މިލިޓަރީ މަސައްކަތެއް ކުރަން ބޭރުގެ އެއްވެސް ބަޔަކު ރާއްޖޭގައި ނެތް ކަމަށް ރައީސް އިބްރާހީމް މުހައްމަދު ސޯލިހު މިރޭ ވިދާޅުވެއްޖެ އެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ވާދަކުރައްވާ އަށް ކެންޑިޑޭޓުންގެ މެދުގައި ސަންގު ޓީވީން މިރޭ ކުރިއަށް ގެންދިޔަ ބަހުސްގައި ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ އެކި ގައުމުތަކުގެ ސިފައިން ރާއްޖެެއަށް އަންނަނީ ތަމްރީނުތައް ހިންގަން ކަަމަށެވެ. އެ ބޭނުމަށް އެތައް ގައުމަކުން ރާއްޖެއަށް ސިފައިން އަންނަ ކަމަށް ވެސް އެމަނިކުފާނު ވިދާޅުވި އެވެ.
"ބޭރުގެ އެއްވެސް ގައުމެއްގެ ސިފައިން މިލިޓަރީ މަސައްކަތެއް ކުރާކަށް ރާއްޖެއަކު މިހާރަކު ވެސް ނެތް. އިއްޔެއަކު ވެސް ނެތް. އަޅުގަނޑު ދެކޭ ގޮތުގައި އޭގެ ކުރިއަކު ވެސް ނެތް. އެހެނެއް ނޫން ދޭދޭ ގައުުމުތަކާ އެކީގައި އޮންނަ އެއްބަސްވުންތަކުގެ ދަށުން ޓްރޭނިންތައް ހެދުމަށް އެކިއެކި އެކްސަސައިޒް ހިންގުމަށް އިންޑިއާ މީހުން ވެސް އާދޭ މިތަނަށް، ލަންކާ މީހުން ވެސް އާދޭ، އެމެރިކާ މީހުންވެސް އާދޭ، އިނގިރޭސިން ވެސް އާދޭ ބައެއް ފަހަރު،" ރައީސް ސޯލިހު ވިދާޅުވި އެވެ.
"ރާއްޖޭގައި އިންޑިއާ ސިފައިން ތިބޭ އަދަދު ހާމަނުކުރަން ސަރުކާރުން ކޯޓަށް ދިޔަ ކަމަށް ވާއިރު ބޭރުގެ ސިފައިން ރާއްޖޭގައި ތިބުމަކީ ގައުމީ ސަލާމަތަށް އޮތް ނުރައްކަލެއް ނޫންތޯ" ސުވާލު ކުރުމުން ވެސް ރައީސް ވިދާޅުވީ މިލިޓަރީ މަސައްކަތެއްގައި ބޭރުގެ ސިފައިން ރާއްޖޭގައި ނެތް ކަމަށެވެ.
އެމަނިކުފާނު ވިދާޅުވި ގޮތުގައި ތަމްރީނުތައް ކުރިއަށް ގެންދަން ރާއްޖެއަށް އަންނަނީ ހަމަ އެކަނި އިންޑިއާ ސިފައިންނެއް ނޫނެވެ. އެމެރިކާ ސިފައިންނާއި ޗައިނާ ސިފައިން ވެސް އެގޮތަށް އަންނަ ކަމަށް އެމަނިކުފާނު ވިދާޅުވި އެވެ.
"ބައެއް ފަހަރު އެކްސަސައިޒްތަކާ ޓްރެއިނިންތައް ހެދުމަށް ޓަކައި އިންޑިއާއެއް ނޫން، އިނގިރޭސިން ވެސް އެމެރިކާއިން ވެސް މިތަނަށް އާދޭ، ޗައިނާއިން ވެސް އާދޭ،" އެމަނިކުފާނު ވިދާޅުވި އެވެ.
އުތުރު ތިލަފަޅުގައި ސިފައިންނަށް ބަނދަރެއް ތަރައްގީކުރަން އިންޑިއާއާ އެކު ސޮއިކޮށްފައިވާ އެއްބަސްވުމުގެ ދަށުން ރާއްޖޭގައި އެތަނުގައި އިންޑިއާ ސިފައިން ތިބޭ ކަމަށް ކުރާ ތުހުމަތު ވެސް އެމަނިކުފާނު ދޮގުކުރެއްވި އެވެ. ވިދާޅުވީ އެ ތަނަކީ ދިވެހިންގެ ތަނެއް ކަމަށެވެ.
