އެމެރިކާގެ މިނެސޯޓާ ސްޓޭޓްގެ ޖަލެއްގައި ސަތޭކައެއްހާ ގައިދީން ހަޅުތާލުކޮށް ގޮޅިތަކަށް ވަންނަން ދެކޮޅު ހެދުމުން އެމެޖެންސީ ލޮކްޑައުނަކަށް ހިނގައްޖެ އެވެ.
ކްރައިސިސް ނެގޯޝިއޭޝަން ޓީމްގެ މެމްބަރުން ވަނީ އާދީއްތަ ދުވަހު ސްޓިލްވޯޓާ ކަރެކްޝަނަލް ފެސިލިޓީއަށް ގޮސް، މައްސަލަ ހައްލުކުރަން މަސައްކަތް ފަށައިފަ އެވެ.
ޑިޕާޓްމަންޓް އޮފް ކަރެކްޝަންސްގެ ތަރުޖަމާން ވިދާޅުވީ ގައިދީން ހަޅުތާލު ކުރަން ފެށި ސަބަބު ސާފު ނުވާ ކަމަށެވެ. އެހެން ނަމަވެސް، ބެލެވޭ ގޮތުގައި އެއީ ޖަލުގެ ހާލަތު ގޯސްވުމުން ފެށި ހަޅުތާލެކެވެ.
އެގޮތުން ގޮޅިތަކުގައި މާ ބޮޑަށް ހޫނުގަދަވުމާއި، ފެންވެރުމަށް ލިބޭ ފުރުސަތު މަދުވުމާއި، ނުސާފު ބޯފެން ފޯރުކޮށްދިނުން ފަދަ ކަންކަމާ މެދު ގައިދީން ހިތްހަމަނުޖެހުން ފާޅުކުރި އެވެ.
ޖަލު ލޮކްޑައުންކޮށް، އެ ތަަނުގެ ބޭރުގައި އިތުރު ފުލުހުންނާއި، އަލިފާން ނިއްވާ ޓީމުތަކާއި، އެހެން އެމެޖެންސީ ޓީމުތައް ވަނީ ސްޓޭޝަންކޮށްފަ އެވެ.
