭގެ އިތުރުން، އޮސްޓްރޭލިއާގެ މިނިމަމް ވޭޖް ގަވައިދުތަކާ އެއްގޮތަށް ރާއްޖެއިން ވެސް މިނިމަމް ވޭޖު ގާއިމް ކުރުމަކީ ވެސް އިގްތިސާދީ ހަމަހަމަކަން ހޯދުމަށް އެޅި މުހިންމު ފިޔަވަޅެއް ކަމަށް ވެސް އޭނާ ވިދާޅުވި އެވެ.
ޑައުނާ ވިދާޅުވީ، ރާއްޖެ އާއި އޮސްޓްރޭލިއާގައި ވެސް ތައުލީމީ ދާއިރާއަށް އިސްކަމެއް ދޭ ކަމަށެވެ. އެގޮތުން، ރާއްޖޭގައި ޑިގްރީއާ ހަމައަށް ހިލޭ ކިޔެވޭއިރު، އެއީ އިގްތިސާދީ ފުރުސަތުތައް ހޯދުމަށް ފަހިވެގެންދާނެ އުސޫލެއް ކަމަށް އޭނާ ވިދާޅުވި އެވެ. މި ސަރުކާރުގައި ޓީޗަރުންގެ މުސާރަ 56 ޕަސެންޓަށް ބޮޑުކޮށްފައިވާތީ އެކަން ވެސް އނާ ފާހަގަކުރެއްވި އެވެ.
ރާއްޖެއަކީ، މުސާރައާއެކު ހަ މަހުގެ މެޓާނިޓީ ލީވް އާއި އެއް މަހުގެ ޕެޓާނިޓީ ލީވް ދޭ މުސްލިމް މަދު ގައުމުތަކުގެ ތެރެއިން ގައުމެއްކަން ވެސް ފާހަގަކުރެއްވި އެވެ. ޑައުނާ ވިދާޅުވީ، ރާއްޖެ ސައިޒުން ކުޑަނަމަވެސް، 21 ވަނަ ގަރުނުގެ މައްސަލަތަކަށް އަދުލުވެރި ހައްލުތައް ހޯދުމަށް ގާނޫނުތައް ވަރުގަދަކުރުމުގެ މަސައްކަތް ވެސް ކުރަމުންދާ ކަމަށެވެ.
ޑައުނާ އޮސްޓްރޭލިއާގެ ފޮރިން މިނިސްޓަރުކަން އަދާކުރެއްވީ 1996 އިން ފެށިގެން 2007 ވަނަ އަހަރާ ހަމައަށެވެ. އޭގެ ކުރިން 1994 އިން ފެށިގެން 1995 ވަނަ އަހަރާ ހަމައަށް އޭނާ އެގައުމުގެ ލިބަރަލް ޕާޓީގެ ލީޑަރުކަން ވެސް ކުރެއްވި އެވެ.
ފޮރިން މިނިސްޓަރުކަން ކުރެއްވުމަށްފަހު ޑައުނާ ފެން ފެނިގެން ދިޔައީ އޮސްޓްރޭލިއާއިން އިނގިރޭސިވިލާތަށް ކަނޑައަޅާފައި ހުންނަވާ ހައި ކޮމިޝަނަރުގެ ގޮތުގަ އެވެ. އެ މަގާމުގައި އޭނާ 2014 ވަނަ އަހަރުން ފެށިގެން 2018 ވަނަ އަހަރާ ހަމައަށް ހުންނެވި އެވެ.
