ލަންޑަން (އޮގަސްޓް 20) - އިނގިރޭސި ޕްރިމިއާ ލީގުގައި ރޭ މެންޗެސްޓާ ސިޓީ އާއި ލިވަޕޫލް ކުޅުނު މެޗުތަކުން މޮޅުވިއިރު، މެންޗެސްޓާ ޔުނައިޓެޑް ކުޅުނު މެޗުން ޓޮޓެންހަމް އަތުން 2-0 އިން ބަލިވެއްޖެ އެވެ.
ލިވަޕޫލުން އަމިއްލަ ދަނޑުގައި ފަހަތުން އަރައި، 3-1 އިން ބޯންމައުތު ބަލިކުރިއިރު، ނިއުކާސަލް ޔުނައިޓެޑް އަތުން ސިޓީ މޮޅުވީ 1-0 އިންނެވެ.
ރޭ ލިވަޕޫލް ދަނޑުގައި ކުޅުނު މެޗުގެ ތިން ވަަނަ މިނިޓްގައި ބޯންމައުތުން ވަނީ ލީޑުނަގައިފަ އެވެ. ލިވަޕޫލް ކުޅުންތެރިން އަތުން ގެއްލުނު ބޯޅައެއް ހޯދައި، ބޯންމައުތަށް ލީޑުނަަގައިދިނީ އެންޓޮއިން ސެމެންޔޯ އެެވެ.
ނަތީޖާ އަނބުރާލަން ކުރި މަސައްކަތުގައި ލިވަޕޫލުން ފުރަތަމަ ހާފުގައި ކާމިޔާބު ހޯދި އެެވެ. އެ ގޮތުން، ލިވަޕޫލަށް އެއްވަރުކޮށްދިން ލަނޑު ޖެހީ މެޗުގެ 28 ވަނަ މިނިޓްގައި ޑިއޯގޯ ޖޮޓާ ތަަނަވަސްކުރި އެޓޭކެއްގެ ބޭނުންހިފައި ލުއިޒް ޑިއާޒް އެވެ. މެޗުގެ 36 ވަނަ މިނިޓްގައި ޕެނަލްޓީއެއްގެ ރީބައުންސް ގޯލަށް ވައްދާލައިގެން މުހައްމަދު ސަލާހު ލިވަޕޫލަށް ލީޑުނަަގައިދިނެވެ. މިއީ، ލިވަޕޫލްގެ ޑޮމިނިކް ސޮބޯސްލާއީ އަށް ބޯންމައުތުގެ ޖޯ ރޮތުވެލް ކުރި ފައުލަކަށް ދިން ޕެނަލްޓީ އެކެވެ.
މި މެޗުގައި ލިވަޕޫލަށް މައްސަލަ ދިމާވީ، 58 ވަނަ މިނިޓްގައި އެ ޓީމުގެ މިޑްފީލްޑަރު އަލެކްސިސް މެކް އަލިސްޓާ އަށް ސީދާ ރަތް ކާޑެއް ދެއްކުމުންނެވެ. އެއީ ބޯންމައުތުގެ ރަޔާން ކްރިސްޓީ އަށް ކުރި ފައުލަކަށް ދެއްކި ރަތް ކާޑެކެވެ. ކުޅުންތެރިއަކު މަދުވި ފަހުން ވެސް އެޓޭކްކޮށް، ލިވަޕޫލުން ވަނީ މެޗުގެ 62 ވަނަ މިނިޓްގައި ގޯލެއް ޖަހައިފަ އެވެ. މި ލަނޑު ޖެހީ އޭރިއާތެރެއިން ލިބުނު ރީބައުންސް ބޯޅައެއްގައި ޖޮޓާ އެވެ.
ފުރަތަމަ ހާފުގައި ރޭ ޔުނައިޓެޑަށް ލީޑުނަގައިދޭން މާކަސް ރަޝްފޯޑާއި ބްރޫނޯ ފެނާންޑޭސް އަށް ރަނގަޅު ފުރުސަތުތަކެއް ލިބި ބޭނުމެއް ނުހިފުނެވެ. ޓޮޓެންހަމް އިން މޮޅުވީ ދެ ވަނަ ހާފުގައި ޖެހި ގޯލުތަކާ އެކު އެވެ. އެ ގޮތުން، ޓޮޓެންހަމަށް ލީޑުނަގައިދިނީ ދެ ވަނަ ހާފުގެ ހަތަރު ވަނަ މިނިޓްގައި ޕާޕޭ މަޓާ ސާ އެވެ.
ނަތީޖާ ހަމަހަމަކުރަން ޔުނައިޓެޑުން ކުރިއަށް ޖެހިގެން ކުޅުނު ނަމަވެސް އެކަން ހާސިލްނުވި އެވެ. ޓޮޓެންހަމް އިން ވަނީ 83 ވަނަ މިނިޓްގައި ޔުނައިޓެޑްގެ ޑިފެންޑަރު ލިސަންދްރޯ މާޓީނޭޒް ފައިގައި ޖެހިފައި ބައިކޮޅަށް ވަން ގޯލުން ލީޑު ފުޅާކޮށްފަ އެެވެ. މި ގޯލުގައި ޓޮޓެންހަމްގެ އިވާން ޕެރިސިޗާއި ބެން ޑޭވިސް އިސް ދައުރެއް އަދާކޮށްފައިވެ އެވެ.
މެންޗެސްޓާ ސިޓީން ރޭ ނިއުކާސަލް ބަލިކުރިއިރު، މެޗުގައި ފެނިގެންދިޔަ ހަމައެކަނި ލަނޑު ކާމިޔާބުކުރީ 31 ވަަނަ މިނިޓްގައި ހޫލިއަން އަލްވަރޭޒް އެވެ. މިއީ، ފިލް ފޯޑެން ދިން ބޯޅައަކަށް އަރައި، އަލްވަރޭޒް ގޯލުގެ މަތީ ކަނަށް ބޯޅަ ފޮނުވާލައިގެން ޖެހި ގޯލެކެވެ.
