މިދިޔަ ބުރާސްފަތި ދުވަަހު އެމެރިކާގެ ކުރީގެ ރައީސް ޑޮނަލްޑް ޓްރަމްޕް ހައްޔަރުކޮށް، ޖޯޖިއާ ސްޓޭޓްގެ އެޓްލާންޓާ ސިޓީގެ ޖަލެއްގައި ނެގި ފޮޓޯގެ އެހީގައި ޓްރަމްޕްގެ ކެމްޕެއިނަށް 7.1 މިލިއަން ޑޮލަރު މިހާތަނަށް ލިބިއްޖެ އެވެ.
ފައިސާގެ ބޮޑު ބައެއް ލިބިފައި ވަނީ އެ ފޮޓޯ ޖަހާފައިވާ އެކި ތަކެތި ވިއްކައިގެންނެވެ. އޭގެ ތެރޭގައި ސައިޖޯޑާއި، ޓީޝާޓު އަދި ފެންފުޅި ހިމެނެ އެވެ.
ޓްރަަމްޕް ހައްޔަރު ކުރީ 2020 ވަނަ އަހަރުގެ އިންތިހާބުގެ ނަތީޖާ ބަދަލުކުރަން ރޭވި ކަމަށް ތުހުމަތު ކުރެވޭ މައްސަލައިގަ އެވެ. ހައްޔަރުކޮށް ފޮޓޯ ނެގުމަށް ފަހު ކަފާލާތުގެ ދަށުން ވަނީ ދޫކޮށްފަ އެވެ.
ޖެނުއަރީ 2021 އަށް ފަހު ފުރަތަމަ ފަހަރަށް ޓްރަމްޕް ޓްވިޓާ ނުވަތަ އެކްސްގައި ޕޯސްޓުކުރެއްވީ މިދިޔަ ހުކުރު ދުވަހު އެވެ. ފުލުހުންގެ ނެގި ރަސްމީ ފޮޓޯ ޕޯސްޓުކޮށް ޓްރަމްޕް ލިޔުއްވީ "ދުވަހަކު ވެސް އަމާން ނުދޭތި" އެވެ.
ޖިނާއީ މައްސަލަތަކެއް ކުރިމަތިވެފައިވާ އިރު، ޓްރަމްޕް ގެންދަވަނީ 2024 ގެ ރިޔާސީ އިންތިހާބަށް ކެމްޕެއިން ކުރައްވަމުންނެވެ. ޓްރަމްޕްއާ ދެކޮޅަށް ކުރާ ހުރިހާ ތުހުމަތަކާއި އުފުލާފައިވާ ދައުވާތައް އެމަނިކުފާނު ދޮގުކުރައްވަ އެވެ.
