ރައީސް އިބްރާހީމް މުހައްމަދު ސޯލިހު ރަށްރަަށަށް ވަޑައިގަންނަވާ އިރު އިދިކޮޅު މީހުން ހުއްޓުވުމުގައި ފުލުހުން އަމަލުކުރާ ގޮތާ މެދު ރައްޔިތުންގެ ރައީސް މުހައްމަދު ނަޝީދު މިއަދު ވަރަށް ބޮޑަށް ފާޑުވިދާޅުވެއްޖެ އެވެ.
ސެޕްޓެމްބަރު 9، ގައި ބާއްވާ ރިޔާސީ އިންތިހާބަށް ކެމްޕެެއިން ކުރަން ހދ. ނޮޅިވަރަމްގައި ދަ ޑިމޮކްރެޓްސް ބޭއްވި ޖަލްސާގައި ނަޝީދު ސިފަކުރެއްވި ގޮތުގައި ރައީސް ސޯލިހު ރަށްރަށަށް ވަޑައިގަންނަވާ އިރު "މުޅި ރަށް އޮންނަނީ ޕޮލިސް ލައިން ދަމައި" ބަންދުކޮށްފަ އެވެ. ރައީސް ސޯލިހު ހުންނަވަނީ ނަޝީދު ތުހުމަތުކުރެއްވި ގޮތުގައި އެގޮތަށް ދަމާފައި އޮންނަ ޕޮލިސް ލައިންގެ "އެތެރެއަށް އެރިވަޑައިގެން"ނެވެ.
"އެސްއޯ ފުލުހުންނާއި ކަރަންޓު މުގުރާއި ދަގަނޑު ޝީލްޑާއި ކަރުނަގޭހާއި ހިފައިގެން ރަށްރަށަށް އަރުއްވައި، މުޅި ރަށް ވަށައިގެން ޕޮލިސް ލައިން ދަންމަވައި އޭގެ އެތެރެއަށް އެރިވަޑައިގެން، ރީނދޫ ކުލައިން އައިސިން އަޅުއްވައިގެން ކޭކެއް ހައްދަވައިގެން، ޖަރީ ކުރައްވައިގެން އެ ކުޅުއްވާ ފިލްމުގައި، ހަމަ ތެދަށް މި ދަންނަވަނީ، އޮތީ 15 ޕަސެންޓް [ތާއީދު]، " ނަޝީދު ވިދާޅުވި އެވެ.
އެ ކެމްޕެއިނުގައި ރައްޔިތުންނެއް ނެތް ކަމަށާއި ރައްޔިތުންނަށް އެ ކެމްޕެއިނާ ކައިރި ނުވެވޭ ކަމަށް ވެސް އެމަނިކުފާނު ތުހުމަތުކުރެއްވި އެވެ. އެއީ ރާއްޖޭގެ ރައީސަކު އެއްވެސް އިރަކު އަމަލުކުރަން ބޭނުންވި ގޮތެއް ނޫން ކަމަށް ވެސް ވިދާޅުވި އެވެ.
"މިއީކީ އަޅުގަނޑުމެން އެއްވެސް އިރެއްގައި ދިވެހިރާއްޖޭގެ ރައީސުލްޖުމްހޫރިއްޔާ އަކު އަމަލުކުރަން ބޭނުންވި ގޮތެއް ނޫން،" ނަޝީދު ވިދާޅުވި އެެވެ.
އެމަނިކުފާނު ވިދާޅުވި ގޮތުގައި ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަން ބަދަލުކޮށް، ހިޔާލު ފާޅުކުރުމާއި އެއްވެ އުޅުމުގެ މިނިވަންކަން ދޭން ދިވެހިން އެދުނީ ތަރައްގީއަށް ޓަކަ އެވެ. އެ މިނިވަންކަން ދޭން އެދުނީ ފަރުދީ ތަނަވަސްކަން ހޯދުމަށް ޓަކައި ކަމަށާއި އަބުރުވެރި ދިރިއުޅުމެއް ހޯދަން ކަމަށް ވެސް އެމަނިކުފާނު ވިދާޅުވި އެވެ.
އެމްޑީޕީގެ ރިޔާސީ ކެންޑިޑޭޓްގެ ހައިސިއްޔަތުން ކުރައްވާ ކެމްޕެއިނުގައި ރައީސް އިބްރާހީމް މުހައްމަދު ސޯލިހު ރަށްރަށަށް ވަޑައިގެންނެވުމުން އަޑު އުފުލަން މަސައްކަތް ކުރާ އިދިކޮޅު ފަރާތްތައް ހުއްޓުވާތީ އިދިކޮޅު ޕީޕީއެމް/ޕީއެންސީން ވެސް ފާޑު ކިޔަ އެވެ.
