ރިޔާސީ ކެމްޕޭނުގައި މިއަދު ރައީސް އިބްރާހިމް މުހައްމަދު ސޯލިހު އެމަނިކުފާނުގެ އުފަން ރަށް، ޅ. ހިންނަވަރަށް ވަޑައިގަތުމުން އެރަށުގެ ގިނަ ބަޔަކު ނުކުމެ އާދަޔާހިލާފު ހޫނު މަރުހަބާއެއް ކިޔައިފި އެވެ.
ރައީސް ސޯލިހު ހިންނަވަރަށް ވަޑައިގެންނެވީ މިއަދު ހަވީރު 5:50 ހާއިރު އެވެ. އޭރު އެ ރަށުގެ ބަނދަރުން ފެށިގެން ރަށުގެ މެދުތެރޭގައި ހުންނަ އެމްޑީޕީ ހަރުގެއާ ހަމައަށް ރައްޔިތުން އޮތީ ސަފު ދަމާލާފަ އެވެ. އެއް އަޑަކުން ކިޔަމުން ދިޔައީ 'ކެންޑިޑޭޓު ނަމްބަރު ތިނެއް' މިހެންނެވެ.
ހިންނަވަރުން "އަދަދު" އަށް ވާހަކަދެއްކި ހުރިހާ ފަރާތްތަކުންވެސް ބުނީ ސެޕްޓެމްބަރު ނުވައެއްގައި ބާއްވާ ރިޔާސީ އިންތިހާބު، ރައީސް ސޯލިހަށް ކާމިޔާބު ކޮށްދޭނީ އެއް ބުރުން ކަމަށެވެ. އަދި އެ ރަށުން ރައީސަށް 'ރެކޯޑު' އަދަދެއްގެ އަގުލަބިއްޔަތެއް ހޯދައިދޭނެ ކަމަށްވެސް އެއްވެފައިތިބި ރައްޔިތުން ތަކުރާރުކޮށް ބުނަމުންދިޔަ އެވެ.
ދެހާސް އަށާރަ ވަނަ އަހަރުގެ ރިޔާސީ އިންތިހާބުގައިވެސް ރައީސް ސޯލިހަށް އެންމެ ބޮޑު އަގުލަބިއްޔަތެއް ލިބުނު އެއް ރަށަކީ އެމަނިކުފާނުގެ އުފަން ރަށް ހިންނަވަރެވެ.
ރިޔާސީ އިންތިހާބުގައި ހިންނަވަރަށް ނިސްބަތްވާ 3,789 މީހުން ވޯޓު ލާނެ އެވެ. ހިންނަވަރަކީ ރައީސް މިއަދު ފާދިއްޕޮޅަށް ފެއްޓެވި ދަތުރުފުޅުގެ ފަހު މަންޒިލެވެ. އެ ރަށުގައި މިރޭ އެމްޑީޕީ އާއި ގުޅިފައިވާ ޕާޓީތަކުގެ ބޮޑު ޖަލްސާއެއް ބާއްވާނެ އެވެ.
