ލަންޑަން (ސެޕްޓެމްބަރު 3) - އިނގިރޭސި ޕްރިމިއާ ލީގުގައި މިރޭ ލިވަޕޫލުން 3-0 އިން އެސްޓަން ވިލާ އަތުން މޮޅުވިއިރު، މެޗުގެ އިތުރު ވަގުތުގައި ޖެހި ގޯލުތަކާ އެކު އާސެނަލުން 3-1 އިން މެންޗެސްޓާ ޔުނައިޓެޑް ބަލިކޮށްފި އެވެ.
މިރޭގެ ޕޮއިންޓްތަކާ އެކު، އާސެނަލާއި ލިވަޕޫލުން ވެސް ވަނީ 4 މެޗުން 10 ޕޮއިންޓް ހަަމަކޮށްފަ އެވެ. އެއް ވަނައިގައި އޮތް އެންމެ ފަހުގެ ޗެމްޕިއަން، މެންޗެސްޓާ ސިޓީ އަށް 12 ޕޮއިންޓް ލިބިފައިވާއިރު، ދެ ވަނައިގައި އޮތް ޓޮޓެންހަމް އާއި ތިން ވަނައިގައި އޮތް ލިވަޕޫލް، ހަތަރެއްގައި އޮތް ވެސްޓް ހޭމް ޔުނައިޓެޑާއި ފަސް ވަނައިގައި އޮތް އާސެނަލަށް ވަނީ 10 ޕޮއިންޓް ލިބިފަ އެވެ.
އާސެނަލް ދަނޑުގައި ޔުނައިޓެޑުން މިރޭ 27 ވަނަ މިނިޓްގައި ކްރިސްޓިއަން އެރިކްސަން ދިން ބޯޅައަކުން މާކަސް ރަޝްފޯޑް ލީޑުނަގައިދިނެވެ. އެކަމަކު، އޭގެ ޖެހިގެން އައި މިނިޓްގައި އާސެނަލް އިން ވަނީ މާޓިން އޮޑެގާޑް ހަަމަޖެހިލައިފައި ޖެހި ގޯލުން އެއްވަރުކޮށްފަ އެވެ.
މި މެޗުގައި ވެސް އާސެނަލްގެ ފޯވާޑް، ކައި ހަވާޓްޒް އަށް ގޯލު ޖަހަން ލިބުނު ރަނގަޅު ފުރުސަތުތަކެއް ނަގާލިއިރު، ޔުނައިޓެޑުން ވަނީ މެޗުގެ 88 ވަަނަ މިނިޓްގައި ގޯލެއް ޖަހައިފަ އެެވެ. އެކަމަކު، ޒުވާން ފޯވާޑް، އަލެހަންދްރޯ ގާނާޗޯ ޖެހި ގޯލު ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމީ އޮފްސައިޑް ކަމަށެވެ.
އާސެނަލް އިން މޮޅުވި ގޯލުތައް ޖެހީ މެޗުގެ އިތުރު ވަގުތުގަ އެވެ. އެ ގޮތުން އިތުރު ވަގުތުގެ ހަ ވަނަ މިނިޓްގައި ބުކާޔޯ ސަކާ ނެގި ކޯނަރަކުން ޑެކްލަން ރައިސް ވަނީ އާސެނަލަށް ލީޑުނަގައިދީފަ އެވެ. ރެކޯޑް އަގަކަށް އާސެނަލުން ގެނައި ރައިސް މި މެޗުގައި ކާމިޔާބުކުރީ އެ ޓީމަށް ޖަހައިދިން ފުރަތަމަ ގޯލެވެ. އިތުރު ވަގުތުގެ 11 ވަނަ މިނިޓްގައި އާސެނަލްގެ ތިން ވަނަ ގޯލު ޖެހީ ގަބްރިއެލް ޖޭސޫސް އެވެ.
މި މެޗުން ބަލިވުމުން ޔުނައިޓެޑްގެ ކޯޗު އެރިކް ޓެން ހާގް ވަނީ ރެފްރީންގެ ނިންމުންތަކަށް ވަރަށް ބޮޑަށް ފާޑުކިޔައިފަ އެވެ. ޔުނައިޓެޑް އޮތީ ކުޅުނު ހަތަރު މެޗުން ލިބުނު ހަ ޕޮއިންޓާ އެކު، ލީގުގެ 11 ވަނައިގަ އެވެ.
ލީގުގައި މިރޭ ލިވަޕޫލުން އެސްޓަން ވިލާ ކޮޅަށް ގޯލުތައް ޖެހީ ޑޮމިނިކް ސޮބޯސްލާއި އާއި މުހައްމަދު ސަލާހުގެ އިތުރުން އެސްޓަން ވިލާގެ މެޓީ ކޭޝް އަތުން ބައިކޮޅަށް ވަން ގޯލެކެެވެ.
