ލަންޑަން (އޮގަސްޓް 19) - ލިވަޕޫލުން ހޯދަން މަސައްކަތްކުރި ސައުތަމްޓަންގެ ޒުވާން މިޑްފިލްޑަރު ރޮމިއޯ ލަވިއާވެސް ޗެލްސީއަށް ސޮއިކޮށްފި އެވެ.
ބެލްޖިއަމްގެ ލަވިއާ ޗެލްސީ އަށް ސޮއިކުރީ 53 މިލިއަން ޕައުންޑްގެ ޓްރާންސްފާ ފީއެއްގައި ހަތް އަހަރު ދުވަހުގެ އެއްބަސްވުމެއްގަ އެވެ.
ލަވިއާ އަކީ ހޫނު މޫސުމުގެ ޓްރާންސްފާގައި ލިވަޕޫލުން ވަރަށް ބޮޑަށް ހޯދަން މަސައްކަތްކުރި ކުޅުންތެރިއެކެވެ. ނަމަވެސް ޗެލްސީ އިން ބިނާކުރަމުން އަންނަ އާ ޓީމާމެދު އިތުބާރު އެބައޮތްކަމަށްބުނެ އޭނާ އެންމެ ފަހުން ޗެލްސީއަށް ސޮއިކުރަން ނިންމީ އެވެ.
ލަވިއާ އަކީ އެއް ހަފްތާ ތެރޭގައި ލިވަޕޫލުން ގަންނަން މަސައްކަތްކުރަނިކޮށް އެޓީމަށް ނޫނެކޭ ބުނެ ޗެލްސީއަށް ސޮއިކުރި ދެވަނަ ކުޅުންތެރިއާ އެވެ. މީގެ ތިން ދުވަސް ކުރިން ލިވަޕޫލުގެ ބޮޑު ހުށަހެޅުމަކަށް ނޫނެކޭ ބުނެ ބްރައިޓަންއަށް ކުޅުނު ކައެސޭޑޯ ވަނީ ޗެލްސީއަށް ސޮއިކޮށްފަ އެވެ.
ލަވިއާ 19، އަކީ މެންޗެސްޓާ ސިޓިގެ ޔޫތު ޓީމުން ފާހަގަވި ކުޅުންތެރިއެކެވެ. އޭގެ ފަހުން އޭނާ ވަނީ 2022 ވަނަ އަހަރު 10.5 މިލިއަން ޕައުންޑްގެ ފީއަކަށް ސައުތެމްޓަނަށް ބަދަލުވެފައެވެ. މިދިޔަ ސީޒަންގައި ސައުތަމްޓަނަށް ލަވިއާ 34 މެޗު ކުޅެދިނެވެ.
ލަވިއާ އަކީ އާ ސީޒަނަށް ޗެލްސީން ގަތް ނުވަވަނަ ކުޅުންތެރިއާ އެވެ. އެޓީމުން ވަނީ އާ ކުޅުންތެރިންނަށް ސްކޮޑުން ޖާގަ ހުސްކުރުމަށް 12 ކުޅުންތެރިއަކު ވިއްކާލާފަ އެވެ.
ޗެލްސީގެ އާ ވެރިން އެކުލަބާ ހަވާލުވި ފަހުން މިހަތަނަށް 900 މިލިއަން ޕައުންޑް ވަނީ ހޭދަކޮށްފަ އެވެ. އެމެރިކާގެ ޓޮޑް ބޮއެލީ އެކުލަބާއި ހަވާލުވެ މިހާތަނަށް 23 ކުޅުންތެރިއަކު ސޮއިކޮށްފަ އެވެ.
