ދިރާގު މޯލްޑިވްސް "ރޯޑް ރޭސް 2023" އަށް ރަޖިސްޓްރީވުމުގެ މުއްދަތު އިތުރުކޮށްފިއެވެ.
ދިރާގުން ބުނީ ރޯޑް ރޭހުގެ ރަޖިސްޓްރޭޝަން މުއްދަތު އިތުރުކުރީ އާންމުންގެ އެދޭތީ، ރާއްޖޭގައި ބާއްވާ އެންމެ ބޮޑު ދުވުމުގައި ގިނަ ބަޔަކަށް ބައިވެރިވުމުގެ ފުރުސަތު ދިނުމުގެ ގޮތުން ކަމަށެވެ.
ދިރާގު ރޯޑްރޭހަށް ރަޖިސްޓްރީވުން މިހާރު ވަނީ މިމަހުގެ ފަސްވަނަ ދުވަހުގެ (އަންނަ އަންގާރަދުވަހުގެ) ރޭ 11:59 އަށް އިތުރުކޮށްފައެވެ. މި އަހަރުގެ ރަން އޮންނާނީ 27 އޮކްޓޯބަރު 2023 ވާ ހުކުރު ދުވަހު ހުޅުމާލެ ސެންޓްރަލް ޕާކުގައެވެ. މިއީ މި ހަރަކާތުގެ 14ވަނަ އެޑިޝަންއެވެ.
ދިރާގު މޯލްޑިވްސް ރޯޑް ރޭހަކީ ދިވެހިރާއްޖޭގެ އެކި ކަންކޮޅުތަކުގެ މީހުން އެއްތަނަކަށް ޖަމާކޮށް ރާއްޖޭގައި ބާއްވާ ފުރަތަމަ އަދި ހަމައެކަނި ބައިނަލްއަގުވާމީ ދުވުމެވެ. މީގެ އިތުރުން މިއީ ވޯލްލްޑް އެތްލެޓިކްސް ސާޓިފައިޑް ރޭސް ރޫޓަކާއެކު އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް ރޭސަސް (އެއިމްސް) ވޯލްޑް ރަނިން ކަލަންޑަރުގައި ލިސްޓުކޮށްފައިވާ ދުވުމެކެވެ.
މިއަހަރުގެ އިވެންޓްގައި ފުރަތަމަ ފަހަރަށް ދިރާގު ރޯޑް ރޭހުގައި ހާފް މެރަތަންއަށް ދުވުމުގެ ފުރުސަތު ބައިވެރިންނަށް ލިބިގެންދާނެއެވެ. އަދި މީގެ އިތުރުން އާ ދުވުމުގެ ރޫޓަކާއި ކުރިއަށްވުރެ ބޮޑެތި ފައިސާގެ އިނާމުތަކާއެކު ތަފާތު ކުލަގަދަ ހަރަކާތްތަކެއްވެސް މިފަހަރުގެ އިވެންޓުގައި ފެނިގެންދާނެ ކަމަށް ދިރާގުން ބުންޏެވެ.
ދިރާގުން ބުނީ އެހެން އަހަރުތަކެކޭ އެއްފަދައިން މިއަހަރުގެ ދުވުންވެސް ހާއްސަ ކޮށްފައިވަނީ އެކުންފުނީގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރް) ޕްރޮގްރާމްގެ މައިގަނޑު އެއް ދާއިރާ ކަމަށްވާ ކުޑަކުދިންގެ ރައްކާތެރިކަމަށް ކަމަށެވެ. އަދި މި އިވެންޓްގައި ކުޑަކުދިންގެ ރައްކާތެރިކަމުގެ ދާއިރާގައި ހަރަކާތްތެރިވާ އެންޖީއޯތަކަށް އާންމުން ހޭލުންތެރިކުރުވުމަށާއި ފަންޑްރެއިޒް ކުރުމުގެ ފުރުސަތު ލިބިގެންދާނެ ކަމަަށްވެސް ބުންޏެވެ.
ދިރާގު މޯލްޑިވްސް ރޯޑް ރޭހަށް ރަޖިސްޓްރީ ކުރުމަށާއި މި އިވެންޓާއި ބެހޭ އިތުރު މައުލޫމާތު www.dmrr.mv މެދުވެރިކޮށް ލިބިގެންދާނެ އެވެ.
