ލަންޑަން (އޮގަސްޓް 20) - އިނގިރޭސި ޕްރިމިއާ ލީގުގައި މިރޭ ކުޅުނު މެޗުން ވެސްޓް ހޭމް ޔުނައިޓެޑުން 3-1 އިން ޗެލްސީ ބަލިކޮށްފި އެވެ.
އާ ސީޒަނަށް އެންމެ ބޮޑު ހަރަދެއް ކުރި ޗެލްސީ އަތުން މިއީ ވެސްޓް ހޭމް އަށް ލިބިގެންދިޔަ ބޮޑު މޮޅެކެވެ. އަނެއްކޮޅުން, މެޗުގެ ފަހު 30 މިނިޓް އެއް ކުޅުންތެރިއަކު މަދުކޮށް ކުޅުނު ވެސްޓް ހޭމް އިން މި ވަނީ ސީޒަން ވަރުގަދަ އަށް ފެށުމަށް ދެއްކި ހިތްވަރާ އެކު، މުހިންމު ތިން ޕޮއިންޓް ހޯދައިފަ އެވެ.
މިއީ ޗެލްސީ ކޯޗުކަމާ މި ސީޒަނުގައި ހަވާލުވި، މައުރީސިއޯ ޕޮޗެޓީނޯގެ ކޯޗުކަމުގައި އެ ޓީމު ބަލިވި ފުރަތަމަ މެޗެެވެ. ލީގުގެ ފުރަތަމަ މެޗުގައި އަމިއްލަ ދަނޑުގައި ވަނީ ލިވަޕޫލާ އެއްވަރުވެފަ އެވެ. ޑޭވިޑް މޮއިސްގެ ކޯޗުކަމުގައި ކުޅޭ ވެސްޓް ހޭމް އިން މި ހޯދީ ލީގުގައި މި ފަހަރު ހޯދި ފުރަތަމަ މޮޅެވެ.
ލަންޑަން ސްޓޭޑިއަމްގައި މިރޭ ކުޅުނު މެޗުގެ ހަތް ވަނަ މިނިޓްގައި ވެސްޓް ހޭމަށް ލީޑުނަގައިދިނީ މޮރޮކޯގެ ޑިފެންޑަރު ނަޔެފް އަގާޑް އެވެ. އޭނާ މި ގޯލު ޖެހީ ޖޭމްސް ވޯޑް ޕްރައުސް ދިން ބޯޅައަކުންނެވެ.
މެޗުގެ 28 ވަނަ މިނިޓްގައި ޗެލްސީގެ ކާނީ ޗުކުމޭކާ ވަނީ، އޭނާ އެ ޓީމަށް ޖަހައިދިން ފުރަތަމަ ގޯލާ އެކު އެ ޓީމަށް ނަތީޖާ އެއްވަރުކޮށްދީފަ އެވެ. އަދި ފުރަތަމަ ހާފު ނިމުމުގެ ކުރިން ޗެލްސީ އަށް ލީޑުނަގައިދޭން އެންޒޯ ފެނާންޑޭޒް ޖެހި ޕެނަލްޓީ ވެސްޓް ހޭމްގެ ކީޕަރު އަލްފަންސޯ އަރެއޯލާ ވަނީ މަތަކޮށްފަ އެވެ.
ދެ ވަނަ ހާފުގެ ކުޅުން ފެށިގެން އަށް ވަނަ މިނިޓްގައި ވެސްޓް ހޭމް އިން ވަނީ މިކޭލް އެންޓޯނިއޯ ޖެހި ގޯލުން އަލުން ލީޑުނަގައިފަ އެވެ. މި ލަނޑު ޖަހަން ވެސް ފުރުސަތު ތަނަވަސްކޮށްދިނީ ވޯޑް ޕްރައުސް އެވެ.
އެކަމަކު، އޭގެ އިރުކޮޅެއް ފަހުން، އެގާޑަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކުމުން ވެސްޓް ހޭމަށް ޕްރެޝަރު ބޮޑުވި އެވެ.
ޗެލްސީން ނަތީޖާ ހަމަހަމަކުރަން ކުރި މަސައްކަތުގައި ދާދި ފަހުން އެ ޓީމަށް ގެނައި 140 މިލިއަން ޑޮލަރުގެ މިޑްފީލްޑަރު މޮއިސަސް ކައެސޭޑޯ ކުޅެން އެރުވި އެވެ. އެކަމަކު، ކައެސޭޑޯ އަށް ލަނޑު ޖަހަން ލިބުނު ފުރުސަތުގެ ބޭނުންނުުހިފުނުއިރު، އޭނާ ދިން ޕެނަލްޓީ އަކުން ވެސްޓް ހޭމް އިން ވަނީ ތިން ވަނަ ގޯލު ޖަހައިފަ އެވެ. ވެސްޓް ހޭމްގެ ތިން ވަނަ ގޯލު ޖެހީ އިތުރު ވަގުތުގައި ޕެނަލްޓީ އަކުން ލޫކަސް ޕަކޭޓާ އެވެ.
