ގަސްދުގައި މީހަކު މެރުމުގެ ކުށް ސާބިތުވެ ޖަލުގައި ބަންދުކުރިތާ ހަފުތާއެއްގެ ތެރޭގައި ފިލި ނުރައްކާތެރި ގާލިތެއް ހޯދުމުގެ މަސައްކަތް އެމެރިކާގެ ޕެންސިލްވޭނިއާގައި ފަށައިފި އެވެ.
އުމުރުން 34 އަހަރުގެ ބްރެޒިލް ރައްޔިތެއް ކަމުގައިވާ ޑެނޭލޯ ކަވަލްކަންޓޭ ޗެސްޓާ ކައުންޓީ ޖަލުން ފިލީ ބުރާސްފަތި ދުވަހުގެ ހެނދުނުގެ ވަގުތެއްގަ އެވެ.
އޭގެ ހަފުތާއެއް ކުރިން އޭނާގެ މައްޗަށް އުމުރު ދުވަހުގެ ޖަލު ހުކުމެއް އިއްވީ އޭނާގެ ކުރީގެ ލޯބިވެރިޔާގެ ގަޔަށް ވަޅިހަރައި މަރާލުމުގެ ކުށުގަ އެވެ. އެ އަމަލު ހިންގީ އަންހެން މީހާގެ ދެ ކުޑަ ދަރިންގެ ކުރިމަތީގަ އެވެ.
އޭގެ އިތުރުން އޭނާއަކީ އެހެން މަރެއްގެ މައްސަލައިގައި ބްރެޒިލްގެ ފުލުހުން ހޯދަމުންދާ މީހެކެވެ.
އެމެރިކާގެ ޖަލުން ކަވަލްކަންޓޭ ފިލި ގޮތުގެ އެއްވެސް ތަފްސީލެއް މިހާތަނަށް ހާމައެއްނުކުރެ އެވެ. އެހެން ނަމަވެސް އެކަން ބަލަމުންދާ ކަމަށް އޮފިޝަލުން ބުންޏެވެ.
އޭނާ އެންމެ ފަހުން ފެނުނީ ޖަލުން ފިލިތާ ގަޑިއެއްގެ އިރު ފަހުން ޕޮކޮޕްސޮން އަވަށް ކައިރިން ހިނގާފައި ދަނިކޮށެވެ. އޭނާއާ ގުޅޭ މައުލޫމާތު ފޯރުކޮށްދޭ ފަރާތަކަށް 10،000 ޑޮލަރު ދޭނެ ކަމަށް އޮފިޝަލުން ބުނެ އެވެ.
