ޕެރިސް (އޮގަސްޓް 27) - ކީލިއަން އެމްބާޕޭގެ ދެ ލަނޑާ އެކު ފްރާންސް ލީގުގައި ރޭ ލޯންސް އަތުން 3-1 އިން ޕީއެސްޖީ މޮޅުވެެއްޖެ އެވެ.
މިއީ މި ސީޒަންގެ ފްރާންސް ލީގުގައި ޕީއެސްޖީ މޮޅުވި ފުރަތަމަ މެޗެވެ. މިއީ ޕީއެސްޖީއާ މި ފަހަރު ހަވާލުވި ކޯޗު ލުއިސް އެންރީކޭ އަށް އޮތް ޕްރެޝަރަށް ލިބިގެންދާނެ ފަސޭހަ އެކެވެ.
ލީގުގައި ކުޅުނު ފުރަތަމަ ދެ މެޗުން އެއްވަރުވި ޕީއެސްޖީ މި މެޗުން ހޯދި މޮޅާ އެކު، ތާވަލްގެ ހަތަރު ވަނަ އަށް ވަނީ ޖެހިލައިފަ އެވެ. ޕީއެސްޖީ އޮތީ ތާވަލްގެ އެއް ވަނައިގައި އޮތް މޮނާކޯ އާއި ދެ ވަނައިގައި އޮތް މާސޭ އަށް ވުރެ ދެ ޕޮއިންޓް ފަހަތުގަ އެވެ.
ޕީއެސްޖީގައި ދަނޑުގައި ކުޅުނު މެޗުގެ ފުރަތަމަ ހާފު ނިމެނިކޮށް އެ ޓީމަށް ލީޑު ހޯދައިދިނީ މާކޮސް އަސެންސިއޯ އެވެ. އަދި ދެ ވަނަ ހާފުގައި އެމްބާޕޭ ވަނީ އިތުރު ދެ ލަނޑުޖަހައި، މި ސީޒަންގެ ފްރާންސް ލީގުގައި ޕީއެސްޖީ އަށް ފުރަތަމަ މޮޅު ކަށަވަރުކޮށްދީފަ އެވެ.
މިއީ ކޮންޓުރެކްޓް އާކުރުމާ ގުޅޭގޮތުން އުފެދުނު ދެބަސްވުމަށް ފަހު، ޕީއެސްޖީ އަމިއްލަ ދަނޑުގައި ކުޅުނު މެޗެއްގެ ފުރަތަމަ 11 އިން އެމްބާޕޭ އަށް ޖާގަ ދިން ފުރަތަމަ ފަހަރެވެ. އެ މައްސަލައާ ގުޅިގެން، ސީޒަން ފެށެން ގާތްވެފައިވަނިކޮށް އެމްބާޕޭ ސްކޮޑުން ވެސް ބާކީކުރިއެވެ.
މެޗު ނިމެނިކޮށް، ލޯންސް އިން ސުން ކަނޑުވާލީ މޯގަން ގުއިލަވޯގުއީ ޖެހި ލަނޑުންނެވެ.
"އަހަރެން ބޭނުންވަނީ މި ގޮތަށް މެޗުތައް ކުރިއަށްދާން. އެކަމަކު ފުޓްބޯޅައިގައި ހުރިހާ މެޗެއް ބޭނުންވާ ގޮތަކަށް ނުދާނެ،" މެޗަށް ފަހު ޕީއެސްޖީގެ ކޯޗު ލުއިސް އެންރީކޭ ބުންޏެވެ. "ވަރަށް ރަނގަޅަށް ޑިފެންސްކުރާ ޓީމަކާ ދެކޮޅަށް ޕީއެސްޖީން ރަނގަޅު ކުޅުމެއް ދެއްކި."
ބާސެލޯނާ އިން ޕީއެސްޖީ އަށް ބަދަލުވި ވިންގް އޮސްމާނޭ ޑެމްބެލޭ ވަނީ ރޭގެ މެޗުގައި ކުޅެފަ އެވެ.
